Read tetala Ezekiyele 25 Bible Online

Ezekiyele 25 - tetala bible

Ezekiyele 25

¹Diui dia Latuyalaka di kayi le mi ati:

²Onʼa untu, edia elundji kaye utsha le asi Amona,[49] uti akambu wahatayi lu dikambu diawo.

³Uteli asi Amona wati: Nyulungi diui dia Khumadiondjo Latuyalaka. Khumadiondjo Latuyalaka kata ati: Ne dia nyu nyakati nyati: Nʼhi! lamʼakasana etemwelo kami, lamʼakalana wudja wa Isariyele, ndu lamʼakatolama khumbu ka Juda lu fumbi.

⁴Diako mbayumunyukimo le antu wa lu leke lʼehutwelu dia vo nyahamela. Vo wayuhika kumbu yawo lu kete yanyu, wayudjase lʼatei anyu. Vo wayole elua anyu, ndu wayono awele anyu.

⁵Dimi layete Raba ukutu wa kamelo, la esumba wʼasi Amona, ahuli wʼekoko mbetama, ku nyu nyayeya nyati: Dimi keli Latuyalaka.

⁶Khumadiondjo Latuyalaka kata ati: Nyu nyakashana tusambi, nyakakindjikiya ekulu, nyakangenangena lʼutema lu akambu wakayala lu Isariyele.

⁷Diako mbamumusimbula lunya lami ladiku dianyu, dia nyukimo uku engo ka dimbu le wedja. Dimi layunyushila ushiki, layunyushisha uma lʼatei a waulelu, layunyulanya. Ku nyu nyayeya nyati: Dimi keli Latuyalaka.

⁸Khumadiondjo Latuyalaka kata ati: Ne dia Moaba[50] la Seire watutaka vati: Nyendi khumbu ka Juda keli uku wedja tshe.

⁹Diako mbayumudihula esumba wa Moaba weli lʼumamu, esumba awo wa lutumbu, Bete-Djeshimote, Bala-Meona, Kiriyatayima.

¹⁰Dimi lutsha nkimo Moaba kame la kete yʼasi Amona le antu wa lu leke lʼEhutwelu dia vo mbahamela, diaha vo mbalema ntu lʼatei a wedja.

¹¹Dimi layulumbuya Moaba. Ku vo wayeya vati: Dimi keli Latuyalaka.

¹²Khumadiondjo Latuyalaka kata ati: Edome[51] akayakimo dia numbuya khumbu ka Juda, wakayaete lʼunungu, ne dia vo wakasomboya wulu.

¹³Diako mbata Khumadiondjo Latuyalaka ati: Dimi lutsha nsimbula lunya lami ladiku dia Edome: layudiaka ndu antu ndu nyama. Dimi layete kete tongo tu, uma la Temana edja ndu la Dedana. Vo wayudiakema la tombo.

¹⁴Dimi ayosomboya Edome lʼanya wa wudja ami wa Isariyele. Vo wayutshela Edome uku kele la ududu ami. Ku vo wayulimbitela esombweyo kami, mbata Khumadiondjo Latuyalaka.

¹⁵Khumadiondjo Latuyalaka kata ati: Asi Filistiya[52] wakayakimo dia nsomboya Isariyele la luhetshu, la dia mbashila ushiki la lutunu lahashilaki pundju.

¹⁶Diako mbata Khumadiondjo Latuyalaka ati: Nyendi, dimi lutsha nsimbula lunya lami ladiku dia asi Filistiya. Dimi layudiaka asi Kerete; layushila atshikadi wa lʼumamu wʼashi a waki ushiki.

¹⁷Dimi layasomboya la esombweyo ka wuki, layasuya la ududu. Ku vo wayeya vati: Dimi keli Latuyalaka, lamʼayumasomboya.