Read tetala Jeremiya 33 Bible Online

Jeremiya 33 - tetala bible

Jeremiya 33

¹Diui dia Latuyalaka diakayi le Jeremiya etena ka hendi, lamʼaka-wulamaka lu seke dia luudu la lukanu, ati:

²Latuyalaka lakatungi kete, lakayilongosola ndu lakayikikitsha, lukanga lukumbu leli Latuyalaka, kata ati:

³Umbeti, ku dimi layuketawo, layukenya akambu a waki ndu wushami, wahayeyi.

⁴Latuyalaka, Unyashungu wa Isariyele, kata okone lu dikambu dia mvudu ya lʼusumba one, ndu dia mvudu ya khumi ya dikanga ya Juda yakawanyukula dia ndjashimbela uma le waku waki lu ngeli ndu uma lu yombo, ati:

⁵Asi Kaladiya wayayi dia ndjolo ta la dia ndudia mvudu ku la edu wʼantu wakamadiaki lu kele kami ndu lʼududu ami. Dimi lambushe elundji kami uma lʼusumba one, ne dia kolo tshe kambuwatsha.

⁶Ulungi, dimi layakonoya, layakalanganya, layuwasha wulu lu alimba, layatshela la ki la memakana.

⁷Dimi layukaluya asi Juda ndu asi Isariyele wakatolama lu fumbi. Dimi layashikike uku akiwo nshi ya ntundu.

⁸Dimi layuwaedia uma lʼehedia awo tshe, wakawampedia. Dimi layadimanyia kolo yawo tshe yakawantshela, yakawantombokwela.

⁹Usumba one wayuyala lukumbu lʼongenongeno la diandu la lutumbu le mi lʼatei a wedja tshe wa la kete wayukaka lukumu lʼololo tshe wayumatshela. Vo wayukashimo, wayusaka lukumba dia ololo tshe la dia ongonyi wayumatshela.

¹⁰Latuyalaka kata okone ati: Lu dihuli ne diakanyataka nyati: Dio diambulanyema, diaha lʼuntu kuyanga nyama; lu esumba wa Juda ndu lu tushinga ta Jerusalema aya atongo atu, nduku untu, one ludjashi kuyanga nyama;

¹¹leko hukema aui wa tola la aui wʼongenongeno ntu, aui wʼutshuki la aui wʼutshukami, aui a wane wimba esambu, lamʼatuwelaka elambu wʼeukelu ka lusaka uya lu luudu la Latuyalaka, vati: Nyuki Latuyalaka Kanga lulimbilimbi lusaka, Ne dia ndi eko ololo, Ne dia ngandji kandi ka shikaa ntshikalaka pundju![65] Dimi layukaluya ongonyi wa kete uku akiwo ntundu, mbata Latuyalaka.

¹²Latuyalaka Kanga lulimbilimbi kata ati: Alami wayudjase ndu wayetamia dungalunga diawo ntu lu kete nye yakalana, yaha la antu kuyanga nyama, ndu lʼesumba ayo tshe;

¹³lu esumba wa lu leke lʼakuna, lʼesumba wa la Shefela, lʼesumba wa la Nengebe, lu kete ya Bendjamina, lu ahuli tshe wa lʼutshimba wa Jerusalema, ndu lʼesumba wa Juda, ekoko wayetaka lʼesi a lunya la one latuwalaka, mbata Latuyalaka.

¹⁴Nyulungi, nshi yayuyala, yayumushidiya aui wʼololo wakamati dikambu dia khumbu ka Isariyele, ndu dia khumbu ka Juda, mbata Latuyalaka.

¹⁵Lu nshi sho, dimi layomongia Davidi dimonga diʼololo. Ndi ayusambulaka akambu ololo ndu usimbwi lu kete.

¹⁶Lu nshi sho, Juda ayushimbamela, la Jerusalema ayuyala la lutui tshitshi. Wayumbeta vati: Latuyalaka eko ololo asu.[66]

¹⁷Latuyalaka kata ati: Davidi hahumbaki ukito pundju dia mbidjase lu kiti ka diulelu ka khumbu ka Isariyele.[67]

¹⁸Elombedi wʼasi Lewi hawuhumbaki ekito pundju la ntundu kami, wa nambulaka elambu wa lutshumba, wa ntshumbaka elambu wa shima, la wa nambulaka elambu nshi tshe.[68]

¹⁹Diui dia Latuyalaka diakayi le Jeremiya ati:

²⁰Naka nyu mbeyaka nanya sheki yakamadji dimi la yanyi, ndu yakamadji dimi la utshu, diaha yanyi la utshu ndjala ntu lu tena diawo,

²¹keti nyu nyayeya nanya ndu sheki yakamadji la ukambi ami Davidi, diaha ndi ndjala lʼona pami dia mbidjase lu kiti kandi ka diulelu, ndu sheki yakamadji lʼasi Lewi, elombedi watutshaka ulimu ami.

²²Uku ahaweyi mbala ului wa diango dieli lʼulungu, kana mbedika efula ka lokongo la lu ashi a waki, wuhu ako mbayumufudia tukanula ta ukambi ami Davidi, la asi Lewi watukambaka ulimu ami.

²³Diui dia Latuyalaka diakayi le Jeremiya ati:

²⁴We hadji tukanyi lu aui watutaka antu ane vati: Latuyalaka akatuni khumbu hyendi nye yakandasonola? Diako mbatuwonyolaka wudja ami, diaha vo mbaena ntu uku wudja.

²⁵Naka dimi kumbidja sheki dimi la yanyi ndu dimi lʼutshu, naka dimi kumbidjela ulungu la kete elembe,

²⁶keti dimi layukadja tukanula ta Jakoba, la tʼukambi ami Davidi, diaha dimi mbosa tukanula tandi dia vo ndjala embuledi wa tukanula tʼAbarahama, Isaka, la Jakoba. Dimi layuwakaluya ekundji awo, layauka ketshi, mbata Latuyalaka.