Read tetala Delu dia Jeremiya 1 Bible Online

Delu dia Jeremiya 1 - tetala bible

Delu dia Jeremiya 1

¹Ndi wuhu wambutshikala Jerusalema hwe, Wambutshikala usumba one waki too lʼantu li! Ndi wuhu wambuwuyala uku wadi aki udu, Wambuyala usumba one waki wuki lʼatei a wedja li! Usumba waki uwandji lʼatei wʼesumba, Wambuyala lʼokongo wʼekina!

²Usumba watulelaka wulu lʼutshu; Atama awo watukumbamaka lʼasoi. Lʼatei wʼelangimi awo, nduku lusamba. Engenyi awo tshe wakukesi; Vo wambuyala atunyi awo.

³Juda ambotolama lu fumbi, Lʼatei wʼasui ndu wa shoko ya wulu. Vo wambudjase lʼatei a wedja, Keli vo kema la mumuya nduku yema. Wane watusuyaka, wambuwunda lamʼewo la sasi.

⁴Mbuka yʼutsha la Siona yeko lʼutanda, Ne dia antu hawuyeteta loko utsha lu alambu. Asuku ayo hawuyoto antu; Elombedi ayo wusekhuma lʼalelu; Esekaseka ayo wambusuyama; yo yambulula la okei.

⁵Wane watuyengiyaka, wambuyahamela, Atunyi ayo wambuhumo lukulu lʼolo, Ne dia Latuyalaka akayisuya Dikambu dia efula kʼehedia ayo. Utunyi ayo ambediya anʼuyo utsha lu fumbi.

⁶Ona umuntu Siona ambushisha lutumbu landi tshe! Ewandji ayo wambuyala uku peli yahatani adiyu wa nde. Vo wambulawo aha la wulu la ntundu ka one latawatshanya.

⁷Jerusalema ambuho diango tshe diʼushinga a wulu, Diaki la yo lu nshi yakiyo la asui ndu okei, Ee, diango diaki la yo lu nshi yʼedjedja. Lamʼakoto antu ayo lu anya wʼutunyi, Nduku lakiko dia mbukimanyia. Atunyi ayo wakayenyi, wakayisoke, Ne dia elanyelu kayo.

⁸Jerusalema akatshi kolo heyama, Diako mbambuyuyala engo ka mindu. Wane tshe wakayilemiaka, wambuyonya, Ne dia wambena utakataka ayo. Yo yatukhumaka aikhumu, yatukadimulaka elundji.

⁹Mindu kayo kaki lu ehimbu wʼekutu ayo; Yo kunkana dia akambu wayuyala lʼekumelu kayo. Diako mbeli ekwelo kayo mamba, Ku nduku la one layisamba. We Latuyalaka, endi sui diami, Ne dia utunyi ambolembia!

¹⁰Utunyi ambusimbula anya andi Ladiku dia diango diayo tshe diʼushinga a wulu. Ee, yo yakenyi wedja wamba Diango dia lu etemwelo kayo, Waku wakaseke dia mboto lʼului wʼantu aye!

¹¹Antu ayo tshe watukhuma akhumu Lamʼatuwuyanga mbu ya nde wulu. Vo watutshaka la waumbelu awo ukanda dia ntana ma, Dia nkikitsha wulu wʼalimba awo. Endi we Latuyalaka, ndu enyi! Ne dia dimi lambonywama.

¹²Undi, uku kema dikambu le nyu, Nyu wane watetaka laawo? Nyendi, nyenyi naka lunyangu lomotshi leko Uku lunyangu lami, lambuya le mi, Lako lakansuya Latuyalaka lushi la kele kandi ka wulu.

¹³Uma ladiku mbakandatumi dja; Lu weka ami kakandayikosha. Ndi akambi ekulu ami ati; Akankaluya ekongokongo. Ndi akatshiki lukalemi wodu yanyi tshe.

¹⁴Ndi akakeleka ehedia ami lu lokoho Ndi akadingitanya la lunya landi kame; Akambahewo lu kingu kami, akashili wulu ami. Khumadiondjo akankimo lu anya A waku wahamakuki ndo la wo.

¹⁵Khumadiondjo akahumanya ahuka ami tshe lʼatei ami. Ndi akasanganya ului wʼalimbi dia ndo la mi, Dia ndjaka elongo ami wʼapami. Khumadiondjo akamula usekaseka wʼemuma wa Juda Uku atuwamulaka vinyu lu yundja.

¹⁶Lu akambu aso mbalelami; mbakela ashu ami asoi, Ne dia usambi wukuki nkikitshami Ambuyala etali uma le mi. Anʼami weko lʼatei wʼelanyelu, Ne dia utunyi ambalembia.

¹⁷Siona ambusimbula anya ayo, Ku nduku leko diambusamba. Latuyalaka akati lu dikambu dia Jakoba, Dia asukanyi awo ndjala atunyi awo. Jerusalema ambuyala engo ka mindu lʼatei awo.

¹⁸Latuyalaka kayinga, Ne dia dimi lakahindula elembe andi. Keli nyulungi, nyu antu tshe, Dimi lambunyolomba dia nyu menda lunyangu lami. Esekaseka ami wa dimuma la elongo ami wʼapami Wakatolama lu fumbi.

¹⁹Dimi laketi elangimi ami, keli vo wakankesi. Elombedi ami la dihangamendi diami wakavu lʼusumba Lamʼakawayayangaka ma, dia nkikitsha alimba awo.

²⁰Latuyalaka li, umendi, ne dia lu pa kemi, Utema ami ambulungula. Sulu diami diambate, ne dia dimi laki la uhedia efula: Lʼandja yombo, lu luudu elandu.

²¹Uki akhumu ami, nduku untu lansamba. Atunyi ami tshe wakuki lukumu la pa kami, Vo wakangenangena lu dikambu diakayatshi. Usukanya lushi lakayataka; vo wayali uku dimi.

²²Kolo yawo tshe yenami la ntundu kaye. Atsheli uku akayantshela ne dia ehedia ami tshe, Ne dia akhumu ami waya efula la utema ami ambokomo.