Read tetala Ezekiyele 29 Bible Online

Ezekiyele 29 - tetala bible

Ezekiyele 29

¹Lʼeleku ka dikumi, lu lushi la dikumilʼahendila ngondo ka dikumi, diui dia Latuyalaka diakayi le mi ntu ati:

²Onʼa untu, edia ashu aye utsha lu Farayo, khumʼekanga ka Edjibitu. Uti akambu wahatayi lu dikambu diandi ndu lu dikambu diʼasi Edjibitu[59] tshe.

³Uwateli wati: Khumadiondjo Latuyalaka kata ati: Enda, dimi layendana la ye, We Farayo, khumʼekanga ka Edjibitu, Shimiamba latetamaka lʼatei a ndjali yato, Latutaka ati: Ndjali kami hita, Dimi kakakitungi dikambu diami dime.

⁴Dimi layudja todi lu manga yaye, Layotshiya nsi ya lu okedi aye lu akamba aye. Dimi layukutundja uma lʼekedi aye, Kame la nsi tshe yeli loko lu akamba aye.

⁵Dimi layukukadja lʼusui wa shenga, We la nsi tshe ya lu ekedi aye. We ayoko lʼusui wa hwe. We hembama kana nkhundema. Dimi lambukukimo dia we ndjala engo ka nde Ka nyama ya la kete la fudu ya lʼulungu.

⁶Ku asi Edjibitu tshe wayulimbitela vati: Dimi keli Latuyalaka, ne dia vo waki uku ohehela wa sopo[60] le khumbu ka Isariyele.

⁷Lamʼakawakundi lu anya, we akahoso, ku we akokola aheka awo tshe. Lamʼakawakekama, we akayatshatsha, ndu akadidimia ashu awo tshe wʼe-kongo.

⁸Okone Khumadiondjo Latuyalaka kata ati: Enda, dimi lutsha nkutumela yombo, dia nshila antu la nyama yeli lʼatei aye ushiki.

⁹Kete ya Edjibitu yayuyala tongo la shenga tshu. Ku vo wayeya vati: Dimi keli Latuyalaka. Ne dia we kakati wati: Nile kami hita keto, dimi kakakitungi.

¹⁰Okone dimi layendana la ye, we la ndiali yaye. Layete kete ya Edjibitu shenga la atongo atu, uma la Mingidolo pulu ndu la Siyene, edja ndu lʼulelu wa Etiyopiya.

¹¹Nduku na diʼuntu kuyanga dia nyama diayenema leko; nduku untu layutshikala leko edja ndu enonyi akumi anei.

¹²Dimi layete kete ya Edjibitu tongo tu lʼatei a kete yeli atongo. Esumba awo wayuyala atongo atu enonyi akumi anei lʼatei wʼesumba wakawalanya. Dimi layudianganya asi Edjibitu lʼatei a wedja, layahandjula lu kete tshe.

¹³Khumadiondjo Latuyalaka kata ati: Lʼokongo wa enonyi akumi anei, dimi layusanganya asi Edjibitu uma lʼatei a wedja wakamadianganya.

¹⁴Dimi layukaluya fumbi ya Edjibitu, layakaluya lu kete ya Paterose, lu kete yakawuto. Vo wayutuyala diulelu dia tshitshe leko.

¹⁵Vo wayuyala diulelu diuleki tshitshe, hawuyala ladiku dia wedja ekina. Dimi layakitshakitsha diaha vo mbulela wedja.

¹⁶Vo hawuyala la ekamelu ntu le khumbu ka Isariyele, hawuwauhula kolo kawo lamʼayuwukalula dia mbakimanyia. Ku vo wayeya vati: Dimi keli Khumadiondjo Latuyalaka.

¹⁷Lʼeleku kʼakumi ahendi lʼesambeli, lu lushi la ntundu la ngondo, diui dia Latuyalaka diakayi le mi ntu ati:

¹⁸Onʼa untu, Nebukadineza, khumʼekanga ka Babilona, akakambia alimbi andi ulimu a wulu dia ndosha Tura: ete awo tshe awandji atu, la aheka awo tshe puta tshu. Ndi la alimbi andi kombosa nduku engo uma la Tura lʼulimu wakawatshi dia mbalosha.

¹⁹Diako mbata Khumadiondjo Latuyalaka ati: Nyulungi, dimi layukimo kete ya Edjibitu le Nebukadineza, khumʼekanga ka Babilona. Ndi ayotola ekundji, ayahotola diango lohotola, ayumba diango diawo; oso ayuyala difutu diʼalimbi andi.

²⁰Dimi lambuwusha kete ya Edjibitu uku difutu diʼulimu wakandatshi dia ndosha Tura, ne dia vo wakankambela ulimu, mbata Khumadiondjo Latuyalaka.

²¹Lu lushi loso, dimi layusha khumbu ka Isariyele wulu, layukudihula unyo lʼatei awo; ku vo wayeya vati: Dimi keli Latuyalaka.