Read tetala Akambu wʼAsi Lewi 3 Bible Online

Akambu wʼAsi Lewi 3 - tetala bible

Akambu wʼAsi Lewi 3

¹Naka ulambu wa untu weli ulambu wa ulambu wa ki, naka ndi ambulambula ngombe kʼuma lu limba, umi kana wadi, kalambuli kaha la ekomo la ntundu ka Latuyalaka.

²Ndi kahe lunya landi lʼote wʼulambu andi, kakidiaki lʼeotwelo ka luudu lʼesanganelu la dipema. Ku elombedi, ana apami wa Arona, wayomonga dikila lʼutshimba tshe wʼediakelu.

³Uma lʼulambu wʼulambu wa ki, uku ulambu wa nambula lu dja le Latuyalaka, ndi kalambuli wata watukumbaka mbu yʼutema ndu wane tshe wumamemi loko,

⁴ashu ahendi wʼokongo la wata wadingi, wumamemi lu ina, ndu ukumbo wʼuvo wayundunya kame la astiu wʼokongo.

⁵Ku ana apami wa Arona wayatshumba lʼediakelu ladiku diʼulambu wa lutshumba, weli ladiku dia kunyi ya lu dja, dia ndjala diowo dia ngenyangenya Latuyalaka.

⁶Naka ulambu andi ne dia ulambu wʼulambu wa ki le Latuyalaka weli okoko kana mbudi uma lu limba, umi kana wadi, ndi kalambuli waha la ekomo.

⁷Naka ndi ambulambula onʼokoko ne dia ulambu andi, ndi kulambuli la ntundu ka Latuyalaka,

⁸ndi kahe lunya lʼote wʼulambu andi, kudiaki la ntundu ka luudu lʼesanganelu la dipema. Ku ana apami wa Arona wayomonga dikila diawo lʼutshimba tshe wʼediakelu.

⁹Ku uma lʼulambu wa ki, uku ulambu wa nambula lu dja le Latuyalaka, ndi kalambuli wata awo la utundu a wela weli la wata, wayundunya lasuki lʼukandji, la wata watukumbaka mbu yʼutema ndu wane tshe wumamemi loko,

¹⁰ashu ahendi wʼokongo la wata wadingi, wumamemi lu ina, ndu ukumbo wʼuvo wayundunya kame la ashu wʼokongo.

¹¹Ku olombedi ayatshumba lʼediakelu, uku ma diambulambwema le Latuyalaka.

¹²Naka ulambu andi weli mbudi, ndi kakilambuli la ntundu ka Latuyalaka.

¹³Ndi kahe lunya lʼote ato, kakidiaki la ntundu ka luudu lʼesanganelu la dipema. Ku ana apami wʼArona wayomonga dikila diato lʼutshimba tshe wʼediakelu.

¹⁴Uma lʼulambu andi, uku ulambu ne dia ulambu wa nambula lu dja le Latuyalaka, ndi kalambuli wata watukumbaka mbu yʼutema ndu wane wumamemi loko,

¹⁵ashu ahendi wʼokongo la wata wadingi, wumamemi lu ina, ndu ukumbo wʼuvo wayundunya kame la ashu wʼokongo.

¹⁶Olombedi ayatshumba lʼediakelu uku ma dia nambula lu dja, ne dia ndjala diowo dia ngenyangenya. Wata tshe weli wa Latuyalaka.

¹⁷Oso ayuyala olembe wa pundju pulu ndu le tukanula tanyu lʼahuli tshe wayunyutadjaseka, diaha nde wata kuyanga dikila.