Read tetala Jeremiya 4 Bible Online

Jeremiya 4 - tetala bible

Jeremiya 4

¹Isariyele li, naka nyu nyayukalula, mbata Latuyalaka, Le mi kahumbanyu nkalula. Naka nyu nyayunya akambu anyu wa wononyi la ntundu kami, Nyu hanyuyala tekeko.

²Naka nyu nyayutshiba nyati: Uku eli Latuyalaka la lumu! Lu mete, lu sambu kʼololo, ndu lu ololo, Ku wedja wayotshokwama le ndi. Lu dikambu diandi, kayuyala lutumbu lawo.

³Okone mbatela Latuyalaka Asi Juda la asi Jerusalema ati: Nyutafusaka kete,[5] tanyuneki wehu lu atende.

⁴Nyuyakidia le Latuyalaka, Nyunya akambu wa kolo uma lʼetema anyu, Nyu asi Juda, nyu asi Jerusalema, Kele kami atukutuwo uku dja, La mpeta lumbi wuhu wahakuki untu nyima, Ne dia kolo kʼetsha anyu.

⁵Nyuti lukumu lu Juda, nyusanya la Jerusalema, nyuti nyati: Nyudi amama lu wudja. Nyuhangohango wulu, nyuti nyati: Nyusangani, tutshu utsha lʼesumba weli la kumbu ya wulu!

⁶Nyedia ekuhu ka koi utsha la Siona. Nyulawo, nvuyashimbeli, tanyutshimbatshimbaki, Ne dia dimi lutsha mbela kolo uma la ngelʼa kushi, elanyelu ka wuki.

⁷Tambwe kambukhunguso uma lu hyuka yato. Unanyishi a wedja aya lu ndjakendakenda, Ambuya uma lu edjaselu kato, dia nanya kete yanyu. Esumba anyu wayulanyema, wayuyala atongo atu.

⁸Nyolote akutu, nyuleli, nyusekhumi lʼalelu lu dikambu ne, Ne dia kele ka wulu ka Latuyalaka hakadimo uma le su.

⁹Lushi lako, utema wa khumʼekanga la etema wa ewandji wayuyala ashi atu. Elombedi wayukashimo, amvutshi wayukanana, mbata Latuyalaka.

¹⁰Dimi lakati nti: Yee! Khumadiondjo Latuyalaka li! Mete, we akakesi wudja one la Jerusalema wulu, wati: Nyu nyayuyala la ki, keli enda, tombo tambatundula etema.

¹¹Lu etena keso, wayutela wudja one la Jerusalema vati: Luhaladi la yanyi layuya uma lʼahuli wa ladiku wa lʼusui wa shenga uya lʼusumba wa wudja ami, aha dia mpuhula kana mbete epunga pudipudi.

¹²Luhaladi lako layuya uma leko dikambu diami. Kakiane dimi lutsha mbalumbuya dumbu dia wulu.

¹³Enda, unanyishi uyayi uku dingi, Pusupusu yandi ya ta uku punganendji. Falasa yandi ndeka pungu luwangu. Yee! diasu ku! Shu tambulanyema!

¹⁴Asi Jerusalema li, nyedia etema uma lu kolo, Dia nyu nshimbamela! Edja ndu kaandi ayunyukimo nama tukanyi ta kolo lu etema anyu?

¹⁵Watutaka diui uma la Dane, Watudianganyaka lukumu la kolo uma lʼEfarayima.

¹⁶Nyuteli wedja, nvulimbitshiya Jerusalema nyati: Anyingi, wambuya uma lu kete yʼetali, Wambuhangohangwela esumba wa Juda.

¹⁷Vo wambudinga Jerusalema uku wane walama ekambo, Ne dia vo wakantombokwela, mbata Latuyalaka.

¹⁸Mbuka kanyu la etsha anyu mbambunyutungela akambu ane. Vo weli elua wa kolo yanyu. Vo weli ululu, Ne dia vo nkumaka pulu ndu lʼetema anyu.

¹⁹Lambuvo lʼutema, lambuvo lʼutema; Utema ami ambomenya pa, sulu diami diambatate. Dimi haleyi nembohala, Ne dia we utema mi imbuka lundju la dimama, lundju la ta.

²⁰Wambuta dia elanyelu ladiku diʼelanyelu, Ne dia wudja tshe wambulanyema. Mvudu yami yʼapema yambulanyema shashimuya, Apema ayo wambate lʼetena otoi.

²¹Edja ndu kaandi ajumukimo mena ekuhu ka koi, Ayumukimo mbuka lundju la dimama?

²²Wudja ami weli dinginya, vo hawumbeyi. Vo weli ana waha la tumba, vo kema la ewu. Vo weko la yimba ya ntsha kolo, Keli ewu ka ntsha ololo kema le wo.

²³Dimi lakenyi andja, Ku vo waki anyanya ndu watalongoswama. Lakenyi ulungu, ku vo kundjala lʼusasi.

²⁴Dimi lakenyi ekungu, enda, vo wakadidima, Lʼakuna tshe wakasukasuka.

²⁵Dimi lakendi, ku nduku untu. Ndu fudu tshe ya lʼulungu yambushila ndawo.

²⁶Dimi lakendi, ku usui waki eteto, waya shenga. La esumba awo tshe wakalanyema la ntundu ka Latuyalaka, La ntundu ka kele kandi ka wulu.

²⁷Latuyalaka kata okone ati: Kete tshe yayulanyema, keli dimi haluyilanya tshe tshe.

²⁸Ne dia dikambu ne, mbayuyala kete la utanda, Ndu mbayuyala ulungu udjima utu. Dimi lakati dikambu diako, lakadisanguya, Diako mbahamalembe utema, mbahamukadimo uma loko.

²⁹Wa lʼesumba tshe wakalawo lohokoso Lʼambahemi wa falasa la ambuki wʼeta. Vo wakoto lu tuhuka, wakambela ladiku diʼave. Esumba tshe wakasekama, nduku untu laki leko.

³⁰Keli nyu asi usumba, lamʼayunyulanyema, ayunyutsha na? Kuyanga nyu nyatolotaka ahondo wa tilili, Nyatuyalengaka denealenga dia paunyi, nyatukitaka alangi lu ashu, Ndu nyatuyaenyaka pa anyanya dia ndjaete amena, Anangimi anyu watunyonyolaka, watulangaka nyudiaka.

³¹Ne dia lambuka lawi uku la umuntu latata lono, Lawi la sasi uku lʼeutwelu kandi ka ntundu. Oso eli lawi la ona umuntu a Siona lahetula, Lasimbula anya ati: Diami diambushila, Lambukitshiya la ntundu kʼandjakanyi!