Read tetala Akambu wʼAsi Lewi 5 Bible Online

Akambu wʼAsi Lewi 5 - tetala bible

Akambu wʼAsi Lewi 5

¹Naka untu tshe ambutsha kolo ne dia ndi ambuka etshibelu ka lu sekedia ndjala omenyi ndu kuyanga ndi eko omenyi, lu dikambu diakandenyi kana diayundeya, keli ndi haditi, ndi ayemba wutshu wa kolo kandi.

²Kana, naka untu tshe ambunanda engo ka mindu, kana udu a nyama ka mindu, kana udu wʼelungalunga ka wuki ka mindu, kana udu wa nyama kemotshi uma lʼatei a nyama yayakutula, la ndi heyi dikambu diako, ku ndi akayadi mindu, ndi ayuyala la unungu.

³Kana, naka ndi ambunananda mindu kʼuntu, ka wuhu omotshi wa mindu weya ndjala le untu lambuyala mindu, la ndi heyi dikambu diako, lamʼayundudieya, ndi ayuyala la unungu.

⁴Naka untu ayutshiba shashimuya la elomo andi, dia ntsha kolo kana ololo, wutshu tshe wʼetshibelu ka shashimuya katutshibaka antu la ndi heyi dikambu diako, lamʼayundudieya, ndi ayuyala la unungu lu dikambu diako.

⁵Lamʼambuyala untu la unungu lu dikambu dimotshi lʼatei wʼakambu aso, ndi kashuli kolo kakandatshi.

⁶Ndi kela ulambu andi wʼunungu le Latuyalaka, ne dia kolo kakandatshi, osongo wʼokoko wa wadi kana mbudi ka wadi uma lu limba ne dia ulambu wa kolo. Ku olombedi ayutungela ekesanelu ne dia kolo kandi.

⁷Keli naka ndi heyi nkundja osongo wʼokoko, ndi kela uku ulambu andi wʼunungu le Latuyalaka ne dia kolo kakandatshi, binga pendi kana tana tuhendi ta kudumba: kemotshi ne dia ulambu wa kolo, kekina ne dia ulambu wa lutshumba.

⁸Ndi kayela le olombedi layulambula otoi ntundu ne dia ulambu wa kolo. Ndi ayushidikula ote ato, ku aha mbuhimbula pi.

⁹Ndi ayomonga dikila dimotshi diʼulambu wa kolo lʼumamu wʼediakelu, ku ndi ayusedia dikila diambutshikala lʼekulu wʼediakelu. Oso eli ulambu wa kolo.

¹⁰Ku ndi ayulambula fudu ka hendi ne dia ulambu wa lutshumba uku didjangu. Olombedi ayutungela ekesanelu ne dia kolo kakandatshi. Ku ndi ayudimanyiama.

¹¹Keli naka ndi heyi nkundja binga pendi kana tana tuhendi ta kudumba, ndi kela etenyi otoi ka dikumi ka efa ka shima ka pudipudi ne dia ulambu wa kolo, uku ulambu andi ne dia kolo kakandatshi. Ndi tadjaki iso, ndu tadjaki tsho loko, ne dia vo weli ulambu wa kolo.

¹²Ndi kawela le olombedi, ku olombedi ayosa diwambu otoi dia shima uku euhwelu kawo, ayukitshumba lʼediakelu ladiku diʼelambu wa nambula lu dja le Latuyalaka. Oso eli ulambu wa kolo.

¹³Osoku mbayutungela olombedi ekesanelu ne dia kolo kakandatshi lu dikambu dimotshi lʼatei wʼakambu aso. Ku ndi ayudimanyiama. Ku etenyi kutshikadi kayuyala kʼolombedi, uku lʼulambu wa shima.

¹⁴Latuyalaka akatela Mose ati:

¹⁵Naka untu tshe ambunga, ambutsha kolo kahandutungi lutunga lu dikambu dimotshi lʼatei wʼakambu wʼekila wa Latuyalaka, ndi kela okoko wʼumi waha la ekomo uma lu limba, wayuyudja ushinga lu toshekele ta fesa, yediko ya shekele ya lʼetemwelo, uku ulambu wʼunungu le Latuyalaka,

¹⁶ndi kakimo ndu ushinga wʼengo kʼekila kakandalanya. Kahe ndu etenyi otoi ka tanu ladiku; kakimo le olombedi. Olombedi ayutungela ekesanelu lʼokoko wʼumi wʼulambu wʼunungu, ku ndi ayudimanyiama.

¹⁷Naka untu tshe ambutsha kolo, ambutsha dikambu dimotshi lʼatei wʼakambu wakadjanga Latuyalaka diaha ntsha, kuyanga ndi heyi, ndi ayuyala la unungu. Ku ndi ayemba wutshu wa kolo kandi.

¹⁸Ndi kela okoko wʼumi waha la ekomo uma lu limba, wayuyudja ushinga lu yediko yʼushinga wʼulambu wʼunungu le olombedi. Olombedi ayutungela ekesanelu ne dia munga kakandatshi, kakindi kutunga lutunga, ku ndi ayudimanyiama.

¹⁹Oso eli ulambu wʼunungu. Ndi eko la unungu la ntundu ka Latuyalaka.