Read tetala Jeremiya 21 Bible Online

Jeremiya 21 - tetala bible

Jeremiya 21

¹Diui dia Latuyalaka diakayi le Jeremiya lamʼakutumela khumʼe-kanga Zedekiya Pashura, onʼa Malakiya, la olombedi Zefaniya, onʼa Maseya, dia ndjuwumbula vati:

²Shu tambukosengasenga shati: Utumbweli le Latuyalaka ne dia Nebukadineza, khumʼekanga ka Babilona, ambutolosha.[33] Undu Latuyalaka ayutuhumuya lukulu lʼolo lu dikambu diandi dimotshi dia mamba, dia ndi ntanganela.

³Ku Jeremiya akakaluya diui ati: Kanyututeli Zedekiya nyati:

⁴Latuyalaka, Unyashungu wa Isariyele, kata ati: Uki, dimi lutsha nkadimula dihumo dia ta dieli lu anya anyu uma le khumʼekanga ka Babilona la asi Kaladiya walo la nyu, wunyudingi lʼandja a lukumbu. Dimi layuwaotshiya lʼatei wʼusumba one.

⁵Dimi layolo la nyu la lunya la wulu lʼusimbwi, la yenyi, kele, la ududu wa mamba.

⁶Dimi layudiaka wa lʼusumba one ndu antu ndu nyama. Vo wayuvo la elandu a wulu.

⁷Lʼokongo diku, dimi layukimo Zedekiya, khumʼekanga ka Juda, ekambi andi, la wudja andi, waku wayuhanda elandu, tombo la ndjala ka kasha lʼusumba lu anya wa Nebukadineza, khumʼekanga ka Babilona, lu anya wʼatunyi watuyangaka mbadiaka. Ku ndi ayadiaka la yombo, ndi huyala lʼote vuvu kuyanga ketshi, mbata Latuyalaka.

⁸Kuteli wudja one wati: Latuyalaka kata ati: Lambukitsha mbuka ka lumu ndu mbuka ka nyoi la ntundu kanyu.

⁹One layutshikala lʼusumba one, ayuvo la yombo, ndjala ka kasha, kana lʼulandu. Keli one layutumba layutsho le asi Kaladiya wunyudingi, ayutshikala la lumu. Ku lumu landi layuyala engo kandi ka dimbu,

¹⁰ne dia dimi lambediya elundji kami uya lʼusumba one, dia mbutshela kolo aha ololo. Vo wayukimwama lu anya wa khumʼekanga ka Babilona, ku ndi ayutshumba dja, mbata Latuyalaka.

¹¹Kututeli luudu la khumʼekanga ka Juda wati: Nyuki diui dia Latuyalaka.

¹²Nyu khumbu ka Davidi, mbata Latuyalaka; nyusambulaki ololo umaka pindju, Nyutshungulaki omenyi fono uma lʼanya wʼusuyanyi, Kele kami atukufato uku dja, la mpeta wuhu waheyi untu nyima, Ne dia etsha anyu wa kolo.

¹³We usumba wudjashi lʼukidi ladiku dia dive dia lʼusui, Dimi la ye dikambu, mbata Latuyalaka. Nyu mvutaka nyati: Akona eya mpulo dia ndjolo la su? Akona eya mboto lu adjaselu asu?

¹⁴Dimi layunyusuya uku eli elua wa etsha anyu. Dimi layudja dja lʼukunda anyu, Ku yo yayutshumba diango tshe dieli lʼutshimba, Mbata Latuyalaka.