Read tetala Jeremiya 41 Bible Online

Jeremiya 41 - tetala bible

Jeremiya 41

¹Lu ngondo kʼesambeli, Ishamele, onʼa Netaniya, onʼa Elishama, a lu diuhu dia khumʼekanga, akatshu ndi la dihangamendi dia khumʼekanga la apami dikumi la Mizipa le Ngedaliya, onʼa Ahikame. Vo wakatole ma kame la Mizipa.

²Ku Ishamele, onʼa Netaniya, akunela, ndi la antu dikumi waki la ndi, wakahiki Ngedaliya, onʼa Ahikama, onʼa Shafana, yombo, wakudiaki. Osoka mbakawadiaki one lakawadjela Khumʼekanga ka Babilona umbuledi wa kete.

³Ishamele akadiaki ndu asi Juda tshe waki kame la Ngedaliya la Mizipa, ndu alimbi wʼasi Kaladiya waki laawo lʼetena kako.[76]

⁴La wedi a pindju wa lushi lakandadiaki Ngedaliya, ntundu antu wateyi dikambu,

⁵antu akumi enanei wakayayakaka uma la Shekeme, Shilo, ndu uma la Samariya wakatanyisha ndedu, la ahondo betshi betshi, ndu wakatayakotshi puta. Vo wakayayakaka la elambu wa shima ndu malashi dia ndjukimo lu luudu la Latuyalaka.

⁶Ishamele, onʼa Netaniya akatumbi uma la Mizipa dia ntalungula. Ndi akatatshokaka ataleli. Lamʼakandahumana la wo, ndi akawatela ati: Nyuyeti utsha le Ngedaliya, onʼa Ahikame.

⁷Lamʼakawakumi lʼatei wʼusumba, Ishamele, onʼa Netaniya, la antu waki la ndi wakadiaki, wakatuwakadja lu difuku.

⁸Keli antu dikumi lʼatei awo wakatela Ishamele vati: Tutudiakaki, ne dia shu takumbi epunga wa menge ndu wa yelela, biso la usanga lu dikambo. Okone ndi akahandja, kumbadiaka kame la anengewo.

⁹Difuku diako diakakadjaka Ishamele edu wʼantu wakandadiakaka lasuki la udu wa Ngedaliya, diaki difuku diakatatshimi khumʼekanga Asa, ne dia woma wa Basha, khumʼekanga ka Isariyele. Ishamele, onʼa Netaniya, akadiludia too la edu wʼantu wakandadiaki.

¹⁰Ishamele akandi wane tshe wakatshikala la Mizipa: ana amantu wa khumʼekanga, wʼantu tshe wakatshikala leko, wakakimo Nebuzaradana, olombodi wʼalami le Ngedaliya, onʼa Ahikame. Ishamele, onʼa Netaniya, akatole lu fumbi, dia nteho la wo utsha lu wedi wʼasi Amona.

¹¹Lamʼakuki Johanana, onʼa Karea, la elombodi wʼalimbi tshe waki la ndi lukumu la kolo tshe kakatshi Ishamele, onʼa Netaniya,

¹²vo waketi apami tshe. Ku vo wakatshu dia ntolo la Ishamele, onʼa Netaniya. Vo wakatuwunda lʼumamu wʼashi a waki wa la Ngibiyona.

¹³Lamʼakenyi antu tshe waki la Ishamele Johanana, onʼa Karea, la elombodi wʼalimbi tshe waki la ndi, vo waki la ongenongeno.

¹⁴Okone antu tshe wakatole Ishamele fumbi utsha la Mizipa, wakakadimo, wakakalula, wakatshu le Johanana, onʼa Karea.

¹⁵Keli Ishamele, onʼa Netaniya, akayahandja uma le Johanana, ndi la antu enanei. Ku vo wakatshu utsha le asi Amona.

¹⁶Johanana, onʼa Karea, la elombodi andi tshe wʼalimbi waki kame la ndi, wakose atshikadi wa wudja, wakatshungula lu anya wa Ishamele, onʼa Netaniya, lakatatolaka uma la Mizipa, lʼokongo wa ndjaka Ngedaliya, onʼa Ahikame. Johanana akatukalula la alimbi, amantu, ana, la elenga uma la Ngibiyona.

¹⁷Vo wakakimela mbuka, wakatemala la luudu lʼangendangenda la Kimihame, lasuki la Betelehema, dia vo waki la kanyi ya ntsho utsha lʼEdjibitu,

¹⁸etali uma le asi Kaladiya. Vo wakawukaka woma, ne dia Ishamele, onʼa Netaniya akadiaki Ngedaliya, onʼa Ahikame, lakadji khumʼekanga ka Babilona umbuledi wa kete.