Read tetala Akambu wʼAsi Lewi 6 Bible Online

Akambu wʼAsi Lewi 6 - tetala bible

Akambu wʼAsi Lewi 6

¹Latuyalaka akatela Mose ati:

²Naka untu tshe ambutsha kolo, ambungale Latuyalaka, ne dia ndi ambukesa unyandi lu engo ka lukimiya kana ka lulamia, kuyanga ka luva, kana kakandahotola unyandi,

³kuku kana ndi akatongona engo kakashisho, ku ndi ambukianguna, ambutshiba lu kashi, — lu dikambu dimotshi lʼatei wʼakambu tshe watutshaka antu, ku ambutsha kolo loko;

⁴lamʼakatshi untu kolo, ndu lamʼakandayala la unungu, dieli la ndi dia nkaluya engo kakandavi, kana kakandahotola la khudu, kana engo kakawukimiya, kana engo kakashisho kakandatongona,

⁵kana engo kemotshi kakandanguna lʼetshibelu ka kashi. Dieli la ndi dia nkaluya engo kako ndu mbahe etenyi otoi ka tanu ladiku diato, ku ndi nkikimo le kangato, lushi lʼulambu andi wʼunungu.

⁶Ndi kela okoko wʼumi waha la ekomo uma lu limba, wayuyudja ushinga lu yediko ya ushinga wa ulambu wʼunungu le olombedi, ulambu andi wʼunungu le Latuyalaka ne dia kolo kandi.

⁷Olombedi ayutungela ekesanelu la ntundu ka Latuyalaka, ku ndi ayudimanyiama lu dikambu dimotshi lʼatei wʼakambu wukuki untu ntsha ku ndi ndjala la unungu.[2]

⁸Latuyalaka akatela Mose ati:

⁹Uteli Arona la anʼandi wʼapami wati: Onʼeli olembe wʼulambu wa lutshumba. Ulambu a lutshumba kawutshikalaki lu kunyi ladiku diʼediakelu utshu tshe edja ndu la pindju, la dja kayohetaki lʼediakelu ladiku diawo.

¹⁰Olombedi ayolota dihondo diandi dia linene, ndu ayolota ehaku andi wa linene lu dimba. Ndi ayunya utuku wʼulambu a lutshumba wayulunguya dja lʼediakelu, ayukitsha lʼumamu wʼediakelu.

¹¹Ku ndi ayukulula ahondo andi, ayolota ahondo akina. Ndi ayotola utuku lʼandja a pangu lu dihuli dia pudipudi.

¹²Dja kayohetaki lʼediakelu; yo tayudimalaki. Olombedi ayudjaka kunyi loko pindju tshe; ndi ayolonga ulambu wa lutshumba ladiku diayo, ayutshumbaka wata wʼelambu wa ki loko.

¹³Dja kayohetaki lʼediakelu tena tshe; yo tayudimalaki.

¹⁴Onʼeli olembe wʼulambu wa shima. Ana apami wʼArona wayulambulaka Latuyalaka lu welelo wʼediakelu.

¹⁵Omotshi ayosa diwambu dia shima ka pudipudi ka ulambu wa shima kame la iso kawo ndu la tsho tshe yeli lʼulambu wa shima, ku ndi ayukitshumba lʼediakelu, uku euhwelu kawo, dia ndjala diowo dia ngenyangenya Latuyalaka.

¹⁶Etenyi kayutshikala, kayuyala le Arona la anʼandi wʼapami dia vo nde. To kayolema aha la edya lu dihuli diʼekila; lu seke dia luudu lʼesanganelu la dipema kayuwukile.

¹⁷Tawukifumbaki la edya. Dimi lambuwashato uku etenyi kawo uma lʼulambu ami wa nambula lu dja. To keli engo kuleki ekila, uku ulambu wa kolo, ndu ulambu wʼunungu.

¹⁸Usika pami tshe lʼatei wʼana apami wʼArona mbeyaka nkile. Etenyi kako kayuyala etenyi kawo ka pundju lu nonga yanyu, uma lʼelambu wa Latuyalaka wa nambula lu dja. Untu tshe layuwenanda, ayuyala ekila.

¹⁹Latuyalaka akatela Mose ati:

²⁰Onʼeli ulambu wayulambula Arona la anʼandi wʼapami le Latuyalaka lu lushi layundukitama iso: etenyi otoi ka dikumi ka efa ka shima ka pudipudi, uku ulambu wa shima pundju; etenyi ka hendi kawo la pindju, la etenyi ka hendi la dikolo.

²¹Kawukikalangi la iso lu panu, kukiela kamboloyama dimena, lu betshi diukalangemi uku ulambu wa shima, kukilambuli dia to ndjala diowo dia ngenyangenya Latuyalaka.

²²Olombedi uma lʼatei wʼana apami wʼArona, lambukitama iso dia ndjala ukito andi, kayulambulaka ulambu ako le Latuyalaka, uku didjangu dia pundju. Ulambu ako tshe wayutshumbamaka.

²³Ulambu wa shima tshe wʼolombedi kawutshumbamaki tshe; vo tawolemaki.

²⁴Ku Latuyalaka akatela Mose ati;

²⁵Uteli Arona la anʼandi wʼapami wati: Onʼeli olembe wʼulambu wa kolo: lu dihuli diatuwudiakaka ulambu wa lutshumba, kayuwudiaka ulambu wa kolo la ntundu ka Latuyalaka. Vo mbuleki ekila.

²⁶Olombedi latulambulaka ulambu ako wa kolo, kayuwole. Vo wayolema lu dihuli diʼekila ku seke dia luudu lʼesanganelu la dipema.

²⁷Kene tshe kayusakana lʼumunyi ato, kayuyala ekila. Lamʼatamela yema ya dikila diawo lu dihondo dimotshi, kudisuli lu dihuli diakadiatamedi dikila lu dihuli diʼekila.

²⁸Kawuli puki ka diwumba kakawakati ulambu ako. Naka lu puki ka ohotela kakawakati, to kakiusulami lʼashi, kakediami pudipudi.

²⁹Apami tshe lʼatei wʼelombedi wayuwole; ulambu ako mbuleki ekila.

³⁰Keli ulambu wa kolo wakawela dikila diawo lu luudu lʼesanganelu la dipema dia ndjutunga ekesanelu lu dihuli diʼekila, tawolemaki. Vo kawutshumbami lu dja.