Read tetala Jeremiya 1 Bible Online

Jeremiya 1 - tetala bible

Jeremiya 1

¹Aui wa Jeremiya, onʼa Hilikiya, olombedi omotshi uma lʼatei wʼelombedi wa la Anatota, lu kete ya Bendjamina.

²Diui dia Latuyalaka diakayi le Jeremiya lu eleku ka dikumi lʼasatu ka diulelu dia Josiya,[1] onʼa Amona, khumʼekanga ka Juda.

³Dio diakayi ndu lu nshi ya Jehoyakima,[2] onʼa Josiya, khumʼekanga ka Juda, edja ndu lʼeleku ka dikumi lʼotoi ka Zedekiya,[3] onʼa Josiya, khumʼekanga ka Juda, edja ndu etena kakatolama asi Jerusalema lu fumbi, lu ngondo ka tanu.

⁴Diui dia Latuyalaka diakayi le mi ati:

⁵Ntundu dimi latakutungi lʼutema wa nyo, dimi lakakeyi, Ndu ntundu we atatumbi uma lʼutema wa nyo, dimi lakakukidia. Dimi lakakosonola umvutshi wa wedja.

⁶Ku dimi lakakaluya diui nti: Hayii! Khumadiondjo Latuyalaka, we henyi, dimi haleyi nteketa, ne dia dimi leki dikenda.

⁷Keli Latuyalaka akankaluya diui ati: Tutaki wati: Dimi leki dikenda. We ayutsho le wane tshe wayumukutuma, La we ayuta kene tshe kayumukutela.

⁸Tuwaukaki woma, Ne dia dimi leko kame la ye dia nkutshungula, mbata Latuyalaka.

⁹Ku Latuyalaka akasimbula lunya landi, akamunanda lʼunyo; akamvutela ati: Enda, dimi lambudja aui ami lʼunyo aye.

¹⁰Enda, dimi lambukukitsha elo Ladiku dia wedja ndu ladiku dia waulelu, Dia we mpikula la nyukula. Dia we nanya la mpandjula, Dia we mpika la mune.

¹¹Diui dia Latuyalaka diakayi le mi ntu ati: Jeremiya, kenaye na? Ku dimi lakûkaluya diui nti: Lutahi lʼutamba wa amande mbenami.

¹²Ku Latuyalaka akankaluya diui ati: We akenyi ololo, ne dia dimi latulamaka diui diami dia ditsha.

¹³Diui dia Latuyalaka diakayi le mi etena ka hendi ati: Kenaye na? Ku dimi lakûkaluya diui nti: Puki kadodo kenami lu leke la ngelʼa kushi, la unyo ato mbelela uya lindu.

¹⁴Latuyalaka akamvutela ati: Uma leko, la ngelʼa kushi, kayuya elanyelu le antu tshe wa lu wudja.

¹⁵Dimi layeta antu tshe wa lu waulelu wa la ngelʼa kushi. Vo wayuya, wayushikike untu lʼuntu kiti kandi ka diulelu lʼeotwolo kʼasuku wa la Jerusalema, lu peli tshe dia lukumbu layo, ndu lʼesumba tshe wa la Juda.

¹⁶Dimi layalumbuya dikambu dia kolo yawo tshe, ne dia vo wakanseke, wakatshumbela ditemolatemola malashi, ndu wakatemola elimu wakawatshi lʼanya awo.

¹⁷Uneli, ukikitsha uya, uwateli kene tshe kayumukutela. Tudidimaki la ntundu kawo, ne dia dimi latukukudidimia la ntundu kawo.

¹⁸Enda, dimi lambukete elo uku usumba wudingami lukumbu, uku ekoho ka luwulu, uku peli diʼehotela, le wudja tshe, le khumi ya dikanga ya la Juda, le ewandji awo, le elombedi awo ndu le antu tshe wa lu wudja.

¹⁹Vo wayukolosha, keli vo hawukolembia, ne dia dimi leko kame la ye dia nkutshungula, mbatami, dimi Latuyalaka.