Read tetala Akambu wʼAsi Lewi 8 Bible Online

Akambu wʼAsi Lewi 8 - tetala bible

Akambu wʼAsi Lewi 8

¹Latuyalaka akatela Mose ati:

²Ose Arona la anʼandi wʼapami, ahondo, iso kʼekitelu, osongo wa ngombe wʼulambu wa kolo, aumi ahendi wʼekoko, la saka dia ma diaha la edya.

³Kusanganya antu tshe kame lʼeotwelo ka luudu lʼesanganelu la dipema.

⁴Mose akatshi uku akawudjangela Latuyalaka, ku ului wʼantu wakamote lʼeotwelo ka luudu lʼesanganelu la dipema.

⁵Mose akatela ului wʼantu ati: Dikambu diakatudjangela Latuyalaka dia shu ntsha ne.

⁶Mose akayi la Arona la anʼandi, akawaotsha lʼashi.

⁷Ndi akalotsha Arona sumishi kʼasanga, uya, la ukutu. Ndi akawudji ukutu wa nemo, akolotsha uya wakatshama la lononga wa lʼukutu wa nemo wakandolotsha.

⁸Ndi akawudji opema, akamamanya nyembo yʼaloho lʼopema ako.

⁹Ndi akawahe lufule lʼolombedi lʼote akamami lukaka la paunyi lu lufule lako la ntundu, dembo dia kusu diʼekila, uku akawudjangela Latuyalaka.

¹⁰Mose akose iso kʼekitelu, akakikiti lʼetemwelo ndu lu diango tshe diaki loko, akadikidia.

¹¹Ndi akakimonge tena esambeli lʼediakelu, akakikiti lʼediakelu ndu lu diango diato tshe diʼulimu, ndu lu donga kame lʼekitshelu kadio, dia dikidia.

¹²Ndi akatela Arona iso kʼekitelu lʼote, akukitito, dia mbukidia.

¹³Mose akasu-kanya ana apami wʼArona, akalotsha sumishi la eya, akakeleka tufulefule uku akawudjangela Latuyalaka.

¹⁴Ndi akela osongo a ngombe wʼulambu wa kolo. Ku Arona la anʼandi wʼapami wakahe anya lʼote wʼosongo a ngombe.

¹⁵Ku Mose akudiaki, akose dikila, akadikiti la luhita landi lu seki yʼediakelu lʼutshimba tshe. Ndi akedia ediakelu; akatshulula dikila la tshina diʼediakelu, akakikidia dia nkitungela ekesanelu.

¹⁶Ndi akose wata tshe watu-kumbaka mbu yʼutema, ukumbo wʼuvo, la ashu ahendi wʼokongo kame la wata awo. Ku Mose akatshumbi lʼediakelu.

¹⁷Keli ndi akatutshumba osongo a ngombe, ekuhu kawo, emunyi awo la tumi tawo lu dja lʼandja a pangu, uku akawudjangela Latuyalaka.

¹⁸Ndi akela okoko wʼumi wʼulambu wa lutshumba. Ku Arona la anʼandi wʼapami wakawahe anya lʼote.

¹⁹Mose akudiaki, akamonge dikila lʼutshimba tshe wʼediakelu.

²⁰Lamʼakasesama okoko ako, Mose akatshumbi ote, funda la wata.

²¹Lamʼakawasuli mbu yʼutema la sanga lʼashi, Mose akatshumbi okoko tshe lʼediakelu, uku ulambu wa lutshumba, weli la diowo dia ngenyangenya, ulambu wa nambula lu dja le Latuyalaka, uku akandadjangela Mose.

²²Ndi akela okoko ukina wʼumi, okoko wʼekidielu. Arona la anʼandi wakahe anya lʼote.

²³Mose akudiaki, akose dikila diawo, akadikiti Arona lu sodi ka tui dia lupami, ndu lu luhita lʼumi la lunya la lupami, la lu luhita lʼumi la lu lukulu landi la lupami.

²⁴Wakasukanya ana apami wʼArona, ku Mose akakiti dikila lu sodi yʼatui awo wa lupami, ndu ya waumi wa pita yawo yʼanya wa lupami, la lu pita yawo ya waumi ya lu ekulu wa lupami. Ndi akamonge dikila lʼutshimba tshe wʼediakelu.

²⁵Ndi akose wela weli la wata, la wata tshe watukumbaka mbu yʼutema, ukumbo wʼuvo, la ashu ahendi wʼokongo kame la wata awo, la elemba ka lunya la pami.

²⁶Ndi akose ukama otoi wa ma diaha la edya, ukama otoi wa ma diosohanyimi la iso, la ukati otoi uma lu saka dia ma diaha la edya, diaki la ntundu ka Latuyalaka. Ndi akekitsha ladiku dia wata, ndu ladiku dia elemba ka lunya la lupami.

²⁷Ndi akadikitsha dio tshe lu anya wa Arona la anʼandi wʼapami, akadietshetsha uku ulambu wa letshetsha la ntundu ka Latuyalaka.

²⁸Ku Mose akadinya uma lu anya awo, akaditshumbi lʼediakelu kame la ulambu wa lutshumba, uku ulambu wʼekidielu; weli la diowo dia ngenyangenya, ulambu wa nambula lu dja le Latuyalaka.

²⁹Ku Mose akose tulu, akakietshetsha la ntundu ka Latuyalaka ne dia ulambu wa letshetsha. Oso aki uhiku uma lu okoko wʼumi wʼekidielu, uku akawudjangela Latuyalaka.

³⁰Mose akose yema yʼiso yʼekitelu la ya dikila diaki lʼediakelu, akamonge Arona la ahondo andi, ndu anʼandi wʼapami la ahondo awo. Osoku mbakandakidia Arona la ahondo andi, kame la anʼandi wʼapami la ahondo awo.

³¹Mose akatela Arona la anʼandi wʼapami ati: Nyukati nyama lʼeotwelo ka luudu lʼesanganelu la dipema. Kanyukile laawo la ma diʼuma lu saka diʼelambu wʼekidielu, uku akamadjanga nti: Arona la anʼandi wʼapami mbayukilekaka.

³²Kanyutshumbi nyama la ma diayutshikala lu dja.

³³Kanyutshikali nshi esambeli lʼeotwelo ka luudu lʼesanganelu la dipema. Tanyumoki uma laawo edja ndu nshi ya ekidiamelu kanyu yambukuka, ne dia ayuyala nshi esambeli dia nyukidia.

³⁴Wuhu one wutshami elo, mbakadjanga Latuyalaka dia nyutungela ekesanelu.

³⁵Kanyutshikali lʼeotwelo ka luudu lʼesanganelu la dipema nshi esambeli ndu la yanyi ndu lʼutshu. Kanyukitanyia okende wa Latuyalaka; nyutukuvo, ne dia osoku mbakandambidjangela.

³⁶Arona la anʼandi wʼapami wakatshi akambu tshe wakadjanga Latuyalaka lʼunyo a Mose.