Read tetala Jeremiya 23 Bible Online

Jeremiya 23 - tetala bible

Jeremiya 23

¹Latuyalaka kata ati: Mananu kayali le alami wʼekoko, watudiakaka ndu watuhandjulaka ekoko ami watumuleshaka!

²Diako mbatami, dimi Latuyalaka, Unyashungu wa Isariyele, lu dikambu dia alami watuleshaka wudja ami nti: Nyu nyakahandjula ekoko ami, nyakawetshanya etali, nyu kumbelama ololo. Kakiane dimi lutsha nyela elanyelu ne dia etsha anyu wa kolo.

³Dimi layusanganya atshikadi wa ekoko ami, uma lʼahuli tshe wakamawatshanya, layakaluya lu ekutu awo. Ku vo wayutana, wayufulanela.

⁴Dimi layukitsha alami dia mbalamaka. Vo wayaleshaka; hawuyuka woma kuyanga mundama la sasi. Nduku otoi awo ayushisho, mbata Latuyalaka.

⁵Nyulungi, nshi yukuyala, yayumomongia Davidi dimonga diʼololo, ku dio diayuyala khumʼekanga. Ndi ayuyala khumʼekanga, ayongona, ayusambulaka ololo ndu usimbwi lu kete nye, mbata Latuyalaka.

⁶Juda ayushimbamela lu nshi yandi, ndu Isariyele ayuyala la lutui tshitshi. Ku vo wayuwetaka lukumbu lone vati: Latuyalaka ololo asu.[37]

⁷Okone Latuyalaka kata ati: Nyulungi, etena kayuyala, kahutaka antu vati: Uku eli latuyalaka, lakatundja asi Isariyele uma lu kete ya Edjibitu la lumu!

⁸Keli wayutaka vati: Uku eli Latuyalaka, lakela tukanula ta khumbu ka Isariyele uma lu kete ya la ngelʼa kushi ndu uma lu kete tshe yakandawatshanya la lumu! Vo wayudjase lu kete yawo.

⁹Lu dikambu diʼamvutshi, sulu diami diambate, Weka ami tshe wusaka lukumba. Dimi lambuyala uku untu lambudjo wanu, Uku untu lakandami la wanu, Ne dia Latuyalaka ndu dia aui andi wʼekila.

¹⁰Kete yambulula too lʼakanga a lukesu. Yo yaya lʼutanda ne dia mananu. Adiyu wa lʼusui wambulungula. Vo watulawoka utsha lu kolo. Wulu awo weko paka dia ntsha kolo,

¹¹Ne dia ndu amvutshi ndu elombedi wambusuwo. Dimi lakatani kolo kawo ndu lu luudu lami, Mbata Latuyalaka.

¹²Diako mbayuyala mbuka kawo oselo lu udjima. Vo wayusukwama, wayoko loko, Ne dia dimi layuwaela elanyelu lu eleku kayumalumbuya, Mbata Latuyalaka.

¹³Dimi lakenyi dikambu diʼenginya le amvutshi wa la Samariya. Vo wakataka akambu wahatayi lu lukumbu la Bala, Wakanganyia wudja ami Isariyele.

¹⁴Dimi lakenyi dikambu dia wononyi Ndu le amvutshi wa la Jerusalema. Vo watunanaka, watokendakendaka lu kashi. Vo watukikitshaka anya wʼatshi wa kolo, Wuhu waheyi untu nkalula untu uma lu kolo kandi. Vo tshe wambuyala le mi uku Sodoma[38] la asi Jerusalema uku Ngomora.

¹⁵Diako mbata Latuyalaka Kanga lulimbilimbi, Okone lu dikambu diʼamvutshi ati: Nyuki; dimi layalesha kundju, layanosha ashi wa lolengo; Ne dia uma le wo, kambudiangana eonywelo ka Unyashungu lu kete tshe.

¹⁶Latuyalaka Kanga lulimbilimbi kata okone ati: Tanyulungaki aui w amvutshi watunyutelaka akambu wahatayi. Vo watunyulungamiyaka akambu ulungamiyalungamiya. Vo watunyutelaka waenelo wʼuma lʼetema awo, aha wʼuma lʼunyo ami, dimi Latuyalaka.

¹⁷Vo watutelaka waku watutunaka vati: Latuyalaka kata ati: Nyu nyayuyala la ki. Vo watutelaka waku tshe watuyelaka saki yʼetema awo vati: Nduku kolo kayukuma le nyu.

¹⁸Akona lʼatei awo akemala lʼului ami wa sheki, Dimi Latuyalaka, dia mbuka la mpukama aui ami? Akona akahuke tui lu aui ami, akawauki?

¹⁹Nyuki, ngimbi ka Latuyalaka, Ududu andi, ambudiangana, Luhunga la wulu layokomola lu ete wʼantu wa kolo.

²⁰Kele ka Latuyalaka hukitakita, Edja ndu lamʼayundushidiya kene tshe Kakandasanguya lʼutema andi. Nyu nyayumana dikambu ne fundu lu nshi yayayi.

²¹Dimi kuntuma amvutshi ane, keli vo wakatshu. Dimi konteketa la wo, keli vo wakataka akambu wahatayi.

²²Utunduyala vo wakemala lʼului ami, Vo wutukia wudja ami aui ami, Wutakaluya uma lu mbuka kawo ka kolo Ndu uma lʼetsha awo wa kolo.

²³Undi, dimi leko paka Unyashungu weli lasuki, aha ndu Unyashungu wa etali? mbambula Latuyalaka.

²⁴Latuyalaka kambula ati: Untu mbeyaka ndjashe lu ahuli w usheshe, wahameyi mbena uka? Undi, dimi handudi too ndu lʼulungu ndu la kete? mbambula Latuyalaka.

²⁵Dimi lakuki aui wʼamvutshi wakataka akambu wahatayi wa kashi lu lukumbu lami, wata vati: Dimi lakenyi do! dimi lakenyi do!

²⁶Edja ndu etena kakona kayukimo amvutshi ane mvuta akambu wahatayi wa kashi, mvuta akambu wahatayi wa lukesu uma lʼetema awo?

²⁷Vo watukanaka dia mbuhiya wudja ami lukumbu lami lu alu watuwusakwanelaka, uku akuhela washewo lukumbu lami dikambu dia Bala.

²⁸Umvutshi lakenyi do, asakuli do diako, keli one lakuki diui diami, ataki diui diami la kolamelu. Okoko wana wasohanyawo puhudi la epunga? mbambula Latuyalaka.

²⁹Latuyalaka kambula ati: Undi, diui diami aha uku dja mbedio, aha uku uhumo wata dive?

³⁰Okone dimi kema kame la amvutshi watuvaka aui ami, untu lʼuntu uma le unyandi, mbata Latuyalaka.

³¹Latuyalaka kata ati: Nyulungi, dimi kema kame la amvutshi watusutshasutshaka nimi yawo wata vati: Latuyalaka kata.

³²Nyulungi, dimi kema kame la amvutshi wʼalo wa kashi watasakulaka, watunganyiaka wudja la kashi yawo, ndu la ndjasema yawo yʼanyanya. Dim, kumbatuma, kuyanga mbatela diui. Vo hawukimanyia wudja one nduku yema, mbata Latuyalaka.

³³Lamʼayukumbula usi wudja one, umvutshi, kana olombedi ati: Kakona keli endelu ka Latuyalaka? Kakaluya diui wati: Nyu mbeli endelu kako Dinu layunyukadja, mbata Latuyalaka.

³⁴Naka umvutshi, olombedi kana usi wudja ayuta ati; Endelu ka Latuyalaka, dimi layusuya pami kako ndi la wa lu luudu landi.

³⁵Dieli la nyu dia mumbwana, untu la unyandi, untu la onangu nyati: Diui diakona diakakukalusha Latuyalaka? Aui akona wakandatshi?

³⁶Tanyutaki ntu nyati: Endelu ka Latuyalaka, ne dia endelu kako kambuyala diui dia untu tshe. Nyu nyambufutanya aui wa Unyashungu a lumu, Unyash: ngu asu, Latuyalaka Kanga lulimbilimbi.

³⁷Dieli la ye dia mumbula umvutshi wati: Diui diakona diakakukalusha Latuyalaka? Aui akona wakandatshi?

³⁸Latuyalaka kata okone ati: Ne dia nyu nyambuta diui ne nyati: Endelu ka Latuyalaka, diakamanyutumela diui nti: Tanyutaki ntu nyati. Endelu ka Latuyalaka.

³⁹Diako mbayu-munyuhela, mbayumunyukadja nyu la usumba one wakamanyusha, nyu la watshenyu, uma la ntundu kami.

⁴⁰Dimi layunyela dionyo dia pundju, ndu sonyi ka pundju wuhu wahuhameki.