Read tetala Jeremiya 8 Bible Online

Jeremiya 8 - tetala bible

Jeremiya 8

¹Lu etena keso, vo wayutundja weka wa khumi ya dikanga ya Juda, weka wa ewandji awo, weka wa elombedi, weka wa amvutshi ndu weka wʼasi Jerusalema uma lu waumbu awo.

²Vo wayuwekitsha kalakala la ntundu ka unya, ka ngondo, ndu ka ului tshe wa lʼulungu, wakawukaka ngandji, wakawekamaka, wakawayelaka, wakawayangaka, ndu wa-kawatemolaka. Vo hawusanganyema kuyanga nkhundema. Vo wayuyala uku tumi ladiku dia kete.

³Wane wayutshikala uma lu diuhu ne dia kolo lu ahuli tshe wakamawatshanya, wayukumbula nyoi uleki lumu, mbata Latuyalaka Kanga lulimbilimbi.

⁴Kuwateli ntu wati: Latuyalaka kata ati: Lamʼamboko antu, vo haweto ntu? Naka untu ambetola, ndi hakalula uka?

⁵Ku dikambu kuna diatokolamelaka wudja one nkalula ekongokongo? Vo watushikikalaka lu lukesu, hawetawo nkalula.

⁶Dimi lakahukama, lakalungi, Keli vo kumvuta aui wʼusimbwi. Nduku untu akayatshumuya ne dia kolo kandi, Ata ati: Ukundi akamatshi okone? Vo tshe untu lʼuntu atukadimoka utsha lu mbuka kandi, Uku atukhungusoka falasa utsha lu ta.

⁷Yemema ya lʼulungu mbeyaka tena diayo; Yembi, djedi, la omboko mbeyaka tena diawo dia ndja. Keli wudja ami haweyi elembe ami, dimi Latuyalaka.

⁸Ukundi eyanyu mvuta nyati: Shu teko la tumba, La elembe wa Latuyalaka weko la su? Keli, nyendi, afundji wakafundi ufundafunda, dia mbete elembe ami kashi.

⁹Asi yimba wambutshama sonyi, wambukanana, wambundama. Nyulungi, vo wambutuna diui dia Latuyalaka, Na wuhu wa yimba yeli la wo?

¹⁰Diako mbayumukimo wadiewo le akina, La dikambo diawo le waku wayalunga, Ne dia vo tshe, one luleki tshitshe ndu luleki wuki, Wambuyala akanga a lukaki. Ndu umvutshi ndu olombedi, vo tshe watutshaka akambu wa lukesu.

¹¹Vo watombaka puta ya wudja ami yema tshitshe. Ku vo mvuta vati: Ambushila, ambushila, ku to katashili![16]

¹²Vo wakuki sonyi lamʼakawatshi akambu wa wononyi? Kema, vo konombo, kumbuka sonyi nduku yema. Diako mbajuwoko lʼatei a waku watokokaka. Vo wayolemba lamʼayumasuya, mbata Latuyalaka.[17]

¹³Dimi layashila ushiki, mbata Latuyalaka. Ekodi wa vinyo hawoto elua ntu, kuyanga etamba wa fingu nto fingu. Akatshi wayolengela, la diango diakamawasha diayumo uma le wo.

¹⁴Okoko wana wadjasesu udjasedjase? Nyusangani tutshu utsha lʼesumba wudingami kumbu, Tutuvu leko; ne dia Latuyalali, Unyashungu asu, kambutukimo dia shu mvo. Ndi akatonosha ashi wa lolengo, Ne dia shu takutshela kolo.

¹⁵Shu takalungamela ki, keli nduku dikambu diʼololo diakayi. Shu takalungamela okonwelo, keli woma a mamba wakayi.

¹⁶Awanelu wa falasa yawo wambukema uma la Dane, Kete tshe yambudidima la lundju lʼawanelu ka waumi wa falasa. Andoshi wa ta wambuya, wambolembia kete la diango tshe dieli loko, Usumba la waku wudjashi loko.

¹⁷Nyulungi, dimi luyanga ntuma elui la kanga lʼatei anyu yaheyi akanga wʼaloho nembohaya. Yo yayunyulumata, mbata Latuyalaka.

¹⁸Dimi lambukumbula okei ami nshila. Utema ami ambokomo.

¹⁹Nyuki delu dia ona umuntu a wudja ami, Uma lu kuma ya kete ati: Undi, Latuyalaka, kema lu Siona? Khumʼekanga kawo kema lʼatei awo? Okoko wana wakawambutsha kele La ditemolatemola diawo dia losela, la dia dikishi diʼasi wedja?

²⁰Diye diambeta, dinela diambushila, Keli shu tatashimbamela.

²¹Lambusuwa ne dia puta kʼona umuntu a wudja ami. Dimi leko la lunyangu, woma a mamba wambumunda.

²²Undi, diombo kema la Ngiliyade, wetshi kema leko uka? Ku ya ukundi aki konkono ona umuntu a wudja ami?