Read tetala Akambu wʼAsi Lewi 9 Bible Online

Akambu wʼAsi Lewi 9 - tetala bible

Akambu wʼAsi Lewi 9

¹Lu lushi lʼenanei, Mose aketi Arona la anʼandi wʼapami la dihangamendi dia Isariyele.

²Ndi akatela Arona ati: Ose osongo a ngombe wʼumi ne dia ulambu wa kolo, la okoko wʼumi ne dia ulambu wa lutshumba. Yo hyendi kayuyali yaha la ekomo. Uyilambuli la ntundu ka Latuyalaka.

³Uteli asi Isariyele wati: Nyose wumbi a mbudi ne dia ulambu wa kolo, osongo a ngombe la osongo wʼokoko weki eleku otoi ndu waha la ekomo, ne dia ulambu wa lutshumba;

⁴ngombe la okoko wʼumi ne dia elambu wa ki, wa nambula la ntundu ka Latuyalaka; ndu ulambu wa shima wosohanyimi la iso. Ne dia elo, Latuyalaka ayene le nyu.

⁵Vo wakela kene kakawatela Mose la ntundu ka luudu lʼesanganelu la dipema. Ku ului wʼantu tshe wakasukana, wakemala la ntundu ka Latuyalaka.

⁶Mose akati ati: Dikambu ne mbakanyudjangela Latuyalaka dia nyu ntsha, ku lutumbu landi layene le nyu.

⁷Ku Mose akatela Arona ati: Usukani lʼediakelu, ulambuli ulambu aye wa kolo la ulambu aye wa lutshumba. Utungi ekesanelu dikambu diaye ndu dia wudja. Ela ulambu wa wudja, atungeli ekesanelu, uku akadjanga Latuyalaka.[4]

⁸Okone Arona akasukana Iʼediakelu, akadiaki osongo wa ngombe wa ulambu wa kolo, waki dikambu diandi ndame.

⁹Ku ana apami wʼArona wakawela dikila. Ku ndi akadji luhita landi lu dikila, akadikiti lu seki yʼediakelu, akatshulula dikila la tshina diʼediakelu.

¹⁰Keli ndi akatshumbi wata la ashu wʼokongo, la ukumbo wʼuvo wa nyama kʼuma lʼulambu wa kolo lʼediakelu, uku akadjangela Latuyalaka Mose.

¹¹Ndi akatutshumba emunyi la ekuhu lʼandja a pangu.

¹²Arona akayudiaka nyama kʼulambu wa lutshumba. Ana apami wʼArona wakawela dikila, ku ndi akadimonge lʼutshimba tshe wʼediakelu.

¹³Vo wakawela ulambu wa lutshumba, funda la funda la ote. Ndi akayitshumbi lʼediakelu.

¹⁴Ndi akasuli mbu yʼutema la sanga, akayitshumbi lʼediakelu kame la ulambu wa lutshumba.

¹⁵Ndi akela ulambu a wudja, akose wumbi a mbudi wʼulambu wa kolo waki dikambu dia wudja, akudiaki, akulambula ne dia kolo, uku akandatshi lʼulambu wa ntundu wa kolo.

¹⁶Ndi akela ulambu wa lutshumba, akulambula uku olembe.

¹⁷Ndi akela ulambu a shima, akakiose diwambu diandi too. Ndi akakitshumbi lʼediakelu lʼumamu wʼulambu wa lutshumba wa la pindju.

¹⁸Arona akadiaki ndu ngombe la okoko wʼelambu wa ki ne dia wudja.[5] Anʼandi wʼapami wakawela dikila. Ku ndi akadimonge lʼutshimba tshe wʼediakelu.

¹⁹Vo wakawela wata wa ngombe la wʼokoko, wela weli la wata, wata watukumbaka mbu yʼutema, ashu wʼekongo la ekumbo wʼevo.

²⁰Vo wakayahe wata ladiku dia tulu. Ku ndi akatshumbi wata ako lʼediakelu.

²¹Arona aketshetsha tulu la elemba ka lukulu la lupami ulambu wa letshetsha la ntundu ka Latuyalaka, uku akadjanga Mose.

²²Arona akedia anya andi utsha le wudja, akatshokola.[6] Lamʼakandashidiya nambula ulambu wa kolo, ulambu wa lutshumba, ndu elambu wa ki, ndi akahulo.

²³Mose la Arona wakoto lu luudu lʼesanganelu la dipema. Lamʼakawatumbi uma loko, vo wakatshokola wudja, ku lutumbu la Latuyalaka lakene le antu tshe.

²⁴Dja yakatumbi uma la ntundu ka Latuyalaka, yakatshumbi ulambu wa lutshumba ndu wata waki lʼediakelu. Lamʼakenyi antu tshe dikambu so, vo wakahangohango, wakako ekhukhumadi la kete.