Read tetala Ezekiyele 23 Bible Online

Ezekiyele 23 - tetala bible

Ezekiyele 23

¹Diui dia Latuyalaka diakayi le mi ntu ati:

²Onʼa untu, esekaseka wʼamantu ehendi wakuto etoi utema wakiko.

³Vo wakatuyala akanga a luseka lʼEdjibitu, wakatunana luseka lu nshi yawo yʼesekaseka. Elongo wʼapami wakakenyaka la wo lu awele awo leko. Vo wakanandaka sumu yʼawele awo lamʼakiwo dimuma.

⁴Kumbu yʼesekaseka ako nye: lʼenundu, Ohola; la kushi, Oholiba. Vo wakayala wadiemi; wakuti ana apami la ana amantu. Kumbu yawo yaki okone: Ohola, eli Samariya; la Oholiba, eli Jerusalema.

⁵Lamʼaki Ohola wadiemi, ndi akunana luseka; ndi akaleki nanga eseka andi, asukanyi andi, asi Asuriya.

⁶Vo wakalotaka ahondo wa tilili, waki embuledi la elombodi wʼalimbi. Vo tshe waki elongo wʼapami wʼamena efula, ambahemi wa falasa, wakahemaka falasa yawo.

⁷Ndi akayakimo le wo, elongo wʼapami tshe wʼasi Asuriya wakaleki amena. Ndi akayalanya lʼapami tshe wakandalangaka, ndu la dikishi diawo tshe.

⁸Umaka lamʼakindi lʼEdjibitu, ndi ataseke luseka landi. Vo wakunanaka la ndi lamʼakindi usekaseka; wakakenyaka la ndi lu awele andi lamʼakindi emuma; wakunanaka la ndi efula efula.

⁹Diako mbakamukimo lʼanya wʼeseka andi, lʼanya wʼasi Asuriya wakandalangaka.

¹⁰Vo wakenyi utakataka andi, wakohotola anʼandi wʼapami la anʼandi wʼamantu, wakudiaki la yombo. Vo wakulumbuya edja ndu akayala engo ka dionyo lʼatei wʼamantu.

¹¹Kushendi Oholiba akenyi akambu ako, keli ndi akuleki kolo lu nanga apami. Ndi akayakimo lu luseka uleki enundu andi.

¹²Ndi akalangaka asi Asuriya, embuledi la elombodi wʼalimbi, asukanyi andi, wakalotaka ahondo wa nemo, waki ambahemi wa falasa, wakahemaka falasa yawo. Vo tshe waki elongo wʼapami wʼamena efula.

¹³Dimi lakenyi nti: Ndi ambuyasanya. Vo ahendi wakayeli mbuka otoi.

¹⁴Ndi akafudia luseka landi. Ndi akenyi esatu wʼelongo wʼapami lu eheli, difanelu diʼasi Kaladiya diakasangwema lu dangi dia tilili,

¹⁵wolotshi eya lu kindi, la tambala lʼete. Vo tshe uku ewandji wʼamena, wufanyi lʼasi Babilona, lu kete ya Kaladiya, lene akawuto.

¹⁶Kamʼakandawaenyi, ndi akalangaka efula, akatumi akendji le wo lu kete ya Kaladiya.

¹⁷Asi Babilona wakayakaka le ndi dia ndjetama la ndi lu tangi kandi; vo wakusanya la luseka. Lamʼakandasana la wo, ndi akakadimo uma le wo la dionyo.

¹⁸Lamʼakandatetemala la luseka landi, lamʼakandenyaka antu utakataka andi, utemʼami akutuni uku akamatuni enundu andi.

¹⁹Keli ndi akafudia luseka landi, akuhoka nshi yakindi usekaseka, yakandunanaka luseka lu kete ya Edjibitu.

²⁰Ndi akalangaka eseka andi waki la alimba uku alimba wa punda, ndu waki la alome uku alome wa falasa.

²¹Osoku mbatuyukumbulaka kolo yaye ya lu nshi yaye yʼusekaseka, yakakenyaka asi Edjibitu la ye lu awele, ndu lamʼakawanandaka sumu yʼawele aye.

²²Diako mbatela Khumadiondjo Latuyalaka Oholiba ati: Enda, dimi lutsha munyia eseka aye dia nkolosha. Dimi layela eseka aye wakayonyola uma lu beke tshe dia ndjukolosha;

²³asi Babilona la asi Kaladiya tshe, Pekode, Shoa la Koa, kame la asi Asuriya tshe, elongo wʼapami wʼamena, embuledi, elombodi awo tshe wʼalimbi, enene wʼalimbi la andoshi wa ta, vo tshe wakahemaka lu falasa.

²⁴Vo wayuya la dihumo diawo, pusupusu yawo, etshimbi, la ului a wuki wʼalimbi dia ndjukolosha. Vo wayuya-longa wukimedi dingawu dia waki ndu dia tshitshe, ndu fule ya mbulu dia ndo la ye lʼutshimba tshe. Dimi layuwasha wulu wa nkulumbuya, ku vo wayukulumbuya uku elembe.

²⁵Dimi layutundja kandjema kami dia to ntolo la ye. Vo wayukutshela akambu wa ngala: wayukuhimbula ohembe la atui; atshikadi aye wayudiakema la yombo. Wayunda anʼaye wʼapami la anʼaye wʼamantu, ku atshikadi aye wayutshumbama lu dja.

²⁶Vo wayu-kukulula ahondo, wayukohotola dengalenga diaye diʼamena.

²⁷Osoku mbayumunya kolo yaye uma le ye, la luseka laye lakayayi la lo uma lu kete ya Edjibitu diaha we nkaluya ashu aye utsha le yo, kuyanga mbuho Edjibitu ntu.

²⁸Ne dia Khumadiondjo Latuyalaka kata ati: Dimi lutsha nkukimo lu anya a waku watukuhetshaka, lu anya a waku wakayaseke.

²⁹Vo wayukutshela la luhetshu, wayukohotola ekundjelu kaye tshe, wa-yukutshika utakataka. Ku utakataka aye la luseka laye wayenama, akambu aye wa sonyi la luseka laye.

³⁰Wayukutshela akambu ane, ne dia we akunana la asi wedja, ndu ne dia we akayalanya la dikishi diawo.

³¹We akayelaka mbuka kakakendakendaka enundu aye, diako mbayumudja dikoho diandi diʼelanyelu lu anya aye.

³²Khumadiondjo Latuyalaka kata ati: We ayono dikoho diʼenundu aye a umuntu Dikoho diako dieli wuki ndu utali, asui efula weko loko. Wayukonyola, wayukola tola tʼekunune.

³³We ayudjo edjwelu ka wulu ndu ka lunyangu Lu dikoho diʼenundu aye Samariya. Dio dieko dikoho dia nkashimo, Dikoho diʼelanyelu.

³⁴Dieli la ye dia dino tshe ndu mbitshitshi, Ku we ayuhatula divu, ayuhatula awele, Ne dia dimi lambuta, mbata Khumadiondjo Latuyalaka.

³⁵Okone Khumadiondjo Latuyalaka kata ati: We akambuhela, akambuki okongo, diako mbayuyemba wutshu wa kolo yaye la wa luseka laye.

³⁶Latuyalaka akambula ntu ati: Onʼa untu, we ayulumbuya Ohola la Oholiba? Uwateli akambu awo wa wononyi.

³⁷Vo wakunana luseka, anya awo weko dikila tu, vo wakaseke dia ntemola dikishi, wakaditshumbela anʼawo wʼapami wakawambutela.

³⁸Vo wakantshela ndu akambu akina: wakalanya etemwelo kami lushi lako, ndu vo wakalanya nshi yami ya mumuya.

³⁹Kamʼakawadiakela dikishi diawo anʼawo, vo wakoto lu luudu lami lushi lako dia lusanya. Osoku mbakawatshi lu luudu lami.

⁴⁰Wakatumi akendji dia nteta antu uma lʼetali, ku vo wakayi. We akoke ashi lu dikambu diawo, akakiti yula lu ashu aye, akalote dengalenga.

⁴¹We akadjase lu tangi kaye ka dimena. La ntundu kaye kaki mesa wolongo-swami, wakayakitsha malashi la iso kami.

⁴²Lundju lʼongenongeno lʼului a wuki wʼantu laki kame la ndi, ndu kame lʼantu wʼanyanya la ambidjoki wakawela uma lʼusui wa shenga. Ku vo wakayudja ekoma lu anya wʼamantu ako ahendi la alembo wa kusu lu ete awo.

⁴³Ku dimi lakati lu dikambu dia one laya usumbi lu luseka nti: Undi, ndu kakiane vo wayutetemalaka munana la ndi, la ndi munanaka la wo?

⁴⁴Vo wakoto le ndi uku atuwotoka le kanga luseka. Osoku mbakawoto le Ohola la le Oholiba, amantu wa kolo.

⁴⁵Antu wʼololo wayalumbuya uku atuwulumbuyaka amantu akanga a luseka, ndu uku atuwulumbuyaka amantu watutshululaka dikila, ne dia akanga a munanyi mbewo, la anya awo dikila tu.

⁴⁶Khumadiondjo Latuyalaka kata ati: Dimi layutuma ului wʼantu dia ndo la wo, dimi layakimo lu anya awo dia vo mbasuya la mbahotola diango.

⁴⁷Ku ului ako wʼantu wayuwauka ave, wayuwatshanya la tombo, wayudiaka anʼawo wʼapami la anʼawo wʼamantu, wayutshumba mvudu yawo.

⁴⁸Osoku mbayumukumia kolo kene lu kete, dia amantu tshe mbewo diaha vo ntsha kolo uku akanyatshi.

⁴⁹Vo wayunyosomboya kolo kanyu kene, la nyu nyayemba wutshu wa kolo ka dikishi dianyu. Ku nyu nyayeya nyati: Dimi keli Khumadiondjo Latuyalaka.