Read tetala Jeremiya 7 Bible Online

Jeremiya 7 - tetala bible

Jeremiya 7

¹Diui diakayi uma le Latuyalaka le Jeremiya ati:

²Utemali la suku dia luudu la Latuyalaka. Ututi diui ne leko wati: Nyuki diui dia Latuyalaka, nyu asi Juda tshe watotoka lu asuku andi dia mbotemola.

³Latuyalaka Kanga lulimbilimbi, Unyashungu wa Isariyele, kata ati: Nyolongosole akambu anyu la etsha anyu, ku dimi layetawo nyu mbidjase lu dihuli ne.

⁴Tanyekamaki aui ane wa lukesu nyati: Etemwelo ka Latuyalaka kene, etemwelo ka Latuyalaka kene, etemwelo ka Latuyalaka kene!

⁵Naka nyu nyayolongosola akambu anyu la etsha anyu tshe, naka nyu nyayusambula untu la unyandi ololo,

⁶naka nyu hanyengiya ongendangenda, ona etshiki, wadi aki udu; naka nyu hanyutshulula dikila diʼuntu laha la unungu lu dihuli ne, ndu naka nyu hanyuyeli dite-molatemola dia ndjatungela elanyelu,

⁷ku dimi layetawo nyu mbidjase lu dihuli ne, lu kete yakamasha washenyu edjedja pundju pundju.

⁸Nyulungi, nyu nyatekamaka aui wa lukesu waheyi nyukimanyia.

⁹Undi, nyu nyayuvaka, nyayudiakaka antu, nyayunanaka luseka, nyayutshibaka utshibatshiba, nyayutshumbelaka Bala malashi, nyayuyelaka ditemolatemola diahanyeye?

¹⁰Ku nyu ndjemalaka la ntundu kami, lu luudu lone, latuwetaka lukumbu lami la mvuta nyati: Shu tambutshungo! Dia nyu ntetemalaka ntsha akambu ane tshe wa wononyi?

¹¹Undi, luudu lone latuwetaka lu lukumbu lami, lambuyala edjaselu ka evi[11] lu ashu anyu? Enda, dimi dime latenaka, mbata Latuyalaka.

¹²Nyutshu kakiane utsha la Shilo, lu dihuli diakamashikike lukumbu lami ntundu. Nyutendi uku akamaditshela, ne dia kolo ka wudja ami Isariyele.

¹³Nyulungi, lamʼakanyatshi akambu ane tshe, dimi lakakolamelaka nteketa la nyu, keli nyu kumbukelami. Dimi lakanyetaka, keli nyu kumbetawo, mbata Latuyalaka.

¹⁴Diako mbayumutshela luudu latuwetaka lukumbu lami, latunyekamaka, ndu dihuli diakamanyusha nyu la washenyu, wuhu wakamatshela Shilo.[12]

¹⁵Dimi layunyutshanya uma la ntundu kami, uku akamatshanya anengenyu tshe, tukanula tshe ta Efarayima.

¹⁶Okone tolombelaki wudja one, tediaki diui dia mbalelela, kana mbasengesengela, kuyanga mbateketela la ntundu kami, ne dia dimi halukukela.

¹⁷Undi, we henyi akambu watuwutshaka lu esumba wa Juda ndu lʼesese wa Jerusalema?

¹⁸Ana watunaka kunyi, washewo wato-ngonyaka dja, amantu watosohanyaka shima dia nkatela khumʼekanga ka umuntu ka lʼulungu ekati, ndu dia ntshulwela ditemolatemola elambu awo wa lutela, dia mbutshami kele.

¹⁹Undi, dimi kutshawo kele, aha vame lu ufutanu awo, mbata Latuyalaka?

²⁰Diako mbata Khumadiondjo Latuyalaka okone ati: Nyulungi, kele kami la ududu ami wayutshulo lu dihuli ne, ladiku diʼantu, ladiku dia nyama, ladiku diʼetamba wa lu dikambo, ndu ladiku diʼelua wa la kete. To kayoheta, haweyi nkidima.

²¹Latuyalaka Kanga lulimbilimbi kata ati: Nyahe elambu anyu wa lutshumba la diku diʼelambu anyu, nyuli emunyi awo.

²²Ne dia lu lushi lakamatundja washenyu uma lu kete yʼEdjibitu, dimi konteketi la wo, kuyanga mbadjela olembe lu dikambu diʼelambu, kana elambu wa lutshumba.

²³Keli dikambu ne mbakamawadjangela nti: Nyulungaki aui ami, ku dimi layuyala Unyashungu anyu, la nyu nyayuyaia wudja ami. Nyokendakendaki lu mbuka tshe yamumunyenya, ku nyu nyayuhumo lukulu lʼolo.

²⁴Vo kununga, kumpuke atui. Vo wakakendakenda lu tukanyi tawo ndu lu saki yʼetema awo wa kolo, wakakalula ekongokongo, kuntsho utsha la ntundu.

²⁵Umaka lushi lakatumbi washenyu uma lu kete ya Edjibitu edja ndu elo, dimi lakakolamelaka mbatumela ekambi ami tshe, amvutshi.

²⁶Keli vo kunungakumpuke atui, wakayala la ete wulu. Vo wakaleki washewo ntsha kolo.

²⁷Kuyanga we ayuwatela aui ane tshe, hawukukela; kuyanga we ayuwaeta, vo hawuketawo.

²⁸Kuwateli wati: Onʼeli wudja wahalungi aui wa Latuyalaka, Unyashungu awo, wahalangi mbuka wetshelu; mete kambushisho, to kambumo uma lʼenyo awo.

²⁹Nyunya avu anyu, kanyuwakadja. Nyutudi tukuku lu ahuli wa ladiku, Ne dia Latuyalaka akaseke, akatuni lolonga lambuwutsha kele.

³⁰Asi Juda wakatshaka kene kaki kolo lu ashu ami, mbata Latuyalaka. Vo wakakitsha diango diawo dia wononyi lu luudu latuwetaka lukumbu lami, La dio lulanya.

³¹Vo wakatshi alunga la Tofeta, lʼukidi wa onʼa Hinome,[13] dia ntshumba anʼawo wapami la anʼawo wʼamantu lu dja:[14] dikambu diakimi kumbadjangela ndu diaki kundjala lu tukanyi tami.

³²Okone nyulungi, nshi yayuyala, yahaweta ahuli a, ntu vati: Tofeta la ukidi w onʼa Hinome. Keli wayuwaeta vati: Ukidi wʼediakelu, ne dia wayukhunde edu la Tofeta edja ndu nduku hyuli ntu.

³³Edu wʼantu ane wayuyala ma dia fudu ya lʼulungu la nyama ya la kete, ku nduku untu layuyitshanya.

³⁴Ku dimi layukumiya ongenongeno, ongenongeno a wuki, kimbu yʼutshuki la kimbu yʼutshukami[15] lu esumba wa Juda ndu lʼesese wa la Jerusalema, ne dia kete yayuyala elanyelu ketu.