Read tetala Ezekiyele 14 Bible Online

Ezekiyele 14 - tetala bible

Ezekiyele 14

¹Dihangamendi dimotshi dia Isariyele wakayi, wakayudjase la ntu-ndu kami.

²Diui dia Latuyalaka diakayi le mi ati:

³Onʼa untu, antu ane wambudja dikishi diawo lʼetema awo, ndu wambukitsha uhedia awo utamba a ntakanya la ntundu kawo. Okoko wana wukukimi mumbwama le wo?

⁴Okone uwateli wati: Khumadiondjo Latuyalaka kata ati: Usi Isariyele tshe, latudjaka dikishi diandi lʼutema, latukitshaka uhedia andi utamba a ntakanya la ntundu kandi, ndu latutshokaka le umvutshi, dimi Latuyalaka layukaluya diui uku eli efula ka dikishi diandi,

⁵dia dimi munda etema wa khumbu ka Isariyele, ne dia vo tshe wakamo uma le mi ne dia dikishi diawo.

⁶Okone uteli khumbu ka Isariyele wati Khumadiondjo Latuyalaka kata ati: Nyukaluli, nyukadimo uma lu dikishi dianyu, nyunya ashu anyu uma lu akambu tshe wa wononyi.

⁷Usi khumbu ka Isariyele tshe, kana ongendangenda ludjashi lʼatei wa Isariyele, lakangana uma le mi, latudjaka dikishi diandi lʼutema, latukitshaka uhedia andi utamba a ntakanya la ntundu kandi, latutshokaka le amvutshi dia ntuyambwela dikambu diami, dimi Latuyalaka, dimi dime layukaluya diui.

⁸Layediya elundji kami dia ndo la untu ako, layuwete engo ka nkashimo, djimbitelu la yukedi. Dimi layuwunya uma lʼatei a wudja ami, ku nyu nyayeya nvati: Dimi keli Latuyalaka.

⁹Naka umvutshi ambukesama, ambuta diui, keti dimi Latuyalaka kambukesa. Dimi layusimbula lunya lami le ndi, layuwunya uma lʼatei a wudja ami, Isariyele.

¹⁰Vo wayuyaembela unungu wʼuhedia awo. Unungu wʼuhedia wʼumvutshi ayuyala pupu la wa one layutsho la ntuwumbula,

¹¹ne dia khumbu ka Isariyele watukangana ntu uma le mi, kuyanga ndjalanya la kolo yawo tshe. Ku vo wayuyala wudja ami, la dimi ndjala Unyashungu awo, mbata Khumadiondjo Latuyalaka.

¹²Diui dia Latuyalaka diakayi le mi ati:

¹³Onʼa untu, lamʼayuntshela wudja kolo dia vo mpediami, naka dimi lambusimbula lunya lami utsha le wo, dia nanya mbu ya nde yawo, naka lambatumela ndjala ka kasha dia nshila antu la nyama ushiki;

¹⁴utunduyala antu ane asatu: Noa, Danyele la Jobo wayali loko, tshiki vo wutushimbamela vame lu ololo awo, mbata Khumadiondjo Latuyalaka.

¹⁵Naka dimi layetshetsha nyama ya ngala lu kete, dia yo ndjihandjula la ndjilanya, edja ndu untu heyi mbeta loko dikambu dia nyama;

¹⁶uku wemi la lumu! mbata Khumadiondjo Latuyalaka, utunduyala antu ako asatu wayali loko, tshiki vo tutuwushimbela ana apami kana ana amantu. Vo vame mbutushimbamela, keli kete yutuyala elanyelu ketu.

¹⁷Naka dimi layutuma yombo lu wudja nti: Yombo, yeteti lu kete dia dimi nshila antu la nyama ushiki;

¹⁸uku wemi la lumu! mbata Khumadiondjo Latuyalaka, utunduyala antu ako asatu wayali loko, tshiki vo tutuwushimbela ana apami kuyanga ana amantu, keli vo vame mbutushimbamela.

¹⁹Naka dimi layutuma elandu lu kete, la ntshulula ududu ami dia ntundja dikila, dia nshila antu la nyama ushiki;

²⁰uku wemi la lumu! mbata Khumadiondjo Latuyalaka, utunduyala Noa, Danyele la Jobo wayali loko, tshiki vo tutuwushimbela ona pami kana ona umuntu, keli vo vame mbutushimbela nyumu yawo uma lu ololo awo.

²¹Khumadiondjo Latuyalaka kata ati: Naka osoku, ukundi ayuyala Jerusalema lamʼayumutumela asui ami anei ane: yombo, ndjala ka kasha, nyama ya ngala la elandu[29] dia nshila antu la nyama ushiki?

²²Keli atshikadi atoi wayuhanda, ku elongo wʼapami la esekaseka wʼamantu wayotolama lu fumbi. Nyulungi, vo wayuya le nyu, nyu nyayena lokewo lawo la etsha awo. Ku nyu nyayusambema ne dia elanyelu kayangami ntuma la Jerusalema, ndu lu dikambu dia akambu tshe wakamatshi leko.

²³Vo wayunyusamba lamʼayunyena lokewo lawo la etsha awo. Nyu nyayulimbitela nyati: Dimi kuntsha akambu tshe wakamatshi la Jerusalema utshatsha, mbata Khumadiondjo Latuyalaka.