Read tetala Jeremiya 22 Bible Online

Jeremiya 22 - tetala bible

Jeremiya 22

¹Latuyalaka kata ati: Utshu utsha la luudu la khumʼekanga ka Juda, kututi diui ne leko wati:

²We khumʼekanga ka Juda, ludjashi lu kiti ka diulelu dia Davidi, ulungi aui wa Latuyalaka, we la ekambi aye, la antu aye watotoka lu asuku ane.

³Latuyalaka kata ati: Nyusambulaki akambu ololo ndu usimbwi. Nyushimbelaki omenyi fono uma lʼanya wʼusuyanyi. Tanyutshelaki ongendangenda, ona etshiki, la wadi aki udu kolo kana akambu wa ngala. Tanyutshululaki dikila diʼuntu laha la unungu lu dihuli ne.

⁴Naka nyu nyayutshaka uku aui ane, ku khumi ya dikanga yudjashi lu kiti ka diulelu ka Davidi, wayotoka lu asuku ane wahemi ladiku dia pusupusu ndu lu falasa, vo la ekambi awo la antu awo.

⁵Keli naka nyu hanyulungi aui ane, dimi lambuyatshiba dime nti: Luudu lone, layuyala elanyelu, mbata Latuyalaka.

⁶Latuyalaka kata okone lu dikambu dia khumbu ka khumʼekanga ka Juda ati: We eli uku Ngiliyade le mi, uku ote wa Lebanona. Keli mete, dimi layukete shenga, usumba waha la antu.

⁷Dimi lutsha nongosola ananyishi dia nkulanya, Untu lʼuntu la dihumo diandi. Vo wayunyukula esasi aye wuleki amena, wayekadja lu dja.

⁸Wedja efula wayetaka lasuki lʼusumba one, wayumbwanaka vati: Okoko wana wakatshela Latuyalaka usumba one a wuki wuhu one na?

⁹Ku wayakaluya diui vati: Ne dia vo wakaseke sheki ya Latuyalaka, Unyashungu awo, wakatemola ditemolatemola, wakadikhusamela.

¹⁰Tanyulelaki one lambuvo kuyanga ntsha utanda andi. Keli nyuleli, nyuleli one latolama lu fumbi, Ne dia ndi hukalula, hena kete yakanduto ntu.

¹¹Okone mbata Latuyalaka lu dikambu dia Shaluma,[34] onʼa Josiya, khumʼekanga ka Juda lakulela lu dihuli dia Josiya, shi, lakatolama uma lu dihuli ne, ati: Ndi hukalula uma leko ntu.

¹²Keli ndi ayutuvo lu dihuli diambundotolama fumbi, ndi hena kete nye ntu.

¹³Mananu kayali le one lahika luudu landi lu akambu wa kolo, La mvudu yandi ya mbetama aha la sambu kʼololo. Mananu kayali le one latukambiaka unyandi ulimu ukambiakambia, aha la difutu;

¹⁴Ndu le one latutaka ati: Dimi layuyahikela shakasaka ya luudu, La mvudu ya waki ya ladiku. Dimi layutshika adidishi loko, Layuludja abaya wʼusasi lʼudiku, Ndu layulukita dangi dia tilili.

¹⁵We ayuyala umbuledi, ne dia we la abaya wʼusasi efula? Sho kondekaka, konokaka uka? Ndi akatshaka ololo ndu usimbwi, akenaka olo.

¹⁶Ndi akasambulaka dikambu diʼusi wula ndu diʼuhumbi ololo. Ndi akenaka olo. Oso taki dikambu dia mbeyami uka? mbambula Latuyalaka.

¹⁷Keli ashu aye la utema aye ntshokaka paka lu saki ka diango, Dia ntshulula dikila diaha la unungu, La dia ntsha akambu a wengiya la wa ndjawudi.

¹⁸Diako mbata Latuyalaka dikambu dia Jehoyakima,[35] onʼa Josiya, khumʼekanga ka Juda ati: Tawulelaki vati: Yee, onengesu! yee, kadiyesu! Tawulelaki vati: Yee, khumesu! yee, Khumadiondjo!

¹⁹Diumbu diandi diayuyala uku dia punda, wayukutula, Wayutuwukadja lʼandja wa asuku wa Jerusalema.

²⁰Utshu utsha la Lebanona, utuhangohango, Utedia diui diaye lu Bashana, utuhangohango la Abarima, Ne dia anangimi aye tshe wambudiakema.

²¹Dimi lakateketaka la ye lamʼakiye lʼongonyi, Keli we akataka wati: Dimi halungi. Osoku mbakayatshaka umaka nshi yaye ya dikenda. We kunkitanyiaka diui diami.

²²Lopepe layumana alami aye wʼekoko tshe, La anangimi aye wayotolama lu fumbi. Ku we ayututshama sonyi, ayutundama la sasi Ne dia kolo yaye tshe.

²³We ludjashi lu Lebanona, leli la kefu lʼatei wʼesasi, Ndi akhumu wayuyukhuma lamʼayukuma toshoko le ye, Uku ta umuntu latata lono li!

²⁴Latuyalaka katshiba ati: Uku wemi la lumu! utunduyala we Koniya,[36] onʼa Jehoyakima, khumʼekanga ka Juda, uyali lohete lʼematelu lu lunya lami la pami, dimi lutukunya uma loko.

²⁵Dimi layukukimo lu anya a waku watuyangaka lumu laye, lu anya a waku watuyukaka woma, lu anya wa Nebukadineza, khumʼekanga ka Babilona, ndu lu anya wʼasi Kaladiya.

²⁶Dimi layukutshanya, we la nyo lakakuti, utsha lu kete kina, lene akinyu kumbuto. Nyu nyayutuvo leko.

²⁷Lu kete yakumbulanyu nkalula, nyu hanyukalula leko ntu.

²⁸Undi, Koniya one eli puki ka dionyo kambule? Utika wahangenangena antu? Okoko wana wakandatshanyema. Ndi la anʼandi la ntukadjema lu kete yahaweyi?

²⁹Kete li, kete li, kete li, Ulungi diui dia Latuyalaka!

³⁰Latuyalaka kata okone ati: Nyufundi pami kene uku untu laha la ana, Uku untu lahangonaki lu nshi yandi, Ne dia nduku onʼandi lukuluwana Dia mbidjase lu kiti ka diulelu ka Davidi, Dia mbulela lu Juda pundju.