Read tetala Ezekiyele 17 Bible Online

Ezekiyele 17 - tetala bible

Ezekiyele 17

¹Diui dia Latuyalaka diakayi le mi t ati:

²Onʼa untu, uki diko, uki khumbu ka Isariyele wela one wati:

³Khumadiondjo Latuyalaka kata ati: Pungu ka wuki keli la ahafu a waki wʼetali, weli too la sala yʼawadi awadi, kakatshu la Lebanona, kakatuhatula sodi kʼutamba wʼusasi.

⁴To kakahatula avundja wa sodi kako, kakakiembe utsha lu kete yatshawo ukanda. Pungu kako akatukikitsha lʼusumba wʼasi ukanda.

⁵Pungu kako akose lukuno uma lu kete yako, akalune lu kete yʼeteto dia lo mena lʼu-mamu wʼashi a waki. To kakalune uku lukuno lʼuduwula.

⁶Lukuno lako lakangone, lakayala uku dambu diʼokodi walamba la kete. Tonga vʼokodi ako yakakadimo uya le pungu kako, keli ediu awo wakatshikala lu dihuli diawo; ku lukuno lako lakayala okodi. Vo wakatundja tonga, wakamene akatshi.

⁷Pungu kekina kakiko. To kaki la ahafu a waki la sala efula. Menyi ku okodi ako wukadimula ediu awo utsha le pungu kako. Vo wakalambia tonga utsha le to uma lu dihuli diakawawune, dia pungu kako mbutela ashi.

⁸Vo wakunema lu kete yʼeteto, lʼumamu wʼashi a waki, dia vo mbidja tonga la nto elua, dia ndjala okodi wʼololo.

⁹Uti wati: Khumadiondjo Latuyalaka kambula ati: Undi, vo wayuluwana? Pungu kako hukula ediu awo? To huhimbula elua dia vo nengela, la dia akatshi awo tshe wʼeyuyu nengela uka? Hahumbi lunya la wulu, kana antu efula, dia mbukula ndu ediu awo.

¹⁰Nyulungi, kuyanga wakosekola, vo wayuluwana uka? Vo hawolengela tshe lamʼayopepa lopepe uma lʼehu-twelu? Mete, vo wayolengela lu kete yakawawune.

¹¹Ku diui dia Latuyalaka diakayi le mi ntu ati:

¹²Umbuli khumbu kene kʼatomboki wati: Nyu hanyeyi kitshimudi kʼakambu aso? Uwateli wati: Khumʼekanga ka Babilona akayi la Jerusalema, akandi khumʼekanga kawo la ewandji awo, akatshu la wo utsha la Babilona.

¹³Ndi akose untu omotshi uma lu khumbu ka khumʼekanga, akadji la ndi sheki, akutshibia. Ndi akatole antu a waki uma lu kete,

¹⁴dia diulelu ndjala la ndjaki-tshakitsha, aha ndjambiya; dia dio nkikitala uma lʼelembielo ka sheki yandi.

¹⁵Keli ndi akotombokwela[30] lamʼakandatumi akendji lʼEdjibitu dia vo mbusha falasa la ului a wuki wʼalimbi. Undi, ndi ayuhumo lukulu lʼolo? One latutshaka akambu aso, ayuhanda uka? Ndi mbeyaka nanya sheki, ku ndi mpanda?

¹⁶Uku wemi la lumu! mbata Khumadiondjo Latuyalaka, ndi ayutuvo lu dihuli diudjashi khumʼekanga lakawudji khu-mʼekanga, ako lukanga etshibelu kakandonyola, ndu lukanga sheki yakandalanya lu kete ya Babilona.

¹⁷Farayo la ului andi a wuki wʼalimbi haweyi mbukimanyia lu ta lamʼayuwutshima ngeli la mpika wumbe wa ta dia ndjaka antu efula.

¹⁸Ndi akonyola etshibelu lamʼakandalanya sheki. Kuyanga ndi akashana la khumʼekanga lunya, ndi ambutsha akambu aso tshe, ndi huhanda.

¹⁹Diako mbata Khumadiondjo Latuyalaka ati: Uku wemi la lumu! dimi layukaluya etshibelu kakandonyola, la sheki yami yakandalanya, lu ote andi.

²⁰Dimi layuwamba otei; ndi ayutala lu djunga yami. Dimi layotola la Babilona, layutulumbuya leko, ne dia uhedia wakandampedia.

²¹Waku watalawo la ndi la alimbi andi, wayudiakema la yombo; la waku wayuhanda, wayuhandjwama lu beke tshe dia kete, dia nyu mbeya nyati: Dimi Latuyalaka kambuta dikambu so.

²²Khumadiondjo Latuyalaka kata ati: Ndu dimi layunya sodi kʼutamba wʼusasi, layukisekola lukunu. Dimi layuhimbula lutahi luleki ladiku ndu lʼuyuyu, layutune ladiku diʼote wʼukungu wʼutali.

²³Ladiku diʼukungu wʼutali wa Isariyele kayumulune. Lo layongona, layutumba tahi, layoto elua, layuyala utamba wʼusasi wa dimena. Ku wehu tshe wa fudu wayudjase lu dedi dia tahi yawo.

²⁴Etamba tshe wa lʼukunda wayeya vati: Dimi Latuyalaka lakakitshakitsha utamba wa nemo, lakedia utamba waha la nemo. Dimi lakunyia utamba wʼuyuyu, ndu lakasha utamba wambuma lumu. Dimi Latuyalaka lambudita, ndu lambuditsha.