Read tetala Jeremiya 28 Bible Online

Jeremiya 28 - tetala bible

Jeremiya 28

¹Lu eleku kako, lʼetatelu ka diulelu dia Zedekiya,[48] khumʼekanga ka Juda, lʼeleku ka nei lu ngondo ka tanu, Hananiya, onʼa umvutshi Azura, usi Ngibiyona, akamvutela dimi Jeremiya lu luudu la Latuyalaka la ntundu ka elombedi lʼantu tshe ati:

²Latuyalaka Kanga lulimbilimbi, Unyashungu wa Isariyele, kata ati: Dimi lambowela lokoho la khumʼekanga ka Babilona!

³Dimi layukaluya diango diʼulimu tshe dia luudu la Latuyalaka diakose Nebukadineza, khumʼekanga ka Babilona, uma lu lihuli ne, diakandatole utsha la Babilona la ntundu ka deku pendi diatakuki.

⁴Dimi layukaluya ndu Jekoniya, onʼa Jehoyakima, khumʼekanga ka Juda, kame la asi Juda wakatolama lu fumbi, ne dia dimi lutsha mbokola lokoho la khumʼekanga ka Babilona, mbata Latuyalaka.

⁵Umvutshi Jeremiya akakaluya umvutshi Hananiya diui la ntundu ka elombedi la antu tshe wakemadi lu luudu la Latuyalaka,

⁶akati ati: Ayali osoku! Latuyalaka katshi osoku. Ndi katshi uku aui wutshiye dia nkaluya diango diʼulimu dia luudu la Latuyalaka, lʼantu tshe wakatolama lu fumbi utsha la Babilona uya lu dihuli ne.

⁷Keli ulungi diui ne, diayangami nkutela we lʼantu tshe nti:

⁸Amvutshi waki la ntundu kami ndu la ntundu kaye lu nshi yʼedjedja, wakataka akambu wahatayi wa ta, wa ndjala ka kasha, ndu wʼelandu lu dikambu dia wedja efula la waulelu a waki.

⁹Naka umvutshi ambuta akambu wahatayi wa ki, ku aui andi wambushidiyama, keti antu mbeya vati: Unyashungu kakutumi.

¹⁰Umvutshi Hananiya akanya lokoho uma lu kingu ka umvutshi Jeremiya, akalokola.

¹¹Hananiya akatela antu tshe ati: Latuyalaka kata ati: Ukuku mbayumokola lokoho la Nebukadineza, khumʼekanga ka Babilona, uma lu kingu ya wedja la ntundu ka deku pendi diatakuki. Ku umvutshi Jeremiya akatshu.

¹²Lamʼakokola umvutshi Hananiya lokoho laki lu kingu ka umvutshi Jeremiya, diui dia Latuyalaka diakayi le Jeremiya ati:

¹³Utshu, ututeli Hananiya wati: Latuyalaka kata ati: Lavunyutshela koho ya mbulu lu dihuli dialo.

¹⁴Dimi lambudja wedja ene tshe lokoho la lu wulu lu kingu yawo, dia vo ndjala lʼokongo wa Nebukadineza, khumʼekanga ka Babilona, ku vo wayulambulaka elambu. Dimi lambuwusha ndu nyama ya lʼukunda, mbata Latuyalaka Kanga lulimbilimbi, Unyashungu wa Isariyele.

¹⁵Ku umvutshi jeremiya akatela umvutshi Hananiya ati: Hananiya, ulungi! Latuyalaka kunkutuma, keli we ambekamia wudja one lu aui wa kashi.

¹⁶Diako mbata Latuyalaka ati: Uki, dimi layukunya uma la diku dia kete. We ayuvo lu eleku kene, ne dia we akati aui wa ntombokwelami, dimi Latuyalaka.

¹⁷Ku umvutshi Hananiya akavu lu eleku kako lu ngondo kʼesambeli.