Read tetala Akambu wʼAsi Lewi 4 Bible Online

Akambu wʼAsi Lewi 4 - tetala bible

Akambu wʼAsi Lewi 4

¹Latuyalaka akatela Mose ati:

²Uteli asi Isariyele wati: Naka untu ambu-tsha kolo kahandutungi lutunga, ku ndi ambudiaka olembe omotshi lʼatei wʼelembe wakadji Latuyalaka diaha untu tshe ntsha,

³naka eli olombedi lakakitama iso, ku ambete wudja lʼunungu, ndi kalambuli Latuyalaka osongo a ngombe wʼumi waha la ekomo ulambu wa kolo, ne dia kolo kakandatshi.

⁴Kela ngombe kako kʼumi lʼeotwelo ka luudu lʼesanganelu la dipema, la ntundu ka Latuyalaka. Kahe lunya landi lʼote a ngombe kʼumi, kadiaki ngombe kʼumi la ntundu ka Latuyalaka.

⁵Ku olombedi lakakitama iso ayosa dikila dimotshi dia ngombe kʼumi, ayudiela lu luudu lʼesanganelu la dipema.

⁶Olombedi ayudja luhita landi lu dikila, ayudimonga tena esambeli la ntundu ka Latuyalaka elanedi la dihondo diʼekumbelu kʼetemwelo.

⁷Olombedi ayukita dikila dimotshi lu seki yʼediakelu ka malashi wʼupumu lʼatei a luudu lʼesanganelu la dipema, la ntundu ka Latuyalaka. Ndi ayutshulula dikila dia ngombe kʼumi diutshikadi lʼekulu wʼediakelu kʼulambu wa lutshumba keli lʼeotwelo ka luudu lʼesanganelu la dipema.

⁸Ndi kanya wata tshe wa ngombe kʼumi kʼulambu wa kolo; wata watukumbaka mbu yʼutema ndu wata tshe wumamemi loko,

⁹ashu ahendi wʼokongo la wata wadingi, wumamemi lu ina, ndu ukumbo wʼuvo wayundunya kame la ashu wʼokongo

¹⁰(uku atuwuwanyaka uma lu ngombe kʼulambu wʼelambu wa ki), ku olombedi ayatshumba lʼediakelu kʼulambu wa lutshumba.

¹¹Keli ekuhu ka ngombe kʼumi la emunyi ato tshe kame la ote ato, sanga yato, mbu yʼutema yato la tumi tato,

¹²utundu a ngombe kʼumi tshe mbayundotola lʼandja a pangu lu dihuli dia pudipudi, lene atuwutshululaka utuku, ku ndi ayutukitshumba lu dja ya kunyi. Lene atuwutshululaka utuku, kayutututshumbama.

¹³Naka ului tshe wa Isariyele wambutsha kolo kahawatungi lutunga la dikambu diako hadienama lu ashu wʼului, ku vo wambuyala la unungu ne dia wambutsha dikambu dimotshi lʼatei wʼakambu wakadjanga Latuyalaka diaha ntsha,

¹⁴lamʼambeyama kolo kakawatshi, ului kawulambuli osongo a ngombe kʼumi ne dia ulambu wa kolo, kawuwela la ntundu ka luudu lʼesanganelu la dipema.

¹⁵Dihangamendi diʼului kawahe anya awo ladiku diʼote wa ngombe kʼumi la ntundu ka Latuyalaka, ku ngombe kʼumi kayudiakema la ntundu ka Latuyalaka.

¹⁶Olombedi lakakitama iso, ayela dikila dimotshi dia ngombe kʼumi uya lu luudu lʼesanganelu la dipema.

¹⁷Olombedi ayudja luhita landi lu dikila, ayudimonga tena esambeli la ntundu ka Latuyalaka, elanedi la dihondo diʼekumbelu.

¹⁸Ndi ayukita dikila dimotshi lu seki yʼediakelu keli lʼatei a luudu lʼesanganelu la dipema la ntundu ka Latuyalaka. Ku ndi ayutshulula dikila diutshikadi lʼekulu wʼediakelu kʼulambu a lutshumba keli lʼeotwelo ka luudu lʼesanganelu la dipema.

¹⁹Ndi ayunya wata ato tshe, ayatshumba lʼediakelu.

²⁰Osoku mbayundutsha la ngombe kʼumi. Uku akandatshi la ngombe kʼumi kʼulambu wa kolo mbayundutsha la to. Olombedi ayatungela ekesanelu, ku vo wayudimanyiama.

²¹Ndi ayemba ngombe kʼumi lʼandja a pangu, ayutukitshumba uku akandatshumbi ngombe kʼumi ka ntundu. Oso eli ulambu wa kolo ne dia ului.

²²Lamʼatsha umbuledi kolo, lu ntsha dikambu dimotshi diahandatungi lutunga lʼatei wʼakambu tshe wakadjanga Latuyalaka, Unyashungu andi, diaha ntsha, ku ndi ambuyala la unungu;

²³Naka ndi ambeya kolo kakandatshi, ndi kela mbudi, umi laha la ekomo, uku ulambu andi.

²⁴Ndi kahe lunya landi ladiku diʼote a mbudi, kakidiaki lu dihuli diatuwudiakaka elambu wa lutshumba la ntundu ka Latuyalaka. Oso eli ulambu wa kolo.

²⁵Ku olombedi ayosa dikila dimotshi diʼulambu wa kolo la luhita landi, ayudikita lu seki yʼediakelu kʼulambu wa lutshumba. Ndi ayutshulula dikila diambutshikala lʼekulu wʼediakelu kʼulambu wa lutshumba.

²⁶Ndi ayutshumba wata ato tshe lʼediakelu, uku wata wʼulambu wʼelambu wa ki. Osoku mbayutungela olombedi umbuledi ako ekesanelu ne dia kolo kandi, ku ndi ayudimanyiama.

²⁷Naka untu kʼuntu ambutsha kolo, lu ntsha dikambu dimotshi diahandatungi lutunga lʼatei wʼakambu wakadjanga Latuyalaka diaha ntsha, ku ndi ambuyala la unungu,

²⁸lamʼayundeya kolo kakandatshi, ndi kela mbudi, wadi laha la ekomo, ulambu ne dia kolo kandi kakandatshi.

²⁹Ndi kahe lunya landi lʼote wʼulambu wa kolo, kadiaki ulambu wa kolo lu dihuli diatuwudiakaka elambu wa lutshumba.

³⁰Ku olombedi ayosa dikila dimotshi la luhita landi, ayudikita lu seki yʼediakelu kʼulambu a lutshumba. Ndi ayutshulula dikila diutshikadi lʼekulu wʼediakelu.

³¹Ndi kanya wata tshe uku atuwunyaka wata wʼelambu wa ki. Ku olombedi ayatshumba lʼediakelu, dia ndjala diowo dia ngenyangenya Latuyalaka. Olombedi ayutungela ekesanelu, ku ndi ayudimanyiama.[1]

³²Naka ndi ambela osongo wʼokoko uku ulambu andi ne dia ulambu andi wa kolo, ndi kela wadi laha la ekomo.

³³Ndi kahe lunya landi ladiku diʼote wʼulambu andi wa kolo, kudiaki ne dia ulambu wa kolo, lu dihuli diatuwudiakaka elambu wa lutshumba.

³⁴Olombedi ayosa dikila dimotshi diʼulambu wa kolo la luhita landi, ayudikita lu seki yʼediakelu kʼulambu wa lutshumba. Ku ndi ayutshulula dikila diambutshikala tshe lʼekulu wʼediakelu.

³⁵Ndi kanya wata awo tshe uku atuwunyaka wata wʼosongo wʼokoko wʼulambu wʼelambu wa ki, ku olombedi ayatshumba lʼediakelu, ladiku diʼelambu wa nambula lu dja le Latuyalaka. Olombedi ayutungela ekesanelu ne dia kolo kakandatshi, ku ndi ayudimanyiama.