Read tetala Ezekiyele 31 Bible Online

Ezekiyele 31 - tetala bible

Ezekiyele 31

¹Lʼeleku ka dikumi lʼotoi, lu ngondo ka satu, lu lushi la ntundu la ngondo kako, diui dia Latuyalaka diakayi le mi ati:

²Onʼa untu, umbuli Farayo, khumʼekanga ka Edjibitu, la antu andi wati: Akona edimiye la ndi lu wuki aye?

³Enda, usi Asuriya aki usasi wa la Lebanona, La tahi yʼamena, pukaa uku ukunda ndu utali efula; Sodi kawo kakakumaka pulu lʼatei a wangi.

⁴Ashi efula wakuhamia, ehongo wakawudia, Ndjali kakakelaka lʼutshimba wa dihuli diakawunami. Ku tokedi tawo takakumaka lʼetamba tshe wa lʼekambo.

⁵Okone vo wakuli utali Ndeka etamba ekina tshe wa lʼekambo; Tutahi tawo takafulanela; Tahi yawo yakasimbemala Uma lʼefula kʼashi kakawalungulaka.

⁶Fudu tshe ya lʼulungu yakalongaka kefu lu tahi yawo; Nyama tshe ya lʼusui yakutaka ana Lu dedi dia tahi yawo. Wedja a waki tshe wakadjaseka lu dedi diawo.

⁷Utamba ako waki dimena lu wuki awo, Ndu lu esimbemalelu ka tahi yawo, Ne dia ediu awo wakatshu pulu ndu lʼashi efula.

⁸Esasi wa lʼekambo ka Unyashungu[61] haweyi mbuleka. Tahi ya weoto la yʼetamba ekina Hayufanyi la tahi yawo. Nduku utamba ukina wa lʼekambo Ka Unyashungu wedimi la wo lu dimena.

⁹Dimi lakawete dimena uma lu efula ka tahi yawo. Okone etamba tshe wa lu Edena, Ekambo ka Unyashungu, wakawuki kandjema.

¹⁰Diako mbata Khumadiondjo Latuyalaka ati: Ne dia vo wakaleki mbula utali, la sodi kawo kakakumi lʼatei a wangi, ku utema awo aki la utaku ne dia utali awo.

¹¹Dimi layukimo utamba ako lu anya wa dihuka dia wedja; mete, ndi ayuwutshela uku eli ngala kandi. Dimi lakashili mbukadja.

¹²Angendangenda wuleki ngala lu wedja, wayokota, wayu-wukadja. Tahi yawo yakako lʼekungu ndu lʼekidi tshe, yo yakahimbuhimbuyama, la yakakadjema lu minga tshe ya wedja. Okone antu tshe wa la kete wakamo uma lu dedi diawo, wakoseke.

¹³Fudu tshe ya lʼulungu yayudjase ladiku dia elanyelu kawo, ndu nyama tshe ya lʼusui yayutsha atuka ayo lʼatei a tahi yawo,

¹⁴dia etamba tshe weli lasuki lʼashi tawulaki, ndu tawusimbulaki ete awo lʼatei a wangi; dia elungu tshe weli lʼashi tawuhamaki ndu tawulaki etali ndeka etamba ekina tshe wa lʼusui. Ne dia vo tshe wakakimwama dia nkotama la mbikadjema lu difuku, kame la ana wʼantu la wane watahulo utsha lu Difuku.

¹⁵Khumadiondjo Latuyalaka kata ati: Lushi layunduhulo utsha lʼUdimu a Pengandu, dimi layutshutshiya ashi dia vo ntsha utanda. Dimi layukumba ohongo lu dikambu diandi. Dimi layumia ndjali; ashi a waki wayemala; dimi layolotsha Lebanona ahondo wʼutanda. Okone etamba tshe wa lʼusui wayuma.

¹⁶Wedja tshe wayudidima uma lu lundju lʼekwelo kawo, lamʼayuwukadjema lʼUdimu a Pengandu, kame la wane watahulo utsha lu Difuku. Etamba tshe wa lu Edena, etamba tshe wakasonwama ndu wuleki amena wa Lebanona, tshe watoloyamaka lʼashi, wakasambama lu ahuli wa lʼesi a kete.

¹⁷Ndu vo wayuhulo la ndi utsha lʼUdimu a Pengandu, le wane wakadiakema la yombo; ee, wane wakadjaseka lu dedi diawo, lʼatei a wedja, wayulanyema.

¹⁸Akona edimi la ye lu lutumbu ndu lu wuki lʼatei wʼetamba wa lu Edena? We ayukadjema kame la etamba wa lu Edena lu ehongo wa la kete. We ayetama lʼatei a wane waki kumbahema uhekeli, kame la wane wakadiakema la yombo. Oso eli Farayo la ului andi wʼalimbi, mbata Khumadiondjo Latuyalaka.