Read tetala Delu dia Jeremiya 2 Bible Online

Delu dia Jeremiya 2 - tetala bible

Delu dia Jeremiya 2

¹Yee, Khumadiondjo ambukumba ona umuntu a Siona dingi lu kele kandi! Ndi ambokosha lutumbu la Isariyele uma lʼulungu uya la kete. Lu lushi la kele kandi, ndi huho kihuna kandi ka nkitshaka ekulu.

²Khumadiondjo akahandjula adjaselu tshe wa Jakoba, kumbuka ketshi, Ndi akahandjula esumba a wulu wa ona umuntu a Juda lu kele kandi. Ndi akakitshakitsha pulu lʼesi, Akanya nemo uma lu diulelu diawo la ewandji awo.

³Ndi akahimbula wulu wa Isariyele lu kele kandi ka wulu, Akanya lunya la pami lakandashimbaka utunyi. Ndi akahete uku lumbi la dja lu Jakoba, akatshumbi beke diawo tshe.

⁴Ndi akaleme uta uku utunyi, Akakutula lunya la pami uku umpe tshanyi. Ndi akadiaki tshe wakaleki dimena lʼatei asu. Ndi akafufiya kele kandi uku lumbi la dja, Lu luudu la dipema la ona umuntu a Siona.

⁵Khumadiondio ambukadimo utunyi, ambomena Isariyele usudia. Ndi ambulanya mvudu yawo tshe ya khumʼekanga. Ndi akahandjula esumba awo a wulu; Ambufudia delu la tukuku ta ona umuntu a Juda.

⁶Ndi ambuhandjula luudu landi lʼotemwelo la ngala, Uku atuhandjulaka untu yindju lʼekambo. Latuyalaka ambuhiya asi Siona nshi yʼalambu la nshi ya mumuya. La ududu wa kele kandi, mbakandonyola khumʼekanga la olombedi.

⁷Khumadiondjo ambulanya ediakelu kandi, Ambuka etemwelo kandi wononyi. Ndi akakimo mvudu yawo ya khumʼekanga lu anya wʼutunyi. Vo wakadji lundju lu luudu la Latuyalaka, Uku akawatshaka lu lushi la dambu diʼekila.

⁸Latuyalaka ambusanguya dia nanya eheli ka ona umuntu Siona, Ndi ambukiedika lʼushinga, atanya lunya landi uma lu nkilanya. Ndi ambukhumia lungeli lʼeheli akhumu, yo yambukhuma akhumu kame.

⁹Kuki yawo yakakhundema lu kete. Ndi akokola ndu akalanya tukingiti tawo. Khumʼekanga kawo la ewandji awo waya lʼatei a wedja; Elembe kema ntu; ndu amvutshi awo hawuyena Nduku enelo uma le Latuyalaka.

¹⁰Dihangamendi dia ona umuntu Siona. Diambudjase la kete, diambolembohala ki. Vo wambutela ditshu lʼete, wambolota akutu. Esekaseka wʼamantu wa Jerusalema. Wambokole ete awo pulu ndu lu kete.

¹¹Ashu ami wambule lʼasoi, utema ami ambukanana. Dimi lambuvo la okei, ne dia ona umuntu a wudja ami, Ne dia akenda la ana wʼashashi. Wamboko huhakai lu sese wʼusumba.

¹²Lamʼatuwokokaka lu esese wa lʼusumba uku antu wambuhumo, Ndu lamʼatuwokokaka huhakai lu tulu yʼanyengewo, Vo watuwambulaka vati: Lendʼeli mbu ya nde la wanu?

¹³We ona umuntu Jerusalema, Eyami mvuta lu dikambu diaye, la na ayumukedika? We ona umuntu lʼemuna Siona, La na ayumukedika dia dimi nkusamba? Puta kaye keki wuki uku ashi a waki, ayeya nkokonoya na?

¹⁴Amvutshi aye wakakenyi waenelo wa kashi ndu wʼanyanya, Vo hawushula kolo kaye dia nkukaluya uma lu fumbi, Vo wakakendjiyaka awulu wa kashi dia nkunganyiya.

¹⁵Waku tshe wateta lasuki laye, watuhumaka saka dikambu diaye. Vo watohongolaka soi, watunyinginyaka ete Lu dikambu dia ona umuntu Jerusalema, wambwana vati: Aha usumba one mbaketaka antu vati: Engo ka dimena diahangone, ongenongeno wa kete kʼutundu?

¹⁶Atunyi aye tshe wambukase enyo awo, Wakohongwela soi, wakeketanya anyu; Watanela vati: Shu tambulanya tshe. Lushi lakatalungamela lone, shu tambulutana, tambulena.

¹⁷Latuyalaka ambutsha kene kakandasanguya. Ndi ambushidiya diui diakandati lu nshi yʼedjedja. Ndi ambuhandjula aha la ketshi. Ndi ambongenyangenya utunyi lu dikambu diaye; Ambedia waulu waku watukuhetshaka.

¹⁸We ona umuntu Siona, uleleli Khumadiondjo wulu! Okedia asoi uku okedi wʼelula la yanyi ndu lʼutshu! Tuhekoki, tushaki ashu aye mumuya!

¹⁹Uneli, utundo la delu, uleli utshu tshe! Utshululi utema aye uku ashi la ntundu ka Khumadiondjo. Edia anya aye utsha le ndi Lu dikambu dia anʼaye wambuvo la ndjala lʼatei wʼosese tshe.

²⁰Latuyalaka li, endi wane wambuyuntshela okone! Undi, ololo amantu nde anʼawo wakawembaka lu anya awo? Ololo olombedi la umvutshi ndjakema Lu etemwelo ka Khumadiondjo uka?

²¹Olongo a pami la usumbi wambetama lu kete lu esese; Esekaseka ami wʼamantu la elongo ami wʼapami wambudiakema la yombo. We akadiaki lu lushu laye la kele, akadiaki aha la ketshi.

²²We aketi atunyi ami wa lʼutshimba tshe. Uku lu lushi la lusanganya lʼekila. Nduku lakahandi, nduku lakatshikala la lumu. Lu lushi la kele ka Latuyalaka. Utunyi akadiaki wane tshe wakamembaka, ndu wakamudiaki.