Read tetala Ezekiyele 30 Bible Online

Ezekiyele 30 - tetala bible

Ezekiyele 30

¹Diui dia Latuyalaka diakayi le mi ntu ati:

²Onʼa untu, uti akambu wahatayi wati: Khumadiondjo Latuyalaka kata ati: Nyukhumi akhumu lu lushi lone la lunyangu!

³Ne dia lushi lako laya suki, Lushi la Latuyalaka laya suki, lushi la wangi. Lo layuyala etena ka wedja tshe.

⁴Yombo yayuyala le Edjibitu, La sasi diayuyala le Etiyopiya Lamʼayukalema edu kalakala lʼEdjibitu. Vo wayotola ekundji awo, Ku atshina awo wayunyukwama.

⁵Asi Etiyopiya, asi Puta, asi Luda, asi Arabiya tshe, la asi Libiya, la wedja tshe wadingi, wayudiakema kame la wo la yombo.

⁶Latuyalaka kata okone ati: Ekimanyidi wʼasi Edjibitu wayudiakema, La utaku a wulu awo wayushila. Uma la Mingidolo pulu la Siyene wayudiakema la yombo, Mbata Khumadiondjo Latuyalaka.

⁷Vo wayulanyema lʼatei a wedja wakawalanya. Esumba awo wayulanyema Uku akawalanya esumba ekina.

⁸Ku vo wayulimbitela vati: Dimi keli Latuyalaka, Lamʼayumohetsha dja lʼEdjibitu, Ndu lamʼayumushila ekimanyidi awo tshe ushiki.

⁹Lushi loso dimi layutuma akendji ami lu mashua dia mbuʼsha asi Etiyopiya woma. Sasi diayuyala le wo uku aki lushi lʼEdjibitu, ne dia akambu aso wayuyala.

¹⁰Khumadiondjo Latuyalaka kata ati: Dimi layushisha antu efula lu Edjibitu, Lu lunya la Nebukadineza, khumʼekanga ka Babilona.

¹¹Ndi la wudja andi, La akanga a ngala lʼatei a wedja, Wayutumama dia nanya kete. Vo wayosomola tombo tawo dia ndosha Edjibitu, Ku kete yayulula too la edu wʼantu wayudiakema.

¹²Dimi layumia tokoko; Layukimo wudja lu anya wʼantu wa kolo. Dimi layulanya kete la diango dieli loko Lu anya wʼangendangenda; Dimi Latuyalaka kata.

¹³Khumadiondjo Latuyalaka kata ati: Dimi layulanya dikishi, layunya difanelu uma lu Memifisi Nduku khumʼekanga kayuyala lʼEdjibitu ntu. Dimi layutshulula ududu wa kele kami Lu kete ya Edjibitu.

¹⁴Dimi layulanya Paterose, Layutshumba Zoana dja, Layulumbuya Tebese.

¹⁵Dimi layutshulula kele kami lu Pelusiyume, Usumba a wulu wa Edjibitu. Dimi layudiaka ului wʼantu wa lu Tebese.

¹⁶Dimi layutshumba Edjibitu la dja Pelusiyume ayuyala la okei a wulu; Peli dia Tebese diayutshikala hwe hwe. Peli diawo diayunyukwama.

¹⁷Elongo wʼapami wʼasi One La wʼasi Pi-Besite wayudiakema la yombo, Ku amantu wayotolama lu fumbi.

¹⁸Yanyi yayuyala udjima lu Tehafinehese, Lamʼayumuhimbula lokoho la Edjibitu, Ku utaku a wulu awo wayushila. Dingi diayukumba Tehafinehese, Ku anʼawo wʼamantu wayotolama lu fumbi.

¹⁹Dimi layulumbuya wa lʼEdjibitu, Ku vo wayulimbitela vati: Dimi keli Latuyalaka.

²⁰Lʼeleku ka dikumi la otoi, lu nshi esambeli, la ngondo ka ntundu, diui dia Latuyalaka diakayi le mi ati:

²¹Onʼa untu, dimi lakokola lunya la Farayo, khumʼekanga ka Edjibitu. Enda, lo latalongoswama, wataludji ukanga dia lo nkono, watalombe dihondo, dia lo ndjala la wulu wa nkimela yombo.

²²Diako mbata Khumadiondjo Latuyalaka ati: Enda, dimi layendana la Farayo, khumʼekanga ka Edjibitu. Dimi layuwokola anya ako ahendi: lono leki la wulu ndu lone lakoko. Ku dimi layukusha yombo uma lu lunya landi.

²³Dimi layuhandjula asi Edjibitu lʼatei a wedja, layuwadianganya lu kete tshe.

²⁴Dimi layukikitsha anya wa khumʼekanga ka Babilona, layukitsha yombo yami lu lunya landi. Dimi layokola anya wa Farayo, ku ndi ayukhuma akhumu la ntundu kandi uku akhumu wʼuntu lakahumwi, layanga mvo.

²⁵Dimi layukikitsha anya wa khumʼekanga ka Babilona, ku anya wa Farayo wayola. Ku vo wayulimbitela vati: Dimi keli Latuyalaka, lamʼayumudja yombo yami lu lunya la khumʼekanga ka Babilona. Ku yo yayukalula dia ndosha kete ya Edjibitu.

²⁶Dimi layuhandjula asi Edjibitu lu wedja, layadianganya lu kete. Ku vo wayulimbitela vati: Dimi keli Latuyalaka.