Read tetala Jeremiya 42 Bible Online

Jeremiya 42 - tetala bible

Jeremiya 42

¹Elombodi tshe wʼalimbi: Johanana, onʼa Karea; Azariya, onʼa Ho-shaya; lʼantu tshe a waki ndu wa tshitshe, wakatshu,

²wakatosengasenga umvutshi Jeremiya vati: Etawo esengosengo asu! Utoteketele le Latuyalaka, Unyashungu aye, lu dikambu dia wane tshe wambutshikala, ne dia taki efula, ku kakiane tambutshikala djui ya tshitshe, uku wenaye weme.

³Latuyalaka, Unyashungu aye, atenya mbuka kahumbasu ndjela, ndu uku abumbasu ntsha!

⁴Umvutshi Jeremiya akawatela ati: Dimi lambuka. Kakiane, dimi lambutsho dia molomba Latuyalaka, Unyashungu anyu, uku elombelo kanyu. Dimi layuyunyulimbitshiya akambu tshe wayunyukaluya Latuyalaka, halunyushe nduku diui.

⁵Vo wakatela Jeremiya vati: Latuyalaka ayali omenyi wa mete ndu wa kolamelu lu dikambu diasu, naka shu hatutsha kene kayukutuma Latuyalaka, Unyashungu aye, dia ndjututela.

⁶Shu tayukitanyia diui dia Latuyalaka, Unyashungu asu, lakutumasu le ndi, dia shu ndjala la ongenongeno lamʼayutukitanyia diui diandi.

⁷Lʼokongo wa nshi dikumi, diui dia Latuyalaka diakayi le Jeremiya.

⁸Ku Jeremiya aketi Johanana, onʼa Karea, elombodi wʼalimbi tshe waki kame la ndi, la antu tshe, wa tshitshe ndu wa waki.

⁹Ndi akawatela ati: Latuyalaka, Unyashungu wa Isariyele, lakanyatumi le ndi dia dimi tunyosengesengelandi, kata ati:

¹⁰Naka nyu nyayutshikala lu kete nye, dimi layunyushikike loko. Dimi halunyudiaka. Dimi layunyune, halunyu-nula, ne dia lambuyatshumuya dia kolo kakamanyutshela.

¹¹Tanyukaki khumʼekanga ka Babilona, lukanyu woma, woma. Tanyuwukaki woma, ne dia dimi leko kame la nyu dia nyushimbela ndu dia nyutshungula uma lʼanya andi, mbata Latuyalaka.

¹²Dimi layutunyukamia ketshi le ndi, ku ndi ayunyuka ote vuvu, ayunyukimo dia nyu ndala lu kete yanyu.

¹³Naka nyayuhedia diui dia Latuyalaka, Unyashungu anyu,

¹⁴ndu nyayuta nyati: Kema, shu hatutshikala lu kete nye, keli tayutsho utsha lu kete ya Edjibitu, lene ahatena ta, ahatuka dimama, ndu lene ahatuhumba ma, leko kayutudjase.

¹⁵Nyuki diui dia Latuyalaka, nyu atshikadi wa Juda! Latuyalaka Kanga lulimbilimbi, Unyashungu wa Isariyele, kata ati: Naka nyu nyayediya dundji dianyu dia ntsho utsha lʼEdjibitu, dia ntudjase leko,

¹⁶ku yombo yukanyu woma, yayutunyunda lu kete ya Edjibitu; ku ndjala ka kasha kukanyu woma, kayunyumamema wulu leko; ku nyayutuvo leko.

¹⁷Antu tshe wayediya dundji diawo utsha lʼEdjibitu dia ntudjase leko, wayutuvo la yombo, ndjala ka kasha, ndu la elandu. Nduku untu ayutshikala kana mpanda elanyelu kayumatumela.

¹⁸Latuyalaka Kanga lulimbilimbi, Unyashungu wa Isariyele, kata ati: Uku akatshulwama kele kami, la ududu ami le asi Jerusalema, osoku mbayutshulwama kele kami le nyu lamʼayunyukuma lʼEdjibitu. Ku nyu nyayutuyala engo ka mpongwela soi, engo ka nkashimo, engo ka mananu, engo ka dionyo. Nyu hanyuyena dihuli ne ntu.

¹⁹Nyu atshikadi wa Juda, Latuyalaka oso anyutela ati: Tanyutshokaki utsha lʼEdjibitu! Nyeyi nyati: Dimi lambuyala omenyi lu dikambu diako elo.

²⁰Nyu nyakayakesi, ne dia nyu nyakantumi le Latuyalaka, Unyashungu anyu, nyati: Ututolombele Latuyalaka, Unyashungu asu. Kuyututeli akambu tshe wayuta Latuyalaka, Unyashungu asu, ku shu tayatsha.

²¹Dimi lambunyutelawo elo. Keli nyu hanyukitanyia diui dia Latuyalaka, Unyashungu anyu, kuyanga lu diui otoi lu dikambu diakandantumi.

²²Okone nyeyi nyati: Nyayutuvo la yombo, ndjala ka kasha, ndu la elandu lu dihuli dialanganyu ntsho la ntudjase.