Read tetala Jeremiya 20 Bible Online

Jeremiya 20 - tetala bible

Jeremiya 20

¹Pashura, onʼa olombedi Imere, olombedi a ladiku lu luudu la Latuyalaka, akukaka Jeremiya ata akambu aso wahatayi.

²Pashura akakomola umvutshi Jeremiya, akawudji lu lukanu laki la suku dia ladiku dia Bendjamina, lu luudu la Latuyalaka.

³La wedi a pindju, Pashura akatundja Jeremiya uma lu luweti, ku Jeremiya akawutela ati: latuyalaka kunkole lukumbu ati: Pashura, keli ati: Woma wa Mamba lu beke tshe, mbakandakole.

⁴Latuyalaka kata okone ati: Ulungi, dimi layukutsha woma wa mamba, we la engenyi aye tshe. Vo wayudiakema la tombo tʼatunyi awo. We ayena dikambu diako la ashu aye. Dimi layukimo Juda tshe lu anya wa khumʼekanga ka Babilona. Ndi ayatola lu fumbi utsha la Babilona, ayutadiaka la yombo.

⁵Dimi layukimo ekundji tshe wʼusumba one, engonyi awo tshe, diango diawo tshe diʼushinga a wulu, waumbelu wa khumi ya dikanga ya Juda, lu anya wʼatunyi awo. Vo wayuwamba, wayuwaosa, wayatola utsha la Babilona.

⁶Ndu we Pashura, we la waku tshe wudjashi lu luudu laye, nyayutsho lu fumbi. We ayukuma la Babilona, ayutuvo leko. Leko kayuyutukhundema, we la engenyi aye tshe wakayatelaka akambu wahatayi wa kashi.

⁷Latuyalaka li, we akantshutshiya, Ku dimi laketawo. We akandeki wulu, akanembia. Dimi latuyalaka engo ka tola la lushi la lushi, Antu tshe watonsokaka.

⁸Tena tshe diatumoteketaka, Dimi latulelaka, latuhangohangoka nti: Ngala la elanyelu ne dia diui dia Latuyalaka Ndjalaka engo ka wononyi le mi, ndu ka dionyo la lushi la lushi.

⁹Naka dimi layuta nti: Dimi haludimula lukumbu landi ntu, Dimi haloteketa ntu lu lukumbu landi, Ku ndjalaka lʼutema ami uku dja yadikita, Mbambudihama lu weka ami. Dimi mpimbaka mbikike, keli hakuki.

¹⁰Dimi mbukaka dionyo uma le antu efula, Woma wa mamba weko lʼutshimba tshe. Engenyi ami tshe waki kame la mi, Watulungamelaka ekwelo kami, wata vati: Nyufundi; tufundi, undu ndi ayukesama, Ku shu tayolembia, tayosomboya.

¹¹Latuyalaka eko la mi, uku dihuka diukawo woma. Diako mbayutakana wane watunsuyaka, mbahawonembia. Vo wayutshama sonyi ka mamba, Ne dia vo kuntsha la yimba, Sonyi kawo ka pundju hakuhamamelaki.

¹²We Latuyalaka Kanga lulimbilimbi latedikaka antu wʼololo, Latushishimaka etema ndu weongo, omenya esombweyo kaye le wo, Ne dia le ye kamumukitsha dikambu diami.

¹³Nyimbeli Latuyalaka usambu, nyuwanduli, Ne dia ndi kakashimbela lumu lʼomenyi fono Uma lʼanya wʼantu wa kolo.

¹⁴Lushi lakamuto, ladjami mananu![32] Lushi lakambuti nyomi, talotshokwamaki!

¹⁵Mananu kayali le untu lakela papa lukumu, La mbongenyangenya ati: We ambuta ona pami!

¹⁶Pami kako ayali uku esumba Wakalanya Latuyalaka, wakindi kumbuka ketshi. Ndi ukaki akhumu la pindju La alelu wa ta unya lʼatei ote,

¹⁷Ne dia ndi kundjakami lʼutema a nyomi, Dia nyomi ndjala diumbu diami, Dia ndi ntshikala la diemi pundju.

¹⁸Okoko wana wakamatumbi uma lʼutema wa nyomi, Dia menaka pa la lunyangu, Dia nshi yami ndjala sonyi ketu?