Read tetala Ezekiyele 19 Bible Online

Ezekiyele 19 - tetala bible

Ezekiyele 19

¹Embeli ewandji wa Isariyele limbu la delu wati:

²Kakona kaki nyengenyu? Ndi aki tambwe ka wadi, Kaketamaka lʼatei a tambwe ya waumi, Kakalomiaka ana ato lʼatei wʼesongo wa tambwe.

³To kakudia onʼato omotshi, Ku ona ako akayala osongo a tambwe. To kakekela munda nyama, kakandaka ndu antu.

⁴Wedja wakuki dikambu diato. To kakandama lu wawu awo. Ku vo wakakitundja la koho utsha lu kete ya Edjibitu.

⁵Lamʼakatenyi ati: Lambukunga edja, Ndu elungamelu kami kambushisho, To kakose onʼato ukina, akawete osongo a tambwe.

⁶Ku osongo ako a tambwe aketetaka lʼatei a tambwe kina. To kakekela lama munda nyama, kakalekaka antu.

⁷To kakalanyaka mvudu yawo ya khumʼekanga, Kakahandjulaka esumba lʼadikita ato.

⁸Wedja wa lu beke dia lʼutshimba wakayalonge dia nkilosha. Vo wakakidingi otoi, wakakindi lu wawu awo.

⁹Vo wakakiotshiya lu lusasa la koho, Wakakitole le khumʼekanga ka Babilona. Wakakiotshiya lʼusumba awo wudingami lukumbu, Diaha dikita diato mbukama ntu Lu ekungu wa Isariyele.

¹⁰Nyengenyu aki uku okodi wa vinyo wakawune lʼumamu wʼashi. Vo wakatundja tonga efula, wakato elua, Ne dia ashi waki efula.

¹¹Lotonga lalo luleki wuki, Lakayala danga dia umbuledi Lo lakaleki tonga kina utali; Lo lakenama ladiku dia tonga kina yʼokodi.

¹²Keli wakakula okodi ako la kele, wakôkosha la kete. Lopepe lʼuma lʼehutwelu ka unya lakimia elua awo. Wakakohola elua; Lotonga lawo la wuki lakahimbwama, lakalengela, Ku dja yakalutshumbi.

¹³Kakiane okodi ako ambunema lʼusui wa shenga, Lu kete ya wumu, yaha la ashi.

¹⁴Dja yakalalo uma lu lotonga la wuki utsha lu tonga kina. Yo yakatshumbi elua ayo, Edja ndu nduku lotonga lukuki ndjala danga dia diulelu. Oso keli limbu la djuwa, Lo lambuyala limbu la djuwa.