Read tetala Jeremiya 12 Bible Online

Jeremiya 12 - tetala bible

Jeremiya 12

¹Latuyalaka li, we keli ololo tshe lamʼatumudjaka la ye tamu. Keli dimi nangaka nkumbula dikambu dia dumbwelu diaye. Okoko wana watongonaka antu wa kolo? Okoko wana watulumbaka akanga a lukesu tshe la ki?

²We kakawaune; vo wambudja ediu, wambongona, wamboto elua. Vo nkeyaka lu elomo awo, keli etema awo weko etali uma le ye.

³Keli we Latuyalaka mbeyakami; We mendakami, la we mbedikaka utema ami uku wewo le ye. Uwatundja uku ekoko wayangawo ndjaka. Uwakitsha laandi edja ndu lushi lʼediakelu!

⁴Etena kakona kayukimo wudja ndela, Kayukimo tumbatumba nengela lu kete tshe? Uma lu kolo kʼasi kete, mbambushila nyama la fudu ushiki, Ne dia vo wakataka vati: Unyashungu hendi ekumelu kasu.

⁵Naka we akasaki lʼantu luwangu, ku vo wakakuhekuya. Ukundi ukukiye nsaka la falasa luwangu? Ndu naka we atokokaka lu kete yʼololo, Ukundi ayuyutsha lʼukidi wa Jorodana?

⁶Ne dia ananyo la wa lu luudu la sho watukukesaka, Watukulelelaka wulu lʼokongo aye. Keli tuwaetawoki kuyanga vo nkukutelaka aui wʼololo.

⁷Dimi lakaseke luudu lami, Lakatshiki etenyi kami kʼukito. Dimi lakakimo kene katulangaka utema ami lu anya wʼatunyi awo.

⁸Etenyi kami kʼukito kambuyala le mi, Uku tambwe ka lʼukunda. To kakandjikitela, diako mbamumukihetsha.

⁹Undi, etenyi kami kʼukito kambuyala le mi Uku fudu kʼawadi awadi kambundama? Fudu yatuhatulaka emunyi yambukidinga? Nyutshu, nyutusanganya nyama tshe, nyuyela dia yo ndjukile!

¹⁰Alami efula wakalanya ekambo kami ka vinyo. Vo wakahotshahotsha ekambo kami, Wakete ekambo kami kʼololo usui wa shenga.

¹¹Vo wakakiete dihuli diʼanyanya. To katulelaka la ntundu kami, ne dia elanyelu kato. Kete tshe yambuyala anyanya Ne dia nduku untu layikanela.

¹²Ananyishi wambudela lu ete wʼakuna tshe wa lʼusui, Ne dia yombo ya Latuyalaka yatudiakaka Uma lu kuma ka kete kemotshi edja ndu kuma kekina. Nduku untu leli la ki.

¹³Vo wakune epunga, wambuna atende. Vo wakayahenyahenya, hawukundja nduku engo. Vo wayuka sonyi lu kene kanawo, Ne dia kele ka mamba ka Latuyalaka.

¹⁴Latuyalaka kata okone lu dikambu diʼasukanyi andi wa kolo, wambahe etenyi kʼukito kakandasha wudja andi Isariyele lunya ati: Enda, dimi layuwanya uma lu kete yawo, dimi layunya khumbu ka Juda uma lʼatei awo.

¹⁵Keli lamʼayumushila mbanya, dimi layuwauka ketshi ntu, layakaluya untu lʼuntu lu etenyi kandi kʼukito uya lu kete yandi.

¹⁶Naka wedja ene wayokolamela mbekela ditshelu dia wudja ami, dia ntshiba lu lukumbu lami vati: Uku eli Latuyalaka la lumu! Uku akawetsha wudja ami dia ntshibela Bala, ku vo wayongona lʼatei a wudja ami.

¹⁷Keli naka vo hawulungi, dimi layunya wudja uku tshe, layushila ushiki, mbata Latuyalaka.