Read tetala Ezekiyele 26 Bible Online

Ezekiyele 26 - tetala bible

Ezekiyele 26

¹Lʼeleku ka dikumi lʼotoi, lu lushi la ntundu la ngondo, diui dia Latuyalaka diakayi le mi ati:

²Onʼa untu, ne dia Tura[53] wakati lu dikambu dia Jerusalema vati: Nʼhi! Lukuki la wudja lambuhandjo, lambudiho, laya le su. Shu tayongona, ne dia vo wamualanyema.

³Diako mbata Khumadiondjo Latuyalaka ati: Nyendi, dimi lutsha mendana la ye, we Tura. Dimi lutsha ntuma wedja efula dia ndjukolosha, uku atutshutshiyaka ashi a wuki asukhu awo.

⁴Vo wayuhandjula peli dia lukumbu laye, we Tura, wayuyukula tangelu diaye. Dimi layohelola ditshu diaye, layutshika ave aye lʼandja.

⁵We ayuyala dihuli lu ashi a wuki dia antu maneka etei; dimi lambuta, mbata Khumadiondjo Latuyalaka. We ayuyala engo ka dimbu lʼatei a wudja.

⁶Ana amantu wa lu kete ya wuki wayudiakema la tombo, ku vo wayeya vati: Dimi keli Latuyalaka.

⁷Khumadiondjo Latuyalaka, kata ati: Nyendi, dimi lutsha ntuma Nebukadineza, khumʼekanga ka Babilona, khumʼekanga ka khumi ya dikanga yʼuma la ngelʼa kushi kame la alasa, pusupusu ya ta, ambahemi wa falasa, la ului a wuki wʼalimbi, dia ndjukolosha, we Tura.

⁸Ndi ayudiaka anʼaye wʼamantu wa lu kete ya wuki, ayukutshimiya ngeli, ayukukitshiya wembe wa ta, ayedia dingawu dia ndo la ye.

⁹Ndi ayukitsha etamba wa mbula peli lasuki la nyu. Ndi ayunyukula tangelu dianyu la tokenge.

¹⁰Ditshu diʼuma lu efula ka falasa yandi diayulukumba; peli diaye diayusu-kasuka la dikita diʼambahemi wa falasa, diʼetshimbi, la dia pusupusu ya ta lamʼayuwutoka lu asuku aye, uku atotoka antu lʼusumba wambuwunyukula etshi ka lukumbu.

¹¹Sanga ya falasa yandi yayohotshahotsha esese aye tshe. Ndi ayudiaka antu aye la yombo, dimeta diaye diatuyekamaka, diayunyuko.

¹²Vo wayunyohotola ekundji anyu, wayumba diango diʼukanda, wayuhandjula peli dianyu. Vo wayunyukula mvudu yanyu yʼongenongeno, wayukadja ave anyu, etamba anyu, la ditshu dianyu lu ashi.

¹³Dimi layukumiya lundju lʼesumba anyu, la lundju la sese yanyu, halukuma ntu.[54]

¹⁴Dimi layukete ave atu, dihuli dia antu maneka etei. We hahikamaki ntu, ne dia dimi Latuyalaka kambuta, mbata Khumadiondjo Latuyalaka.

¹⁵Khumadiondjo Latuyalaka kakutela, we Tura, ati: Undi, asenge hawudidima la lundju lʼekwelo kaye lamʼakhuma wane wayanga mvo akhumu, ndu lamʼambuyala adiakelu lʼatei aye?

¹⁶Ewandji tshe wa lu asenga wayuhulo uma lu kiti yawo ya waulelu, wayukulula ekutu wa nemo, wayukulula ahondo awo wʼasangu asangu. Vo wayuyakumba la woma, wayudjase lu kete, wayudidimaka tena tshe, wayukashimo lu dikambu diaye.

¹⁷Vo wayulela lu dikambu diaye, wata vati: Ndi wuhu ambuyala usumba wa lukumu, Wakaladi antu wakeyaka ashi a wuki li! Usumba waki wulu lʼumamu wʼashi, wambulanyema! We ambulanyema kame la antu aye, We lakutshaka wane tshe waki lu kete ya wuki woma wa mamba.

¹⁸Kakiane asenga wambudidima lushi lʼekwelo kaye, Ee, asenga weli lʼatei wʼashi a waki, Wambundama la woma, ne dia ekumelu kaye.[55]

¹⁹Latuyalaka, Unyashungu, kata okone ati: Lamʼayumukete usumba wʼelanyelu, uku usumba waha la antu, lamʼayumumbiya ashi a wuki ladiku diaye dia vo nkukumba,

²⁰dimi layukukadja kame la wane watuholoka utsha lu Difuku, le antu wʼedjedja. Dimi layukukitsha lʼokongo wa kete, lu ahuli wakalanyema pundju, kame la wane watuholoka utsha lu Difuku, dia we ntshikala tongo, aha ndjala la dihuli lu kete ya wasena.

²¹Dimi layukete anyanya, we huyala ntu.[56] Kuyanga antu wayukuyanga, vo hawukutana pundju, mbata Khumadiondjo Latuyalaka.