Read tetala Jeremiya 5 Bible Online

Jeremiya 5 - tetala bible

Jeremiya 5

¹Nyukinduli lu esese wa Jerusalema, Nyendi, nyeyi, nyuyangi lu ahuli wa hwe, Kana nyayutana untu omotshi latutshaka ololo latekamaka lu mete, Ku dimi lay udimanyia Jerusalema.

²Kuyanga vo watutshibaka vati: Uku eli Latuyalaka la lumu! Mete, anyanya mbatuwutshibaka.

³Latuyalaka li, ashu aye hawutenaka mete? We akasuya, keli vo kunyanga. We akalanya, keli vo wakatuni wetshelu. Vo wakakikitsha dundji diawo wulu uleki dive Wakatuni nkadimula etema.

⁴Dimi lakati nti: Mete, asi wula mbewo, Akanga a dinginya. Vo haweyi mbuka ka Latuyalaka, kuyanga elembe wa Unyashungu awo.

⁵Dimi layutsho le antu a waki, layutoteketa la wo, Ne dia vo mbeyaka mbuka ka Latuyalaka la elembe a Unyashungu awo. Keli ndu vo tshe wakawediawedia lokoho, Wakahimbula ekodi.

⁶Diako mbayadiaka tambwe ka lʼukunda, Mbayalanya laundu la lʼusui wa shenga, Mbayahulanela koi lu esumba awo. Wane tshe wayutumba uma loko, wayundama, Ne dia diakelu diawo diʼelembe diaya efula, La ehedia awo wambufulanela.

⁷Ukundi eyami nkudimanyia? Anʼaye wakanseke, wakatshibela ditemolatemola. Lamʼakamaksha, vo wakaluti, wakayakimo lu akambu wa luseka, Wakamote elui lu mvudu yʼamantu akanga a munanyi.

⁸Vo weko uku falasa yambuluta, yatetetaka weteteta; Vo tshe untu lʼuntu atokomiyaka wadi a unyandi.

⁹Undi, dimi haluwalumbuya lu akambu ane? Dimi halosombweya utema ami wuhu one wa wudja? Mbambula Latuyalaka.

¹⁰Nyumbeli lu peli dia kumbu ya Isariyele la Juda. Nyudinyukuli, keli tanyulanyaki tshe tshe. Nyuhimbuli tahi yʼekodi yawo ya vinyo, Ne dia yo kema ya Latuyalaka,

¹¹Ne dia khumbu ka Isariyele la khumbu ka Juda wakampedia efula, Mbata Latuyalaka.

¹²Vo wakangunela Latuyalaka vati: Ndi hutsha nduku dikambu! Elanyelu huya le su. Shu hatena yombo kuyanga ndjala ka kasha.

¹³Amvutshi weko paka lopepe. Nduku latuwatelaka aui. Osoku mbayuwatshela.

¹⁴Diako mbata Latuyalaka, Unyashungu Kanga lulimbilimbi, okone ati: Ne dia wudja aye wakati osoku, dimi layete aui ami lʼunyo aye uku dja, La wudja one uku kunyi, ku dio diayatshumba.

¹⁵Ulungi, we wudja wa Isariyele, Dimi lutsha mbela wudja wʼuma lʼetali dia ndjunyolosha, mbata Latuyalaka. Vo weli wudja a wulu, wuija wʼedjedja, Wudja wahanyeyi oteketa awo, kuyanga mana aui awo fundu.

¹⁶Ukulu awo wa pitu weko uku diumbu dia hwe, Vo tshe ahuka mbewo.

¹⁷Vo wayumana dinela dianyu, la mbu yanyu ya nde. Vo wayumana anʼanyu wʼapami la wʼamantu. Vo wayumana dungalunga dianyu la ngombe yanyu. Vo wayumana vinyo yanyu la fingu yanyu. Vo wayulanya esumba anyu a wulu, watunyekamaka la tombo.

¹⁸Keli lu nshi sho, dimi halunyulanya tshe tshe, mbata Latuyalaka.

¹⁹Lamʼayumbula wudja aye vati: Dikambu kuna diambututshela Latuyalaka, Unyashungu asu, akambu ane tshe? Kakaluya diui wati: Uku akanyaseke Latuyalaka dia ntemola ditemolatemola diʼasi wedja lu kete yanyu, osoku mbayunyuyala lʼokongo wʼasi wedja, lu kete yaha yanyu.

²⁰Nyuti lukumu lone le khumbu ka Jakoba, Nyulusanya lu Juda; nyuwateli nyati:

²¹Nyulungi dikambu ne, nyu wudja wa dinginya, nyaha la ewu. Nyu nyeko la ashu, keli hariyenyi; nyu nyeko la atui, keli hanyuki.[6]

²²Undi, nyu hanyumbuki woma? Hanyudidima la ntundu kami? mbata Latuyalaka. Dimi ako kakadjela ashi a waki lokongo uku ulelu, Lukumbu la pundju, lahaweyi ndekana. Kuyanga asukhu awo watusukasukaka, vo haweyi lolembia. Kuyanga vo watudikitaka, vo haweyi lulekana.[7]

²³Keli wudja one weko la etema wulu la uhindudi; Vo wakantombokwela, wakatshu.

²⁴Vo hawututaka lʼetema awo vati: Tuki Latuyalaka, Unyashungu asu, woma. Ako latoloshaka mvula kʼalohoki la ka ndjihelu lu etena kayo, Latutushikikelaka bingu ya dinela lu tena diayo.

²⁵Ehedia anyu mbakanyetwela akambu ane, La kolo yanyu mbakanyuhumbia ololo one.

²⁶Antu wa kolo wambutanema lʼatei a wudja ami. Vo watotongaka uku umambi a fudu kamba tulunga. Vo watambaka otei, watundaka antu.

²⁷Uku atululaka lusasa too la fudu, Mbatululaka mvudu yawo too la lukesu. Diako mbatuwuyalaka antu a waki ndu engonyi.

²⁸Vo watununaka, watuyalaka la alimba wa lonyengo. Vo watutshaka kolo ndeka yediko. Vo hawutoteketelaka ana wa ditshiki dia vo mpumo lukulu lʼolo. Vo hawutusambwelaka ehumbi la sambu kʼololo.

²⁹Undi, dimi halasuya ne dia akambu aso? Dimi hasombweya utema ami le wudja wa wuhu oso? Mbata Latuyalaka.

³⁰Akambu wa mamba wa wononyi wambutshama lu kete.

³¹Amvutshi watutaka kashi lu akambu wahatayi. Elombedi watulelaka antu uku alangawo. Ku wudja ami watongenangenaka akambu aso. Lʼekumelu kʼakambu ako, kayunyutsha na?