Read tetala Jeremiya 49 Bible Online

Jeremiya 49 - tetala bible

Jeremiya 49

¹Lu dikambu diʼasi Amona.[85] Latuyalaka kata okone ati: Undi, Isariyele kema la ana apami? Ndi kema la ukito uka? Ya ukundi ambuyala Milikome kanga Ngada, La antu andi wambudjase lu esumba andi?

²Nyuki, nshi yayuyala, Yayumutsha Raba kʼasi Amona lundju la ta. To kayuyala tuta diʼelanyelu, La ngelu ya lʼokongo awo yayutshumbama. Ku Isariyele wayulela waku wakawaulelaka, Mbata Latuyalaka.

³Yee, Heshibona, ndi tukuku, Ne dia Ai ambulanyema! Nyu ana amantu wa Raba, nyudi tukuku, Nyolote akutu, nyuleli, Nyuyandjiyandja lʼumamu wa peli dia lukumbu! Ne dia Milikome utsha ntolama lu fumbi, To ndu elombedi ato la ewandji ato.

⁴We ona umuntu kanga uhedia, okoko wana wayasemaye Lu dikambu dia ekidi aye wutsha nanyema? We latekamaka engonyi aye wati: Akona ayuya dia ndjolo la mi?

⁵Nyendi, dimi lutsha nyutumela woma a wuki, Mbata Khumadiondjo, Latuyalaka Kanga lulimbilimbi. Vo wayuya uma le waku tshe weli lʼutshimba anyu, Nyu nyayutshanyema nyu tshe, nduku layusanganya andawi.

⁶Keli lʼokongo diku, dimi layukaluya asi Amona Wakatolama lu fumbi, mbata Latuyalaka.

⁷Lu dikambu dia Edome.[86] Latuyalaka Kanga lulimbilimbi, kambula ati: Undi, yimba kema ntu lu Temana? Elanyelu kʼakanga a tutshundju kakashisho, Ewu kawo kambushila uka?

⁸Nyu asi Dedana, nyukadimo, Nyulawo, nyutushami lu minga! Dimi lutsha mbela elanyelu le Esau, Etena kʼelanyelu kandi.

⁹Naka akohodi wʼelua wambuya lakaye, Undi, vo hawutshika elua emotshi? Naka evi wambuya lʼutshu, Vo hawose paka etenyi kukukiwo mbosa uka?

¹⁰Keli dimi lambokosola Esau kene keli la ndi, Lambukumbula ahuli andi watundushamaka; ndi heyi ndjashe. Anʼandi, anangu, la anyandi wayudiakema; ndu ndi henama ntu.

¹¹Utshiki anʼaye wa ditshiki. Dimi layalumbia. Wadi waki edu aye wekami le mi.

¹²Latuyalaka kata ati: Enda, wane wahahumbi no dikoho wayudino, ku we mbeyaka ntshikala aha nsuyama uka? We hutshikala aha nsuyama. Mete we ayudino.

¹³Dimi lambuyatshiba dime nti: Bozera ayuyala engo ka nkashimo, engo ka dionyo, engo kʼanyanya la engo ka mananu. Esumba tshe weli lʼokongo awo wayuyala etongo atu, mbata Latuyalaka.

¹⁴Dimi lakuki lukumu uma le Latuyalaka. Ndi akatumela wedja tshe dikendji ati: Nyuyasanganya kame, nyuneli utsha lu ta, nyutolosha.

¹⁵Uki, dimi lutsha nkete tshitshe lʼatei a wedja, Omonywama lʼatei wʼantu.

¹⁶Lukanyi laye la utaku wʼutema aye wamoukukesa, We ludjashi lʼatei a weuku wʼave, Latahemaka lu ote wa dikuna. Kuyanga we ayututsha kefu kaye etali ka hwa uku ka pungu, Dimi layukuhatula uma leko, mbata Latuyalaka.

¹⁷Edome ayuyala engo ka nkashimo. Untu tshe layeta laawo, ayukashimoka, ayutshodiaka ne dia asui awo tshe.

¹⁸Vo wayuyala uku elanyelu ka Sodoma la Ngomora, la esumba waki lasuki la wo.[87] Nduku untu ayuyala loko, mbata Latuyalaka.

¹⁹Nyuki, atunyi awo wayutumba uma lʼukunda wa la Jorodana uku Umbwe katatshu utsha lʼukutu a wulu wʼekoko. Ku dimi layuwatshanya shastumuya uma lʼEdome. Dimi layukitsha one layumosonola ladiku diandi. Akona edimi la mi? Akona ayonsonwela etena? Ulami wʼekoko akona ayemala la ntundu kami?

²⁰Uma lu dikambu so, nyulungi tukanyi ta Latuyalaka tambundukana lu dikambu dia Edome, ndu sangweyu diambundusanguya lu dikambu diʼasi Temana ati: Vo wayakutula ushidi uku ana wʼekoko, wayulanya edjaselu kawo.

²¹Kete yambudidima la lundju lʼekwelo kawo. Tukuku tawo tambukema pulu ndu lʼUduwa a Tilili.

²²Nyuki, utunyi ayuya uku pungu kayafumbo, ayasimbi ahafu andi dia ndosha Bozera. Lushi lako, etema wʼahuka wa Edome wayuyala uku utema wa umuntu latata lono.

²³Lu dikambu dia Damaseke.[88] Hamata la Arapada wambukanana, Ne dia vo wambuka kumu ya kolo. Vo wambusaka lukumba; Watusukasukaka uku ashi a waki, haweyi nembohala.

²⁴Damaseke ambokomo, ambukadimo dia ndawo, Ndi ambundama la lukumba. Sasi la lunyangu wambuwunda, uku umuntu latata lono.

²⁵Ndi wuhu wambukalema usumba wa lukumu, Usumba wʼongenongeno li!

²⁶Uma lu dikambu so, mbayoko elongo awo wʼapami lu esese, Ndu mbayuvo alimbi awo tshe lushi lako, Mbata Latuyalaka Kanga lulimbilimbi.

²⁷Dimi layohetsha dja lu peli dia Damaseke. Yo yayutshumba mvudu ya khumʼekanga Bene-Hadada.

²⁸Lu dikambu dia Kedara la waulelu wa Hazora, wakalembia Nebukadineza, khumʼekanga ka Babilona. Latuyalaka kata okone ati: Nyuneli, nyutshu utsha la Kedara. Nyutudiaki antu wa lu leke lʼEhutwelu.

²⁹Antu wayutohotola mvudu yawo yʼapema la dungalunga diawo, Wayutosa apema awo, diango diawo tshe, la kamelo yawo. Vo wayutahangohangwela lu beke tshe dia mbautsha woma.

³⁰Nyu asi Hazora, nyulawo, nyudiangani etali. Nyutushami lu minga, Ne dia Nebukadineza, khumʼekanga ka Babilona, Eko la kanyi ya nyutshela kolo, Ambusanguya nyolosha, mbata Latuyalaka.

³¹Nyuneli, nyutshu la ntolosha wudja wuyalaledi, weli la ki Ndu la lutui tshitshi, waha la kuki kuyanga tukingiti, Mbata Latuyalaka.

³²Kamelo yawo yayumbama, La nyimba yawo ya dungalunga yayuyala diango dia dimbu. Dimi layuhandjula waku watunyaka avu aketo Lu beke tshe dia kete. Dimi layuwaela elanyelu uma lʼetshimba awo tshe, Mbata Latuyalaka.

³³Hazora ayuyala edjaselu ka wambulu, tongo pundju. Nduku untu ayudjase leko, nduku untu ayulala leko.

³⁴Diui dia Latuyalaka diakayi le umvutshi Jeremiya lʼetatelu ka diulelu dia Zedekiya, khumʼekanga ka Juda, lu dikambu dia Elame, ati:

³⁵Latuyalaka Kanga lulimbilimbi kata ati: Nyendi, dimi lutsha mbokola uta wa Elame, engo kawo kuleki wulu.

³⁶Dimi layutumela Elame pepe nyei uma la kuma nyei yʼulungu. Dimi layahandjula la pepe sho tshe. Nduku wudja wayuyala, wahukuma andawi wʼuma lʼElame.

³⁷Dimi layusakia asi Elame lukumba la ntundu kʼatunyi awo, la ntundu ka waku watuyangaka mbadiaka. Dimi layuwaela elanyelu, kele kami ka wulu. Dimi layayela la yombo, edja ndu lamʼayumashila ushiki, mbata Latuyalaka.

³⁸Dimi layushikike kiti kami ka diulelu lu Elame. Dimi layudiaka khumʼekanga la ewandji wa leko, mbata Latuyalaka.

³⁹Keli lu nshi yayayi, dimi layukaluya asi Elame wakatolama lu fumbi, mbata Latuyalaka.