Read tetala Ezekiyele 39 Bible Online

Ezekiyele 39 - tetala bible

Ezekiyele 39

¹We onʼa untu, uti akambu wahatayi lu dikambu dia Ngongo wati: Khumadiondjo Latuyalaka kata ati: Enda, dimi lutsha mendana la ye, we Ngongo, uwandji a wuki wa la Mesheke ndu wa la Tubala.

²Dimi layukukutula, layukolombola, layukutundja uma la kuma ka lu leke la ngelʼa kushi. Dimi layukukumia lu ekungu wa Isariyele.

³Dimi layokola uta aye uma lu lunya laye la lomoso, layokosha pitu yaye la pami.

⁴We ayoko lu ekungu wa Isariyele, we la wane tshe watukuyelaka ndu wane weli kame la ye. Ku dimi layunyukimo le wehu tshe wa fudu yatuhatulaka, ndu le nyama ya lʼukunda dia nyu ndjala mbu yawo ya nde.

⁵Nyu nyayutuvo lʼusui wa tshekelee, ne dia dimi lambuta, mbata Khumadiondjo Latuyalaka.

⁶Dimi layutuma dja lu Mangongo, ndu le waku wudjashi la lutui tshitshi lu emamu wʼashi; ku vo wayeya vati: Dimi keli Latuyalaka.

⁷Dimi layulimbitshiya wudja ami, Isariyele, lukumbu lami lʼekila, dimi handjetawo lukumbu lami lʼekila mbisanema ntu; ku wedja wayeya vati: Dimi keli Latuyalaka, lʼEkila lʼIsariyele.

⁸Enda, akambu ako wutsha ndja; vo wayutshama, oso eli lushi lakamataka, mbata Khumadiondjo Latuyalaka.

⁹Wane wudjashi lʼesumba wa Isariyele wayutumba, wayete dihumo kunyi, dingawu dia tshitshe ndu dia waki, eta la pitu, ndu esongo la akonga, wayuditshumba. Vo wayudidjaka lu dja deku esambeli.

¹⁰Vo hawunaka kunyi uma lʼusui, hawunyukula etamba wa lʼukunda, ne dia vo wayongonyaka kunyi ya dihumo. Vo wayusuya waku wakasuyaka. Vo wayohotola diango uma le waku wakahotola diango, mbata Khumadiondjo Latuyalaka.

¹¹Lu lushi lako, dimi layusha Ngongo dihuli diʼekhundelu lu Isariyele, lʼukidi watetetaka antu lu leke lʼehutwelu ka unya lʼuduwa. Dihuli diako diʼekhudelu diayudihela ambetshetshi mbuka. Leko kayuwukhunde Ngongo la ului andi tshe wʼantu. Vo wayetaka dihuli diako vati: Ukidi wa Hamona-Ngongo (kitshimudi ati: Ukidi wʼului wʼasi Ngongo).

¹²Khumbu ka Isariyele ayakhunde ngondo esambeli, dia mbedia kete.

¹³Antu tshe wa lu wudja wayuwakhundeka, ku vo wayuyala la nemo lushi layumutumbwama, mbata Khumadiondjo Latuyalaka.

¹⁴Vo wayosonola antu wayukambaka nshi tshe lʼulimu one wa mbeteta lu kete la nkhunde waku wambutshikala ladiku dia kete, dia yedia. Ku lʼokongo a ngondo esambeli etundu, vo wayuyangiayangia.

¹⁵Vo wayukindula lu kete, ku lamʼayena untu omotshi dikandja diʼuntu, ndi kadji djimbitelu laawo, edja ndu lamʼayudikhunde akhundanyi lʼUkidi wa Hamona-Ngongo.

¹⁶(Usumba wa Hamona weko ndu vo leko.) Wuhu oso mbayuwedia kete.

¹⁷Khumadiondjo Latuyalaka kata ati: We onʼa untu, uteli wehu tshe wa fudu la wa nyama wati: Nyomote, nyusangani uma lu beke tshe; nyuyi lʼulambu wayangami nyulambula, ulambu a wuki ladiku diʼekungu wa Isariyele, dia nyu nde emunyi la no dikila.

¹⁸Nyu nyayole emunyi wʼahuka, nyayono dikila diʼewandji wa la kete, ekoko a waumi, ana wʼekoko, mbudi, esongo wa ngombe; yo tshe enunyu etu uma la Bashana.

¹⁹Nyu nyayole wata edja ndu nyambuluta, nyayono dikila edja ndu nyu nyambudjo lʼulambu wamumunyulambula.

²⁰Nyu nyayuluta lʼemunyi wa falasa, wʼambahemi wa falasa, wʼahuka ndu wa wehu tshe wʼalimbi, uma lu mesa ami, mbata Khumadiondjo Latuyalaka.[73]

²¹Dimi layukitsha lutumbu lami lʼatei a wedja, ku wedja tshe wayena elumbwelu kami kayumutsha, ndu lunya lami layumukitsha ladiku diawo.

²²Umaka lushi loso edja ndu lu nshi yayayi, khumbu ka Isariyele wayeya vati: Dimi keli Latuyalaka, Unyashungu awo.

²³Wedja wayeya vati: Khumbu ka Isariyele wakatolama lu fumbi ne dia uhedia awo. Vo wakantombokwela, mbakamashe elundji kami uma le wo, ndu mbakamakimo lu anya wʼatunyi awo, dia vo tshe ndjakema la tombo.

²⁴Dimi lakatshela uku mindu yawo la ehedia awo, lakashe elundji kami uma le wo.

²⁵Okone Khumadiondjo Latuyalaka kata ati: Dimi lutsha nkaluya Jakoba uma lu fumbi, lambuka utundu wa khumbu ka Isariyele tshe ketshi. Dimi layuyala la kandjema uma lu lukumbu lami lʼekila.

²⁶Vo wayuhela sonyi kawo, la ehedia awo tshe wakawampediaka, lamʼayuwudjase la lutui tshitshi lu kete yawo; nduku lahenyahenya.

²⁷Lamʼayumakaluya uma lʼatei a wedja, lamʼayumasanganya uma lu kete yʼatunyi awo, dimi layukidiama lʼatei lu ashu wa wedja efula.

²⁸Vo wayeya vati: Dimi leli Latuyalaka, Unyashungu awo, ne dia dimi lakatole lu fumbi lʼatei a wedja, ndu lambasanganya lu kete yawo hita. Dimi halutshika nduku otoi awo lʼatei a wedja.

²⁹Dimi halushe elundji kami uma le wo ntu, ne dia dimi lambahe khumbu ka Isariyele Nyuma kami, mbata Khumadiondjo Latuyalaka.