Read tetala Jeremiya 16 Bible Online

Jeremiya 16 - tetala bible

Jeremiya 16

¹Diui dia Latuyalaka diakayi le mi ati:

²We hutshuka wadi, ndu huyala la ana apami la ana amantu lu dihuli ne.

³Latuyalaka kata okone lu dikambu dia ana apami la ana amantu wayuto lu dihuli ne, lu dikambu dia anyengewo la washewo wayuwauta lu kete nye ati:

⁴Vo wayuvo la elandu a wulu, hawuwalela kuyanga mbakhunde. Vo wayuyala uku tumi ladiku dia kete. Vo wayudiakema la tombo la ndjala ka kasha. Edu awo wayuyala ma dia fudu ya lʼulungu la dia nyama ya la kete.

⁵Totoki lu luudu lʼutanda, tutshoki leko dia ntulela, tuyandjayandjaki kame la wo, ne dia dimi lakanya ki kami, ngandji kami ka shikaa, la ketshi kami, uma le wudja one, mbata Latuyalaka.

⁶Antu a waki ndu wa tshitshe wayuvo lu wudja one. Hawuwakhunde, hawuwalela, hawuwakotela puta, ndu hawuwanyela divu.

⁷Antu hawuwasha ma lʼutandadia mbasamba ne dia one lambuvo. Vo hawuwasha dikoho diʼesambelu lu dikambu dia shewo kana dia nyengewo.

⁸Totoki lu luudu la dambu dia mbidjase kame la wo, dia nde la no,

⁹ne dia Latuyalaka Kanga lulimbilimbi, Unyashungu wa Isariyele, kata okone ati: Dimi layukumiya waelu wʼongenongeno, waelu wʼongenongeno a wuki, kimbu yʼutshuki ndu kimbu yʼutshukami[24] la ntundu kanyu lu nshi yanyu lu kete.

¹⁰Lamʼayuyutela wudja one aui aso tshe, vo wayukumbula vati: Okoko wana wambuta Latuyalaka aui aso tshe wa kolo lu dikambu diasu? Na unedia asu? Kolo kakona kakatatshela Latuyalaka, Unyashungu asu?

¹¹Ku we ayakaluya diui wati: Latuyalaka kata ati: Ne dia washenyu wakanseke, wakayelaka ditemolatemola, wakaditemolaka, la waka-dikhuselaka adui. Vo wakanseke, kunkitanyia elembe ami.

¹²Keli nyu nyakatshi kolo ndeka washenyu, ne dia nyu tshe untu lʼuntu akayelaka saki kʼutema andi a kolo. Nyu kumbukelami.

¹³Diako mbayumunyutshanya uma lu kete nye, utsha lu kete yahanyeyi ndu yaki washenyu kumbeya. Nyu nyayutotemolaka ditemolatemola leko ndu la yanyi ndu lʼutshu, ne dia dimi halunyenya olo.

¹⁴Latuyalaka kata ati: Etena kayuyala, kahutaka antu vati: Uku eli Latuyalaka lakatundja asi Isariyele uma lu kete ya Edjibitu la lumu!

¹⁵Keli, wayuta vati: Uku eli Latuyalaka lakela asi Isariyele uma lu kete ya la ngelʼa kushi la uma lʼahuli tshe wakandawatshanya, la lumu! Dimi layakaluya ntu uya lu kete yakamasha washewo.

¹⁶Enda, dimi layeta amundji wa nsi, ku vo wayuwanda. Ndu layeta minginga efula, ku vo wayuwatsha lu ekungu tshe, lu akuna tshe ndu lʼatei a weuku wʼave, mbata Latuyalaka.

¹⁷Ashu ami menaka mbuka yawo tshe. Vo haweyi ndjashe uma la ntundu kami, ndu ehedia awo haweyi mbishama lu ashu ami.

¹⁸Dimi layosomboya kolo kawo tena pendi, ne dia vo wakalanya kete yami la ditemolatemola diawo dia kolo, diaha la lumu Vo wambuludia etenyi kami kʼukito lʼakambu awo wa wononyi.

¹⁹We Latuyalaka keli wulu ami, lungeli lami, Eshamelu kami lu nshi ya pa! Wedja wayuya le ye uma la kuma ya la kete. Vo wayuta vati: Washesu wakakiti paka kashi, Ditemolatemola diʼanyanya, diahawasha waho.

²⁰Undi, untu mbeyaka ndjatshela ditemolatemola? Dio dieko anyanya.

²¹Ulungi, dimi layalimbitshiya, layuwaenya lunya lami la wulu ami etena kene ketu. Ku vo wayeya vati: Lukumbu lami leli Latuyalaka.