Read tetala Jeremiya 46 Bible Online

Jeremiya 46 - tetala bible

Jeremiya 46

¹Diui dia Latuyalaka diakayi le umvutshi Jeremiya lu dikambu dia wudja.

²Lu dikambu dia Edjibitu.[80] Lu dikambu diʼului wʼalimbi wa Farayo Neko, khumʼekanga ka Edjibitu, waki la Karakemishe, lʼumamu wa ndjali ka Eyufarate. Nebukadineza, khumʼekanga ka Babilona, akalembia alimbi ako lu eleku ka nei ka diulelu dia Joyakima, onʼa Josiya, khumʼekanga ka Juda:

³Nyolongosole dingawu dia tshitshe ndu dia waki, Nyutshu utsha lu ta!

⁴Nyu ambahemi wa falasa, Nyukeleki die lu ekongo wa falasa, nyahami! Nyemali, nyahe alembo anyu wa ta! Nyoketemole akonga anyu; nyolote eloto wa ta.

⁵Kakona kenami? Vo wambuka woma, wambukalula ekongokongo. Ahuka awo wambolembiama, wambulawo aha mbewo lʼokongo. Woma wa mamba weko lu beke tshe, mbata Latuyalaka.

⁶Kanga luwangu heya ndawo. Ndu ondoshi wa ta heya mpanda. Vo wamboselo, wamboko lu leke la ngelʼa kushi la ndjali ka Eyufarate.

⁷Akona one atetaka esadi uku Nile, Lukanga ashi ato watusutshasutshamaka uku tokoko?

⁸Edjibitu atetaka uku ashi wa Nile. Ashi watusutshasutshamaka uku tokoko. Vo watutaka vati: Dimi layumbela, layukumba kete. Dimi layulanya esumba la antu awo.

⁹Falasa li, nyuneli! Pusupusu li, nyungito! Andoshi wa ta watshu: Apami wʼuma lʼEtiyopiya ndu wʼuma la Puta, watukimelaka dingawu; Ndu wane wʼuma la Luda, watolemaka eta,

¹⁰Ne dia lushi loso, leli lushi la Khumadiondjo, Latuyalaka Kanga lulimbilimbi. Lushi loso, layuyala lushi la nsomboya, Layundosomboya atunyi andi. Yombo yayole antu, yayuluta, yayudjo la dikila diawo, Ne dia Khumadiondjo, Latuyalaka Kanga lulimbilimbi Ambulambula ulambu lu eke la ngelʼa kushi la ndjali ka Eyufarate.

¹¹We Edjibitu usekaseka wʼemuma, Utshu utsha la Ngiliyade, utose lodia. We atomotshaka ekanga womotshamotsha, we hokono.

¹²Wedja wambuka lukumu la sonyi kaye, La kete yambulula lʼalelu aye, Ne dia dembi diambukhumela dembi, Ku vo ahendi wamboko dingoma.

¹³Diui ne mbakatela Latuyalaka umvutshi Jeremiya lu dikambu dia etshwelu ka Nebukadineza, khumʼekanga ka Babilona, dia ntolembia kete ya Edjibitu:[81]

¹⁴Uti lukumu lu Edjibitu, utulusanya la Mingidole, Utulusanya lu Memifi ndu la Tapanehese! Nyemali, nyuyalongosole, Ne dia yombo yayudiaka antu lu etshimba anyu!

¹⁵Ukundi akatolama ditemolatemola dianyu? Dio kunshikikala ne dia Latuyalaka akaditshanya.

¹⁶Ndi ambutakanya ului a wuki wʼantu. Vo wamboko, wakamanela; wambutanela vati: Nyeso tukaluli le asikasu lu kete yakatuto, Etali uma le yombo yadiakana!

¹⁷Vo wambuhangohango leko vati: Farayo, khumʼekanga ka Edjibitu, eko paka lundju lutu. Ndi aketsha etena kandi wetshetsha.

¹⁸Uku wemi la lumu! mbata Khumʼekanga, Lukanga lukumbu lone: Latuyalaka Kanga lulimbilimbi ati: Nyuki, Uku eli Tabora lʼatei wʼekungu, Ndu uku eli Karamele lʼumamu wʼashi a waki, mbayuya motshi.

¹⁹We onʼa umuntu ludjashi lʼEdjibitu. Olongosole diango diaye dia ntsho utsha lu lohombo, Ne dia Memifi ayutshumbama, ayuyala tongo diaha la antu.

²⁰Edjibitu eli ngombe ka wadi ka dimena diahangone. Keli unanyishi lu ndjayi uma la ngelʼa kushi.

²¹Asi ulimu awo wa difutu weli lʼatei awo, Weko uku ana wa ngombe wununyi lu ekutu awo. Vo wakakadimo, wakalawo vo tshe kame, aha nshikikala, Ne dia lushi lawo lʼelanyelu lambukuka le wo, Etena kʼasui awo.

²²Lundju lʼEdjibitu leli uku luhelu lʼului, Ne dia atunyi awo wuyayi lʼalimbi dia ndjolosha, Wayakimedi tokenge uku akotshi wʼetamba.

²³Vo wayunyukula ukunda awo kuyanga vo weko pika. Vo wambuleka endjo efula, Efula kaheyama mbala, mbata Latuyalaka.

²⁴Edjibitu onʼa umuntu ayutshama sonyi. Ndi ayukimwama lu anya wʼantu uma lu leke la ngelʼa kushi.

²⁵Latuyalaka Kanga lulimbilimbi, Unyashungu wa Isariyele, kata ati: Nyendi, dimi lutsha nsuya Amona wa lu Tebese, Farayo, Edjibitu, kame la ditemolatemola diawo la khumi ya dikanga yawo, Farayo la waku tshe watuwekamaka.

²⁶Dimi layakimo lu anya a waku watuyangaka mbadiaka, lu anya wa Nebukadineza, khumʼekanga ka Babilona, ndu lʼanya wa ekambi andi. Ku lʼokongo diku, antu wayutudjase loko uku nshi ya ntundu, mbata Latuyalaka.

²⁷Keli we ukambi ami Jakoba, tukaki woma. We Isariyele, tateki asulu! Ne dia dimi layukushimbela uma lu kete yʼetali, Ndu tukanula taye uma lu kete yewo lu lohombo. Jakoba ayukalula, ayudjase ki la lutui tshitshi; Nduku layuwutsha woma.

²⁸Latuyalaka kata ati: We ukambi ami Jakoba, tukaki woma, Ne dia dimi leko laye. Dimi layushila wedja tshe lene akamakutshanya ushiki. Keli we, dimi halukushila ushiki. Dimi layukuhangwela la sambu kʼololo. Dimi halukutshika aha nkusuya.[82]