Read tetala Ezekiyele 24 Bible Online

Ezekiyele 24 - tetala bible

Ezekiyele 24

¹Lʼeleku ka divwa, lu lushi la dikumi la ngondo ka dikumi, diui dia Latuyalaka diakayi le mi ati:

²Onʼa untu, ufundi lu dikambu dia lushi lʼelo lone wati: Khumʼekanga ka Babilona ambudinga Jerusalema[48] elo.

³Uki khumbu kʼatomboki kene wela wati: Khumadiondjo Latuyalaka kata ati: Nyahe puki ka wuki, nyukiahe, nyudji ndu ashi loko.

⁴Nyudji funda loko, funda tshe yʼololo, Elemba ka lukulu la ka lunya, Nyukiludia la weka wʼololo.

⁵Nyosonole okoko wuleki dimena, Nyudji kunyi efula lʼesi a puki, Nyukati wulu, weka wahilo ololo.

⁶Khumadiondjo Latuyalaka kata okone ati: Mananu kayali le usumba one wa dikila, mananu kayali le puki keli la matadi, kako kakamo matadi! Utundja funda la funda, aha ndjisonola,

⁷ne dia dikila diakawatshulula dieko lʼatei awo, wakaditshulula ladiku diʼave, vo ludi-tshulula la kete dia difu ditshu.

⁸Dimi lakakitsha dikila diakawatshulula ladiku dia dive diaha dio nkumkama la ditshu, dia nfudia kele kami, dia dimi mbasomboya.

⁹Diako mbata Khumadiondjo Latuyalaka ati: Mananu kayali lʼusumba wa dikila! Dimi layete diwenga wuki.

¹⁰Nyufudia kunyi, nyohetsha dja wulu, nyesha emunyi ololo, nyukukiushi, nyu-lunguya weka.

¹¹Lʼokongo diku, nyahe puki kako hwe, dia to mpeta wulu, dia ohotela ato mpetaheta wulu, dia diango dia mindu ndelo lʼatei, ndu dia matadi ato nungula.

¹²To kakahetaka wulu, keli matadi kumumo uma loko la dja.

¹³Matadi ako mbeli mindu ka kolo kaye. Dimi lakalangi nkiedia, keli we kombediama uma lu mindu ka kolo yaye. We hediama ntu uma lu mindu kaye edja ndu lamʼayumunduya ududu ami le ye.

¹⁴Dimi Latuyalaka lambuta diui, dio diayushidiyama. Dimi layuditsha; dimi haka-dimo, halukuka ketshi, halembe utema. Vo wayukulumbuya uku aki lokewo laye, ndu ditshelu diaye, mbata Khumadiondjo Latuyalaka.

¹⁵Diui dia Latuyalaka diakayi le mi ati:

¹⁶Onʼa untu, enda, dimi lutsha mbosa one lulekiye nanga shashimuya, keli tukhumaki akhumu, tulelaki kuyanga nkedia asoi.

¹⁷Ukhumi akhumu, uleli, tutshelaki one lambuvo utanda. Udji lufule lʼote, olote sabata lʼekulu aye, tukambaki ulimu aye, tolekaki ma diʼutanda.

¹⁸Okone dimi lakasawula lʼantu la pi-ndju, ku la dikolo wademi akavu. La wedi a pindju, dimi lakatshi uku aka-mvutela Latuyalaka.

¹⁹Ku antu wakamumbula vati: We hutumanya akambu watshaye lu dikambu diasufundu?

²⁰Ku dimi lakawatela nti: Diui dia Latuyalaka diakayi le mi ati:

²¹Uteli khumbu ka Isariyele wati: Khumadiondjo Latuyalaka kata ati: Nyendi, dimi lutsha nanya etemwelo kami, utaku a wulu anyu, kene kulekinyu nanga, la kene kukanyu ketshi. Anʼanyu wʼapami la anʼanyu wʼamantu wakanyatshiki lʼokongo, wayudiakema la yombo.

²²Kanyutshi uku akamatshi, kanyukambaki elimu; tanyoleki ma diʼutanda.

²³Nyudji fule lʼete, nyolote sabata lʼekulu, tanyutundoki lʼalelu kuyanga ndela. Keli kanyukhumaki akhumu okoke lu kolo yanyu, kanyukhumanelaki akhumu one le unyandi, one le unyandi.

²⁴Ukuku mbayuyala Ezekiyele djimbitelu le nvu uku akandatshi lu akambu tshe, mbayunyutsha ndu nyu. Lamʼayuyala akambu ane, nyu nyayeya nyati: Dimi keli Khumadiondjo Latuyalaka.

²⁵Onʼa untu, lushi layuyala, lamʼayumunya wulu awo, ongenongeno wa lutumbu lawo, engo kulekiwo nanga, engo kukawo ketshi, ndu anʼawo wʼapami la anʼawo wʼamantu.

²⁶Lushi lako, one layuhanda, ayuya le ye dia ndjukusanyia akambu aso tshe.

²⁷Lʼetena kako, unyo aye ayudiho le one lakahandi. Ku we ayoteketa, aha ndjala kanga lumi ntu. Osoku mbayuyuyala ndjimbitelu, ku vo wayeya vati: Dimi keli Latuyalaka.