Read tetala Jeremiya 29 Bible Online

Jeremiya 29 - tetala bible

Jeremiya 29

¹Lanʼeli aui wa lu mukanda wakatumi umvutshi Jeremiya uma la Jerusalema utsha le atshikadi wa dihangamendi dia Isariyele diaki lu lohombo, le elombedi, le amvutshi, ndu le antu tshe wakatole Nebukadineza uma la Jerusalema utsha la Babilona lu fumbi.[49]

²Laso ku khumʼekanga Jekoniya, nyangu, elenga, ewandji wa Juda la wa Jerusalema, etshudi wʼabaya la etshudi wa mbulu, wambumoka uma la Jerusalema.

³Ndi akasha Elasa, onʼa Shafana, la Ngemariya, onʼa Hilikiya, wakatumi Zedekiya, khumʼekanga ka Juda utsha la Babilona le Nebukadineza, khumʼekanga ka Babilona, mukanda. Aui wakafundami loko ane ati:

⁴Dimi Latuyalaka, Kanga lulimbilimbi, Unyashungu wa Isariyele, katela wane tshe weli lu lohombo, wakamatole fumbi utsha la Babilona uma la Jerusalema nti:

⁵Nyuhiki mvudu, nyudjase loko, nyune diango lʼekambo, kanyuli diango dia dinela diʼuma loko.

⁶Nyutshuki wadi, kanyuti ana wʼapami la ana wʼamantu. Kanyutshukeli anʼanyu wadi, ndu kanyutshukamia anʼanyu wʼamantu dia vo mbuta ana wʼapami la ana wʼamantu. Kanyufulaneli lene enyu, tanyukitakitaki.

⁷Nyuyangeli usumba wakamanyotole lu fumbi k nyolombelaki Latuyalaka, ne dia lu ki kako kayunyuyala la ki.

⁸Ne dia Latuyalaka Kanga lulimbilimbi, Unyashungu wa Isariyele, kata ati: Tanyetawoki amvutshi anyu weli lʼatei anyu, la etshi anyu wʼawulu nyukesa, kuyanga nunga aui wʼamenyi anyu wʼalo;

⁹ne dia vo watunyutelaka akambu wahatayi wa kashi lu lukumbu lami, keli dimi kumbatuma, mbata Latuyalaka.

¹⁰Lamʼayunyukutsha deku akumi esambeli[50] lu Babilona, dimi layunyokendela dia nshidiya diui diami diʼololo le nyu, dia nyukaluya lu dihuli ne, mbata Latuyalaka.

¹¹Dimi mbeyaka sangweyu dia-tumusanguyaka lu dikambu dianyu, sangweyu dia ki, aha diʼelanyelu, dia nyusha elungamelu la nshi yayayi.

¹²Nyu nyayetaka lukumbu lami, nyayuyonombaka, ku dimi layunyukelaka.

¹³Nyu nyayunyanga, ku nyayumbishula, lamʼayunyunyanga lʼutema tshe.[51]

¹⁴Dimi layetawo nyu mbishulami. Dimi layukadimula lohombo lanyu, layunyusanganya uma lu wedja tshe ndu uma ahuli tshe, lene akamanyutshanya. Dimi layunyu-kaluya lu dihuli diakamanyose, dia nyotola lu fumbi.

¹⁵Nyu nyakati nyati: Latuyalaka ambututundjiya amvutshi lu Babilona.

¹⁶Latuyalaka kata diui ne lu dikambu dia khumʼekanga kudjashi lu kiti ka diulelu ka Davidi, ndu lu dikambu dia antu tshe wudjashi lʼusumba one, anengenyu waki kuntsho la nyu lu lohombo.

¹⁷Nyuki, dimi layatumela yombo, ndjala ka kasha la elandu. Dimi layuwaete uku fingu yambohonda, yahakuki untu nde, ne dia yo yaya kolo, mbata Latuyalaka Kanga lulimbilimbi.

¹⁸Dimi layuwatshanya la yombo, ndjala ka kasha, la elandu, layakimo uku engo ka wononyi lʼatei a waulelu tshe wa la kete, dia vo ndjala engo ka mananu, engo ka nkashimo, engo ka mpongwela soi la engo ka dionyo lʼatei a wedja tshe wayumuwatshanya,

¹⁹ne dia vo kunkitanyia aui ami, wakamatumelaka kʼolomo la pindju le ekambi ami amvutshi. Vo kununga, mbata Latuyalaka.

²⁰Okone nyu tshe weli lu lohombo, nyu waku wakamatole uma la Jerusalema utsha la Babilona, nyulungi diui diami, dimi Latuyalaka.

²¹Latuyalaka Kanga lulimbilimbi, Unyashungu wa Isariyele, kata lu dikambu dia Ahaba, onʼa Kolaya, ndu lu dikambu dia Zedekiya, onʼa Maseya, watunyutelaka akambu wahatayi wa kashi lu lukumbu lami vati: Nyuki, dimi layakimo lu anya wa Nebukadineza, khumʼekanga ka Babilona, ku ndi ayadiaka lu ashu anyu.

²²Asi Juda tshe weli fumbi lu Babilona wayuwaete djimbitelu ya mvutaka vati: Latuyalaka akutsheli uku Zedekiya la Ahaba, wane wakatshumbi khumʼekanga ka Babilona lu dja.

²³Dikambu ne diayuyala le wo, ne dia vo wakatshi akambu wutshatsha lu Isariyele, wakunana la wadi a wanyawo, ndu ne dia wakataka aui wa kashi lu lukumbu lami, wakimi kumbatela. Dimi mbeyaka dikambu ne, ndu omenyi adio mbemi, mbata Latuyalaka.

²⁴Kuteli Shemaya, usi Nehelame wati:

²⁵Latuyalaka Kanga lulimbilimbi, Unyashungu wa Isariyele, kata ati: We akatumi mikanda lu lukumbu laye le antu tshe weli la Jerusalema, le Zefaniya, onʼa olombedi Maseya, ndu le elombedi tshe wati:

²⁶Latuyalaka ambukudja olombedi lu dihuli dia olombedi Jehoyada, dia amendji ntanemaka lu luudu la Latuyalaka, dia vo menda untu tshe leli kanga dadi, ndu layadja umvutshi, dia we mbudja lu luweti la mbukeleka molola.

²⁷Dikambu kuna diahayatahangwela Jeremiya, usi Anatota, lambuyadja umvutshi lʼatei anyu?

²⁸Ndi ako kakatutumela diui la Babilona ati: Lohombo leki edja, nyuhiki mvudu, nyudjase loko, nyune diango lu dikambo, kanyuli diango dia dinela diʼuma loko!

²⁹Olombedi Zefaniya akali mukanda one la ntundu kʼumvutshi Jeremiya.

³⁰Ku diui dia Latuyalaka diakayi le Jeremiya ati:

³¹Kutumeli wane tshe weli lu lohombo diui wati: Latuyalaka kata lu dikambu dia Shemaya, usi Nehelame, ati: Ne dia Shemaya atunyutelaka akambu wahatayi aha dimi mbutuma, ndu ne dia ndi atunyekamiaka lu aui wa kashi,

³²mbayumusuya, ndi la tukanula tandi. Nduku untu luto la ndi layudjase lʼatei a wudja one, ndu ndi hena ololo wayumutshela wudja ami, ne dia ndi akataka aui wa ntombokwelami, dimi Latuyalaka.