Read tetala Akambu wʼAsi Lewi 7 Bible Online

Akambu wʼAsi Lewi 7 - tetala bible

Akambu wʼAsi Lewi 7

¹Olembe wʼulambu wʼunungu one. Vo mbuleki ekila.

²Lu dihuli diatuwu-diakaka ulambu wa lutshumba, kayuwudiakaka ulambu wʼunungu. Ku dikila diawo diayomongama lʼutshimba tshe wʼediakelu.

³Kawulambuli wata awo tshe: wela weli la wata, la wata watuku-mbaka mbu yʼutema,

⁴ashu ahendi wʼokongo la wata tshe wumamemi lʼina ndu ukumbo wʼuvo, wayundunya kame la ashu wʼokongo.

⁵Ku olombedi ayatshumba lʼediakelu uku ulambu wa nambula lu dja le Latuyalaka. Ulambu wʼunungu oso.

⁶Pami tshe lʼatei wʼelo-mbedi mbeyaka mbole, vo wayolemaka lu dihuli diʼekila. Ulambu ako mbuleki ekila.

⁷Ulambu wʼunungu weli uku ulambu wa kolo; olembe otoi mbeko dikambu diawo. Ku olombedi layutunga ekesanelu ayuyala kangawo.

⁸Olombedi lambulambwela untu ulambu wa lutshumba, ayuyala kanga ekutiu kʼulambu ako wa lutshumba wambundulambula.

⁹Ulambu tshe wa shima kayufumbamaka lu atshuku, ndu kene tshe kayolongoswamaka lu panu kana lʼekango, wayuyalaka wa olombedi lambulambula.

¹⁰Keli ulambu tshe wa shima ka losohanya la iso kana kʼufumbu, wayuyala wa ana apami tshe wʼArona, untu lʼuntu.

¹¹Olembe wʼulambu wʼelambu wa ki one, weya untu nambula le Latuyalaka.

¹²Naka ndi ambulambula ulambu ako ne dia eukelu ka lusaka, ndi kalambuli ekama waha la edya wosohanyimi la iso, ekati waha la edya woloyami la iso, ndu ekama wa shima ka pudipudi wosohanyimi ololo la iso, kame la ulambu wʼeukelu ka lusaka.

¹³La ulambu wʼelambu andi wa ki, ne dia eukelu ka lusaka, mbayundela ulambu andi kame la ekama wa ma dieli la edya.

¹⁴Uma lu weuhu ako, ndi ayulambula ukama otoi uma lʼulambu wʼulambu, uku ulambu le Latuyalaka. Ku to kayuyala ka olombedi latomongaka dikila diʼelambu wa ki.

¹⁵Nyama kʼulambu wʼelambu andi wa ki ne dia eukelu ka lusaka, kalemaki lushi lʼulambu andi. Ndi tatshikaki nduku yema edja ndu la pindju.

¹⁶Keli naka ulambu wʼulambu andi weli ulambu wa daka kana ulambu wa lulangu, vo kawolemi lushi lako layundulambula ulambu andi. Naka yema yambutshikala, yo mbeyaka ndema la wedi a pindju.

¹⁷Keli naka yema ya nyama kʼulambu yambutshikala edja ndu lushi la satu, katshumbami lu dja.

¹⁸Naka yema ya nyama yʼulambu wʼelambu andi wa ki yayolema lushi la satu, one lulambula hetawoma, kuyanga vo ndjala lu wadi le ndi. Vo wayuyala wononyi, ku one lole, ayemba wutshu wa kolo kandi.

¹⁹Nyama kambusakana la engo tshe ka mindu, talemaki, katshumbami lu dja. Wane tshe weli pudipudi mbeyaka nde nyama,

²⁰keli untu lale nyama kʼulambu wʼelambu wa ki wa Latuyalaka lamʼeli mindu lu dimba diandi, untu ako ayunyema uma lu wudja awo.

²¹Naka untu ayunanda engo ka mindu, mindu kʼuntu, nyama ka mindu, kana wononyi omotshi wa mindu, ku ndi ndjole nyama kʼulambu wʼelambu wa ki wa Latuyalaka, untu ako ayunyema uma lu wudja awo.

²²Latuyalaka akatela Mose ati:

²³Uteli asi Isariyele wati: Tanyolekaki wata wa ngombe, wʼokoko, kana wa mbudi.

²⁴Nyu mbeyaka ntsha elimu ekina la wata wa nyama kambuvo usina kana nyama kakadiakema le nyama kekina, keli tanyuwalekaki.

²⁵Ne dia untu tshe lale wata wa nyama kambuwulambula Latuyalaka ulambu wa nambula lu dja, ayunyema uma lu wudja awo.

²⁶Dikambu dikina, tanyolekaki wuhu tshe wa dikila, dia fudu kuyanga dia nyama, lu adjaselu anyu tshe.

²⁷Untu tshe lale dikila, untu ako ayunyema uma lu wudja awo.[3]

²⁸Latuyalaka akatela Mose ati:

²⁹Uteli asi Isariyele wati: One lalambula ulambu wʼelambu andi wa ki le Latuyalaka, kela ulambu andi le Latuyalaka. Uma lu ulambu wʼelambu andi wa ki,

³⁰ndi kela elambu wa nambula lu dja le Latuyalaka la anya andi hita. Ndi kela wata kame la tulu, dia tulu ndjetshetshama uku ulambu wa letshetsha la ntundu ka Latuyalaka.

³¹Olombedi ayutshumbawata lʼediakelu, keli tulu kayuyala ka Arona la anʼandi wʼapami.

³²Uma lʼulambu wʼelambu anyu wa ki, kanyushaki olombedi elemba ka lukulu la lupami uku ulambu.

³³Lʼatei wʼana apami wʼArona, one lalambula dikila diʼelambu wa ki la wata, etenyi kandi kayuyala elemba ka lukulu la lupami.

³⁴Ne dia dimi lambosa tulu ka letshetsha la elemba ka lukulu katulambulaka asi Isariyele uma lʼelambu wʼelambu awo wa ki, lambuyisha olombedi Arona la anʼandi wʼapami uku uhiku wa pundju uma le asi Isariyele.

³⁵Oso eli etenyi ka Arona la anʼandi wʼapami uma lʼelambu wa nambula lu dja wa le Latuyalaka, kakakidiama le wo lu lushi lakawaluwama dia nkamba ulimu uku elombedi wa Latuyalaka.

³⁶Uhiku oso mbakadjanga Latuyalaka lushi lakandakiti iso dia asi Isariyele mbakashaka. Oso eli uhiku awo wa pundju wayuyalaka lu lolonga la lolonga.

³⁷Oso eli olembe wʼulambu wa lutshumba, wʼulambu wa shima, wʼulambu wa kolo, wʼulambu wʼunungu, la wʼulambu wʼekidielu, ndu wʼelambu wa ki,

³⁸wakadjangela Latuyalaka Mose lʼUkungu a Sinai, lushi lakandadjangela asi Isariyele dia vo mbela elambu awo le Latuyalaka, lʼusui wa shenga wa Sinai.