Read tetala Ezekiyele 28 Bible Online

Ezekiyele 28 - tetala bible

Ezekiyele 28

¹Diui dia Latuyalaka diakayi le mi ati:

²Onʼa untu, uteli uwandji wa Tura wati: Khumadiondjo Latuyalaka kata ati: Ne dia utema aye ambuyala la utaku, Ku we akati wati: Dimi leko etemolatemola kemotshi, Dimi mbidjaseka lu kiti ka ditemolatemola, Kʼatei atei wʼashi a waki. Keli we eko paka untu, aha etemolatemola, Kuyanga mbatuyuyakanaka weme Kanga yimba uku etemolatemola kemotshi —

³Mete, we ndeka Danyele yimba; Nduku dikambu dia usheshe diukushami.

⁴Uma lu yimba yaye la ewu kaye, Mbakayakundja ekundji, Mbakayadji paunyi la fesa lu waumbelu aye.

⁵Uma lu wuki wa yimba yaye yʼukanda, Mbambuyuyafudia ukundji aye. Uma lʼukundji aye, mbambuyuyambiya lʼutema.

⁶Diako mbata Khumadiondjo Latuyalaka ati: Ne dia we atuyakanaka wati: Unyashungu kemi,

⁷Mbayumutuma asi wedja dia nkolosha, Wudja wuleki ngala lʼatei a wedja. Vo wayosomola tombo tawo Dia ndosha yimba yaye ya mamba, Vo wayulanya dimena diaye.

⁸Vo wayukuhuluya utsha lu Difuku, We ayuvo lʼatei wʼashi a waki Uku wane watuwudiakaka la dihumo.

⁹Undi, we ayuyata ntu la ntundu kʼundjaki aye Wati: Dimi keli Unyashungu? We kema Unyashungu, we eko paka untu Lu anya wa one lakudiaka.

¹⁰We ayuvo nyoi ka wane Wahatahema uhekeli, lu anya wʼasi wedja, Ne dia dimi lakati, Mbata Khumadiondjo Latuyalaka.

¹¹Diui dia Latuyalaka diakayi le mi ntu ati:

¹²Onʼa untu, uleli lu dikambu dia khumʼekanga ka Tura. Utuwuteli wati: Khumadiondjo Latuyalaka kata ati: We kakakumi lʼuluwanyi tshe Lu yimba ndu lu dimena.

¹³We aki lu Edena, ekambo ka Unyashungu. We akayakumbi la wehu tshe wʼave wʼushinga a wulu: Dive dia tilili, diʼendondo, dia pesopeso, Diʼekesekese, diʼetukutuku, diʼawadi awadi, Diʼeleselese la diʼekesekese, la paunyi. Yimba ya ntsha ngomo yaye la pungi yaye yaki le ye; Lu lushi lakayatungama, mbakawalongoswama.

¹⁴Dimi lakakukitsha okeruba wakasonwama ulami. We aki ladiku diʼukungu wʼekila wa Unyashungu, We akakendakendaka lʼatei wʼave wakatumba esasi,

¹⁵We aki uluwanyi lu mbuka yaye. Uma lu lushi lakayatungama, Edja ndu lamʼakayatanema la kolo.

¹⁶Uma lu efula kʼukanda aye, Mbakawakuludia la ngala, Mbakayatshi kolo. Diako mbamumukukadja Uku engo kʼanyanya uma lʼukungu wa Unyashungu; Mbamumukulanya, we okeruba, ulami; Mbamumukunya uma lʼatei wʼave watutumbaka usasi.

¹⁷We akayambiya lʼutema ne dia dimena diaye; Uma lu ngaingai kaye, mbakayalanya yimba yaye. Dimi lakakukadja la kete, Lakakutundja la ntundu ka khumi ya dikanga.

¹⁸Uma lu efula ka kolo yaye, Ndu uma lu lukesu lʼukanda aye, Mbakayafutanya temwelo diaye. Diako mbamumuhetsha dja Lʼatei aye dia yo nkutshumba. Dimi lambukukadimula utuku Lu ashu a waku tshe watukendakendaka.

¹⁹Waku tshe watukeyaka lʼatei a wedja, Wayukashimo dikambu diaye. We ambuyala anyanya, we huyala ntu pundju.

²⁰Diui dia Latuyalaka diakayi le mi ntu ati:

²¹Onʼa untu, ediya ashu utsha lu Sidona. [58] Uti diui lu dikambu diawo,

²²Wati: Khumadiondjo Latuyalaka kata ati: Ulungi, dimi layendana la ye, we Sidona! Dimi layutumbwama lʼatei aye. Ku antu wayeya vati: Dimi keli Latuyalaka, Lamʼayumulumbuya Sidona, Ndu lamʼayumenya ekila kami lʼatei awo.

²³Dimi layatumela elandu, Layokedia dikila lu esese awo. Yombo yayuya lu beke tshe dia ndjalosha. Yo yayatshika edu kalakala lʼatei awo, Ku vo wayeya vati: Dimi keli Latuyalaka.

²⁴Nduku tende diatuhikanaka, diayuyala le khumbu ka Isariyele ntu, kuyanga dungu diatuhumuyaka dia waku wadinei, wakawaonyolaka. Ku vo wayeya vati: Dimi keli Khumadiondjo Latuyalaka.

²⁵Khumadiondjo Latuyalaka kata ati: Lamʼayumusanganya khumbu ka Isariyele uma lʼatei a wedja tshe wakamadianganya lʼatei awo, dimi layakidia la ntundu ka wedja tshe, ku vo wayudjase lu kete yawo hita, yakamasha ukambi ami Jakoba.

²⁶Vo wayudjase la lutui tshitshi, wayuhika mvudu, ndu wayune ekodi wa vinyo. Vo wayudjase la lutui tshitshi lamʼayumulumbuya waku tshe wadingi, ndu watasuyaka. Ku vo wayeya vati: Dimi keli Latuyalaka, Unyashungu awo.