Read tetala Jeremiya 9 Bible Online

Jeremiya 9 - tetala bible

Jeremiya 9

¹Utunduyala ote ami waluli too lʼashi, La ashu ami wayali teko diʼasoi, Tshiki dimi lutulelaka andjakemi wʼona umuntu a wudja ami Ndu la yanyi ndu lʼutshu.

²Dimi lambukumbula luudu lʼamengodi lʼusui wa shenga, Dia dimi ntshika wudja ami, la mangana la wo etali, Ne dia vo tshe weli akanga a luseka, Ului wʼakanga a lukesu.

³Vo watukutulaka nimi yawo uku eta dia mbuka kashi; Aha uma lu mete kambuwuyala la wulu lu kete. Vo watutshokaka uma lu kolo utsha lu kolo, Hawumbeyi, mbata Latuyalaka.

⁴Nyu tshe untu lʼuntu ewo unyandi, Ndu untu lʼuntu tekamaki onangu, Ne dia onangu ayukesaka, la ongenyi ayumamanyiya unyandi.

⁵Vo tshe wayukesanaka, hawuti a kambu wa mete. Vo watekiyaka nimi yawo dia mvuta kashi, Watuyatshutshiyaka dia ntsha kolo.

⁶Edjaselu kaye keko lʼatei a lukesu. Uma lu lukesu lawo, mbatuwutunaka mbeyami, mbata Latuyalaka.

⁷Okone Latuyalaka Kanga lulimbilimbi kata ati: Enda, layaedika, layahimba. Na dikambu dikina dieyami ntsha dikambu dia wudja ami?

⁸Nimi yawo yeli akuwa wa lolengo. Vo watoteketaka akambu wa lukesu. Vo watoteketaka aui wʼololo lʼasukanyi awo, Keli lu etema awo, vo watambaka tulunga.

⁹Undi, dimi haluwalumbuya lu akambu aso? Dimi halosombweya utema ami wuhu one wa wudja? Mbata Latuyalaka.

¹⁰Dimi layulela, layuda tukuku dikambu diʼekungu, Layuyandjayandja la delu lu dikambu diʼusui wa shenga, Ne dia vo wambulungula; nduku untu leta leko. Nduku lawi la ngombe lukema; Fudu ya lʼulungu la nyama yakalawo, yakamo leko.

¹¹Dimi layete Jerusalema tuta diʼelanyelu, edjaselu ka wambulu. Dimi layete esumba wa Juda atongo atu, waha lʼantu.

¹²Untu akona eli kanga yimba lukuki nimbitela dikambu ne? One lakatela Latuyalaka, adisanya. Okoko wana wambulanyema kete, wambuyutshumbama uku usui wa shenga, lene ahatetaka untu?

¹³Latuyalaka kata ati: Vo wakaseke elembe ami, wakamakitsha la ntundu kawo. Vo kumbetawo aui ami kuyanga nkendakenda loko.

¹⁴Keli vo wakayelaka saki yʼetema awo, ndu wakayelaka Wa-Bala uku akawaetshaka washewo.

¹⁵Diako mbayumulesha wudja one kundju, mbayumanosha ashi wa lolengo, mbata Latuyalaka, Unyashungu wa Isariyele, Kanga lulimbilimbi.

¹⁶Ndu dimi layadianganya lʼatei a wedja waki washewo kumbeya, layutuma yombo lʼokongo awo edja ndu lamʼayumashila ushiki.

¹⁷Latuyalaka Kanga lulimbilimbi kata ati: Nyuki, nyeti amantu watulelanaka, vo wayi! Nyutumi diui dia nteta amantu, akanga a ngengu, keli wayi!

¹⁸Wasamanya, wayututshimeli djuwa, Dia ashu asu nkedia asoi, Dia toki yasu mbasedia!

¹⁹Ne dia tukuku tʼalelu tambukema uma le Siona. Yee! tambushila, tambukumbama la sonyi, Ne dia shu takaseke kete, ndu ne dia vo wakalanya mvudu yasu!

²⁰Nyu amantu, nyuki diui dia Latuyalaka, Nyuhuke atui lu aui watandi, Nyetsha anʼanyu wʼamantu kimbu yʼutanda. Nyu tshe untu lʼuntu etsha unyandi djuwa,

²¹Ne dia nyoi kambumbela lu adidishi asu. To kambuyoto lu mvudu yasu ya khumʼekanga. To katushilaka akenda lu aseke, la elongo wʼapami lu esese.

²²Uti wati: Latuyalaka kata okone ati: Edu wʼantu wayukalema uku tumi lʼusui, Uku washa lʼokongo wʼumunyi, ku nduku layatongona.

²³Latuyalaka kata ati: Kanga yimba tayasemaki dia yimba yandi. Kanga khudu tayasemaki dia khudu kandi. Kanga ongonyi tayasemaki ne dia ongonyi andi.

²⁴Keli one lalanga ndjasema, ayaseme dia ndjala la ewu la dia nimbitelami,[18] dia mbeya ati: Dimi keli Latuyalaka. Dimi leli Latuyalaka, latutshaka akambu wa mamba, sambu kʼololo la akambu wʼusi-mbwi lu kete, ne dia lu akambu ako mbatumongenangenaka, mbata Latuyalaka.

²⁵Enda, nshi yayuyala, yayumusuya waku tshe wakahema uhekeli, waki kundjakidia lʼutema, mbata Latuyalaka.

²⁶Edjibitu, Juda, Edome, asi Amona, la Moaba, la waku wudjashi lʼusui wa shenga, watunyaka avu awo aketo, la antu tshe uma lu khumbu ka Isariyele wahayakidia lʼutema.