Read tetala Jeremiya 40 Bible Online

Jeremiya 40 - tetala bible

Jeremiya 40

¹Diui dia Latuyalaka diakayi le Jeremiya uma lamʼakukimo Ne-buzaradana, olombodi wʼalimbi uma la Rama. Jeremiya akatolama ukelekami molola kame la fumbi tshe yʼuma la Jerusalema la yʼuma la Juda, yakawatatolaka lu lohombo utsha la Babilona.

²Olombodi wʼalimbi akasukanya Jeremiya, akawutela ati: Latuyalaka, Unya shungu aye, akataka dia elanyelu kene lu dihuli ne.

³Latuyalaka kambutunga dikambu ne. Ndi kambutsha uku akandati, ne dia nyu nyakatshela Latuyalaka kolo. Nyu kunkitanyia aui andi, diako mbambuya dikambu ne le nyu.

⁴Enda, dimi lutsha nkukelekula molola weli lu anya aye elo. Naka we nangaka ntsho lami utsha la Babilona, tutshoki. Endi, kete tshe yeko la ntundu kaye, utshu lene alangaye ntsho.

⁵Naka we nangaka ntshikala, ukaluli le Ngedaliya, onʼa Ahikame, onʼa Shafana, lakadji khumʼekanga ka Babilona umbuledi wʼesumba wa Juda. Kutudjase la ndi lʼatei a wudja. Naka aha osoku, utshu lu ahuli tshe walangaye ntsho. Ku olombodi wʼalimbi akawusha mbu ya nde la eshasha, akalakana la ndi.

⁶Jeremiya akatshu utsha la Mizipa le Ngedaliya, onʼa Ahikame, akatudjase la ndi lʼatei wʼantu wakatshikala lu kete.

⁷Lamʼakuki elombodi tshe wʼalimbi waki lʼesui, vo lʼasikawo, lukumu ati: Khumʼekanga ka Babilona akadji Ngedaliya, onʼa Ahikame, umbuledi a wudja, vo wakakimo apami, amantu, ana, la asi wula wa lu kete wakiwo kontola fumbi utsha lu Babilona lu anya andi,

⁸ku vo wakayi la Mizipa le Ngedaliya. Vo ane: Ishamele, onʼa Netaniya, Johanana la Jonatana, ana wa Karea, Seraya, onʼa Tanihumeta, ana wa Efai, usi Netofa, la Jezaniya, onʼa usi Makata, vo la antu awo.

⁹Ngedaliya, onʼa Ahikame, onʼa Shafana, akatshibela vo la antu awo ati: Tanyukaki woma dia ndjala lʼokongo wʼasi Kaladiya. Nyudjase lu kete, nyuyali ekambi wa khumʼekanga ka Babilona, ku nyu nyayuhumo lukulu lʼolo.[75]

¹⁰Nyuki, dimi layudjase la Mizipa, dia memalaka la ntundu kʼasi Kaladiya wayuyakaka le su. Keli nyu kanyumulaki ashi wʼelua kanyumbaki elua wʼowo, kanyuhinaki iso, kanyuwembaki. Nyutshu, nyu-tudjase lu esumba anyu wakanyakundja.

¹¹Lamʼakuki asi Juda tshe waki lu kete ya Moaba, laka asi Amona, lu kete va lome, ndu lu kete tshe lukumu vati: Khumʼekanga ka Babilona akakimo atshikadi wa Juda, akawadjela Ngedaliya, onʼa Ahikame, onʼa Shafana umbuledi,

¹²asi Juda tshe wakakalula uma lʼahuli tshe wakawatshanyema, wakatshu lu kete ya Juda utsha la Mizipa le Ngedaliya. Ku vo wakatamula ashi wʼelua, ndu wakatumba elua wʼowo efula.

¹³Johanana, onʼa Karea, la elombodi wʼalimbi waki lʼesui, wakatshu la Mizipa le Ngedaliya.

¹⁴Vo wakatuwumbula vati: We mbeyaka wati: Balisi, khumʼekanga kʼasi Amona, akatumi Ishamele, onʼa Netaniya, dia ndjukudiaka? Keli Ngedaliya, onʼa Ahikame, kumbaetawo.

¹⁵Johanana, onʼa Karea, akatela Ngedaliya lu usheshe la Mizipa ati: Lambuko-sengasenga nti: Etawo dimi ntshu, ntudiaki Ishamele, onʼa Netaniya. Nduku untu layeya dikambu. Okoko wana wukukindi nkutshikia andja, la dia asi Juda tshe wambumota le ye mpandjo la atshikadi wa Juda nshila?

¹⁶Keli Ngedaliya, onʼa Ahikame, akatela Johanana, onʼa Karea, ati: Tutshaki dikambu so. Diui diutshiye lu dikambu dia Ishamele dieko kashi.