Read tetala Jeremiya 2 Bible Online

Jeremiya 2 - tetala bible

Jeremiya 2

¹Diui dia Latuyalaka diakayi le mi ati:

²Tshoka, tuleleli Jerusalema wati: Latuyalaka kata ati: Dimi mbuhoka ngandji kaye lu nshi yaye yʼusekaseka, Lulangu laye lamʼakiye wadi uyuyu, Uku akayayandjelaka lʼusui wa shenga, lu kete yaki kundjala la dikambo.

³Isariyele aki ekila le mi, dimi Latuyalaka, Olonga wa dinela diami. Wane tshe wayuwole, wayuyala la unungu. La elanyelu kayuya le wo.

⁴Nyulungi diui dia Latuyalaka, nyu luudu la Jakoba, nyu khumbu tshe ka wudja wa Isariyele.

⁵Latuyalaka kambula ati: Munga kakona kakatani washenyu le mi, kakawamo uma le mi? Kakawayeli diango diʼanyanya, ndu kakawayaete anyanya?

⁶Vo kumumbula vati: Lendʼeli Latuyalaka, Lakatutundja uma lu kete yʼEdjibitu, Lakatolombola lʼusui wa shenga, Lu kete ya shenga yuludi too lʼafuku, Lu kete ya wumuma la udjima a tshududu, Lu kete yahatetaka antu, ndu yahatudjaseka antu?

⁷Dimi lakanyela uya lu kete ya mbu efula ya nyu nde, Elua wʼuma loko weko mbu ya nde yuleki ololo. Keli lamʼakanyakumi, nyu nyakasuwula kete yami, Nyakete ukito ami wononyi.

⁸Elombedi kumumbula vati: Lendʼeli Latuyalaka? Ndu embetsha wʼelembe kumbeyakami, Ndu elombodi wakampediaka, Ndu nmvutshi wakateketaka akambu wahatayi uma le Bala, Wakayelaka diango diaki kumbeya mbakimanyia.

⁹Uma lu dikambu so, mbalangami mama la nyu ntu, mbata Latuyalaka. Ndu mbayumama la ekana anyu.

¹⁰Nyeti lu asenga wa la Kitime, nyutendi! Nyutumi akendji la Kedara, nyutushishimi ololo, Ndu nyutendi kana dikambu dia wuhu one dieko leko!

¹¹Undi, wudja omotshi weko, wakengonya ditemolatemola diawo, Kuyanga dio kema ditemolatemola dia mete? Keli wudja ami wambengonya lutumbu lawo La engo kaheyi mbakimanyia.

¹²Ulungu li, ukashimo dia dikambu ne, Uyali la okei, mbata Latuyalaka!

¹³Wudja ami wambutsha kolo hyendi: Vo wakanseke, dimi eteko kʼashi wa lumu, Ndu wakayatshimela afuku wʼashi, Wako weli la elonge, waheyi nkimela ashi.

¹⁴Undi, Isariyele fumbi ka lusumba kendi, kana ukambi lakuto lu luudu? Okoko wana wambunduyala nyama kambundama?

¹⁵Esongo wa tambwe wudikitela, Wuwasuswe, ndu wambulanya kete yandi. Esumba andi wambutshumbama, nduku untu loko.

¹⁶Dikambu dikina, asi Memifi la Tapanehese Wambukowediawedia ote, we Isariyele.

¹⁷Aha ne dia nyu nyakaseke Latuyalaka, Unyashungu anyu, Lamʼakandayanyolombolaka lu mbuka, Mbambuyala dikambu ne le nyu?

¹⁸Waho akona wayunyutukundja dia ntsho lʼEdjibitu, Dia ntono arbi wa Nile? Waho akona wanyukundja dia ntsho lu Asuriya, Dia ntono ashwa Eyufarate?

¹⁹Kolo kanyu kayunyuhangwela, la uhedia anyu wayunyusuya. Nyeyi, ndu nyulimbiteli nyati: Dikambu ne diakanyatshi dia nseka Latuyalaka, Unyashungu anyu, La diaha mbuka woma dieko kolo ndu ululu Mbata Khumadiondjo, Latuyalaka Kanga lulimbilimbi.

²⁰Nshi yʼedjedja, nyu nyakatshatsha lokoho lanyu, Nyakahimbula ekodi anyu; Nyakati nyati: Shu hatuyulanga ndjala fumbi ntu. Ee, nyakanseke, nyakatemola Ladiku dia dikuna tshe diʼutali, Ndu la tshina diʼutamba tshe wʼuyuyu.

²¹Dimi lakanyune wuhu wuleki ololo, lukuno luleki dimena. Ukundi ambunyukadimo dia ndjala tahi yʼanyanya, Wuhu wutshikitanyi la wuhu ami.

²²Kuyanga nyu nyayuyaotsha la akadi, La sabunyi efula, kolo kanyu kayutshikala la ntundu ka mi, Mbata Khumadiondjo Latuyalaka.

²³Ukundi weyanyu mvuta nyati: Shu kundjasanya, kundjela WaBala? Nyendi wanya anyu lu ukidi, Nyeyi kene kakanyatshi, nyu esongo wa kamelo watekekoka!

²⁴Nyu nyeli uku mangana ka wadi kakekela lʼusui wa shenga, Katululaka too la saki ka mbeyana la umi; Ayeya nkishimba dia to munduya saki kato? Waumi tshe watukiyangaka, hawutokomoka alimba, Vo watukishulaka lu nshi vato vʼekhukhwelu.

²⁵Tanyutshikaki ekulu anyu hwe, tanyumiaki weudi anyu tu! Keli nyu mvutaka nyati: Kema, aui aso anyanya, Ne dia shu tatulangaka ditemolatemola dia wedja, tayudiyelaka.

²⁶Uku atolomboka uvi lamʼatuwuwundaka, Osoku mbambolombo wa lu luudu la Isariyele: Vo la khumi ya dikanga yawo la ewandji awo, elombedi awo la amvutshi awo.

²⁷Vo watutelaka utamba vati: We keli shesu; La dive vati: We kakatuti! Vo wambombediya ekongo awo, aha dundji. Keli lu nshi yawo ya pa, vo wayuta vati: Uneli, utushimbeli.

²⁸Lendʼeli ditemolatemola dianyu, diakanyayatshela? Diemali, naka dio mbeyaka nyushimbela lu etena ka pa! We Juda, uku eli efula kʼesumba anyu, Mbeli efula ka ditemolatemola dianyu.

²⁹Okoko wana walanganyu mama la mi? Nyu tshe nyakampedia, mbata Latuyalaka.

³⁰Dimi lakayaenya pa anyanya dia nsuya anʼanyu. Vo kumbidja tukanyi nduku yema lu wetshelu. Nyu nyakadiaki amvutshi anyu la tombo. Uku atuwudiakaka tambwe kadiakana.

³¹Nyu wa lolonga lone, nyuki diui dia Latuyalaka ati: Undi, usui wa shenga mbakimi le Isariyele, Kana wudja wa udjima wa tshududu? Mbata wudja ami vati: Shu tambutshungo, shu hatuyukalula le ye?

³²Undi, usekaseka a umuntu mbeyaka mbuhela dengalenga diandi. Kana wadi uyuyu, eloto andi wa tshuki? Keli wudja ami wambumbuhela nshi efula yaheyama mbala.

³³Ndi yimba yeli la ye, lu wuhu watuyuyangaka kene katuyulangaka, Edja ndu amantu wa kolo wambunyukuya lu dikambu ne li!

³⁴Dikila diʼasi wula diaha la unungu, Diatutanemaka lu ahondo anyu, wakinyu kumunda wava diango. Keli ladiku diʼakambu aso tshe,

³⁵Nyu mvutaka nyati: Shu kema la unungu. Kele ka Unyashungu ambumo uma le su. Nyulungi, dimi layunyulumbuya, Ne dia nyu nyatutaka nyati: Shu kuntsha kolo.

³⁶Okoko wana watunyukadimulaka mbuka kanyu esadi? Nyu nyayutshama sonyi le asi Edjibitu Uku akanyutshama le asi Asuriya.

³⁷Uma leko kayunyutumba nyayahe anya lʼote, Ne dia Latuyalaka akatuni wane watunyekamaka, Ndu nyu hanyongona lasuki la wo.