Read tetala Delu dia Jeremiya 3 Bible Online

Delu dia Jeremiya 3 - tetala bible

Delu dia Jeremiya 3

¹Dimi leli one lakadienaka La ohehela wa ududu andi.

²Ndi akanombola, akankumia Lu udjima waha la usasi.

³Mete, ndi atusimbulaka lunya landi Dia ndi ndo la mi yanyi tshe.

⁴Ndi ambondja emunyi ami la diuwu diami, Ambotetshatetsha weka ami.

⁵Ndi ambunyinga, ambomomba Lʼasui la toshoko.

⁶Ndi ambumbidjasha lu ahuli wa udjima Uku wane wambuvokaka.

⁷Ndi ambunyinga la lukumbu lahameyi ntumba; Ambumbidja molola wa wutshu.

⁸Lamʼatumulelaka, lamʼatumuwetaka dia ndi nkimanyiami, Ndi atushimbaka dombelo diami.

⁹Ndi ambundjihela mbuka yami la ave wa losela. Ambete mbuka yami akutu akutu.

¹⁰Ndi eko le mi uku laundu luhulami, Uku tambwe lu dihuli dia wushamu.

¹¹Ndi akambetoya mbuka yami; Akahatula emunyi ami tufunda tufunda; Akambete anyanya.

¹²Ndi akaleme uta andi, akankitsha uku pole Ya mbukaka pitu.

¹³Ndi akatsheta utema ami la pitu Yʼuma lʼukulu andi.

¹⁴Dimi lambuyala engo ka tola le antu ami tshe, Limbu lawo la dionyo nshi tshe.

¹⁵Ndi akandudia la lunyangu, Akandutsha lʼukayi.

¹⁶Ndi akamungula anyu lʼave, Akakumbi la utuku.

¹⁷Ndi akanya ki uma lʼutema ami, Dimi lambuhela nshi ya ongenongeno.

¹⁸Okone dimi lakati nti: Wulu ami wambushila, Ndu elungamelu kami le Latuyalaka.

¹⁹Uho asui ami la pa yami, Lunyangu lami ndu okei.

²⁰Utema ami atuwauhoka nshi tshe, Atutshutshumalaka.

²¹Keli dimi latuhoka dikambu ne, Mbemi la elungamelu:

²²Ngandji ka shikaa ka Latuyalaka hatushilaka, Ketshi kandi kema la ekumelu.

²³Yo ndjalaka eyuyu pindju tshe, Kolamelu yaye yeli dikambu dia mamba.

²⁴Latuyalaka keli etenyi kami kʼukito, mbata utema ami, Diako mbayumulungamelaka le ndi.

²⁵Latuyalaka atutshelaka wane watukungelaka ololo, Ndu one latuyangaka.

²⁶Ololo untu nungamela, La nkunga panda ka Latuyalaka.

²⁷Ololo untu memba lokoho Lu nshi yandi yʼolongo a pami.

²⁸Ndi ayadjaseli ndame la ki Lamʼawahewolo.

²⁹Ndi akayakitshakitsha, afushafusha elomo andi lu ditshu, Kana elungamelu kekiko.

³⁰Ndi akakadimuli tama le one latokomolaka, La etewo dia ndi ntengamaka,

³¹Ne dia Khumadiondjo hatukadjaka untu pundju,

³²Kuyanga ndi ambunyangia untu, ndi ayuwuka ketshi, Uku weli wuki wa ngandji kandi ka shikaa,

³³Ne dia ndi hatulangaka nsuya antu, Kuyanga mbanyangia.

³⁴Khumadiondjo hetawo mpotshahotsha Asi lukanu tshe wa la kete.

³⁵Ndi hetawo antu mpotola untu sambu kʼololo La ntundu ka KhumʼUlungu.

³⁶Khumadiondjo hetawo antu nanya untu Ulanyalanya lu elumbwelu kandi.

³⁷Akona eya mvuta diui, ku dikambu ntshama, Lamʼahataditi Khumadiondjo?

³⁸Undi, ololo la kolo hawututumbaka Uma lʼunyo wa KhumʼUlungu?

³⁹Dikambu kuna diatukiyanaka untu Lamʼatundusuyamaka dikambu dia kolo yandi?

⁴⁰Nyeso, tushishimi mbuka yasu, tuyediki; Tukaluli le Latuyalaka.

⁴¹Tedia etema asu la anya asu Utsha le Unyashungu leli lʼulungu.

⁴²Shu takakuhedia, takakotombokwela, We atatudimanyia.

⁴³We akayaombe la kele, akayelana la su, Akatudiaki, aha la ketshi.

⁴⁴We akayaombe la dingi Wuhu wahakuki dombelo nkuma le ye.

⁴⁵We akatete engo kʼanyanya, Engo ka ndjetete lʼatei a wedja.

⁴⁶Atunyi asu tshe wambase enyo Dia ntonyola.

⁴⁷Woma la nyoi wambutunda, Lundju la elanyelu.

⁴⁸Ashu ami wambokedia akeledu wʼasoi, Ne dia elanyelu ka ona umuntu a wudja ami.

⁴⁹Ashu ami watokediaka asoi, Hawukimo nkela kuyanga yema tshitshe,

⁵⁰Edja ndu Latuyalaka ambuka su, Ambenda uma lʼulungu.

⁵¹Ashu ami watunyangiaka utema ami Dikambu diʼelanyelu ka ana amantu wʼusumba ami.

⁵²Waku watumpetshaka uhetshahetsha, Wakanyangi wulu uku fudu.

⁵³Vo wakantambiya lu difuku, Wakambuki ave.

⁵⁴Ashi wakanditsha: Dimi lakati nti: Lambushisho!

⁵⁵Latuyalaka li, dimi laketaka lukumbu laye Umakʼesi a difuku.

⁵⁶We akuki osengosengo ami, Tudihaki tui lu delu diami diʼosengosengo.

⁵⁷We akasukana lamʼakamaketi, We akati wati: Tukaki woma.

⁵⁸Khumemi li, we akasambula dikambu diami ololo, Akashimbela lumu lami.

⁵⁹Latuyalaka, we akenyi kolo kakawantshela, Usambuli dikambu diami.

⁶⁰We akenyi esombweyo kawo tshe, Sangweyu tshe diakawasanguya ntshelami.

⁶¹Latuyalaka li, we akuki tengo yawo, Sangweyu diakawasanguya ntshelami,

⁶²Aui la tukanyi ta waku Watondoshaka yanyi tshe.

⁶³Uwaendaki lamʼudjashiwo ndu lamʼunelawo, Dimi leli usambu awo wa dionyo.

⁶⁴Latuyalaka li, we ayafuta Uku eli ulimu wʼanya awo.

⁶⁵We ayuwasha etema a wutshu; Mananu kaye kayuyala le wo.

⁶⁶Latujalaka li, we ayuyelana la wo lu kele kaye, Ayashila ushiki uma lʼesi ulungu.