Read tetala Ezekiyele 35 Bible Online

Ezekiyele 35 - tetala bible

Ezekiyele 35

¹Diui dia Latuyalaka diakayi le mi ntu ati:

²Onʼa untu, ediya elu-ndji kaye utsha lʼUkungu a Seire,[67] uti akambu wahatayi lu dikambu diawo.

³Uwuteli wati: Khumadiondjo Latuyalaka kata ati: We Ukungu a Seire, dimi layendana la ye. Dimi lambusimbe lunya lami ladiku diaye, layukete tongo la engo ka nkashimo.

⁴Dimi layulanya esumba aye, we ayuyala tongo tu; ku we ayeya wati: Dimi keli Latuyalaka.

⁵Ne dia we aki utunyi a wulu wʼasi Isariyele, akahenyahenya la yombo lu lushi lʼasui awo, ndu lʼetena kʼekumelu kʼasui awo.

⁶Diako mbata Khumadiondjo Latuyalaka ati: Uku wemi la lumu! dimi layukukitsha lu dikila, ku dikila diayuku-yela, ne dia we la unungu lu dikambu dia dikila. Osoku dikila diayukuyela.

⁷Dimi layete Ukungu a Seire engo ka nkashimo la tongo tu. Dimi layunya wane tshe watuyakaka, la wane watutshokaka leko.

⁸Dimi layuludia wane wayudiakema la tombo lu ekungu aye, lu akuna aye, lu ekidi aye, ndu lu ekedi aye tshe.

⁹Dimi layukete tongo pundju, esumba aye hawuyala la antu; ku nyu nyayeya nyati: Dimi keli Latuyalaka.

¹⁰Ne dia we akati wati: Wedja ene ehendi, la kete nye hyendi yayuyala yami, shu tayuyikita, kuyanga mbaki Latuyalaka leko,

¹¹diako mbata Khumadiondjo Latuyalaka ati: Uku wemi la lumu! dimi layunyutshela la kele la ududu a wulu uku akanyawaenya luhetshu lanyu. Okone dimi layuyaenya lʼatei anyu, lamʼayumunyulumbuya.

¹²We ayeya wati: Dimi Latuyalaka lakuki tengo tshe yakayatengaka ekungu wa Isariyele, ata wati: Vo wakalanyema, wakakimwama le su dia shu mbelanya.

¹³Nyu nyakayambiya lu dikambu diami lʼaui wʼuma lʼenyo anyu, nyakafudia aui anyu le mi, dimi lakuki aui ako.

¹⁴Khumadiondjo Latuyalaka kata ati: Lamʼayuyala kete tshe la ongenongeno, keli we, dimi layukete tongo.

¹⁵Uku akiye lu ngenangena lu dikambu dia ukito wa khumbu ka Isariyele wakalanyema, wuhu ako mbayumukutshela. We Ukungu a Seire ayuyala tongo tu, we la Edome tshe; ku vo wayeya vati: Dimi keli Latuyalaka.