Read tetala Ezekiyele 4 Bible Online

Ezekiyele 4 - tetala bible

Ezekiyele 4

¹We onʼa untu, ose etshi ka lukinga, ukikitsha la ntundu kaye. Usanguli usatu wa Jerusalema loko.

²Udingi, utshi wumbe, utshimi lungeli dia ndo la wo. Ukitsha lalu lʼutshimba tshe, ukitsha ndu dihumo dia ta.

³Ose panu ka luwulu, ukikitsha uku eheli ka luwulu lʼasaye la usumba. Ediya elundji kaye utsha leko, udingi usumba dia vo nyingama kwi. Dikambu ne diayali djimbitelu le khumbu ka Isariyele.

⁴Etami lu luhandju la lomoso. Dimi lutsha nkahela kolo ka khumbu ka Isariyele. Uku efula ka nshi yayuyetama lu luhandju lako, mbayuyuwaembela koloyawo,

⁵ne dia dimi lambukosonwela nshi kama shatu la akumi divwa yedimi la efula ka deku diʼasui awo. Osoku mbayuyembela khumbu ka Isariyele asui awo.

⁶Lamʼayuyushidiya akambu ane, ketami lu luhandju la pami, ku we ayembela khumbu ka Juda asui awo nshi akumi anei. Dimi lambukosonwela lushi otoi lʼote wʼeleku otoi.

⁷Ediya elundji kaye utsha lʼusatu wa Jerusalema, usimbuli lunya laye laha la dihondo, utaki akambu wahatayi dikambu diʼusumba.

⁸Enda, dimi lutsha nkukeleka ekodi, we hukadimo uma lu luhandju lomotshi utsha lu luhandju lukina, edja ndu lamʼayuyushidiya nshi yʼedingelu kaye kʼusu-mba.

⁹Ose epunga wa menge, wa yelela, la konde, djese, asami, la ahoho, uwadji tshe lu puki otoi. Udiete mbu ya nde yukuki efula ka nshi yayuyetama lu luhandju. Nshi kama shatu la akumi divwa mbayuyudile.

¹⁰We ayolekaka ma yediko ya wutshu wa toshekele akumi ahendi la lushi la lushi. Kolekaki etena otoi la lushi la lushi.

¹¹We ayonokaka ashi yediko ya etenyi otoi kʼasamalu ka hina la lushi la lushi. Konokaki etena otoi la lushi la lushi.

¹²We ayolekaka ma diako uku ekati wʼepunga wa menge. We ayekateka la ntundu kʼantu lu dja yohetshami la tumi tʼantu.

¹³Latuyalaka ikati ati: Ukuku mbayolekaka asi Isariyele ma diawo mindu lʼatei a wedja wayumuwatshanya.

¹⁴Ku dimi lakati nti: Hai, Khumadiondjo, Latuyalaka! enda, dimi latayalanya. Umaka nshi yami ya dikenda, dimi latali nyama kambuvo usena, kana nyama kambundama le nyama ka ngala. Unatshi wa wononyi watoto lu unyo ami.

¹⁵Ku ndi akamvutela ati: Enda, dimi lutsha nkusha tumi ta ngombe lu dihuli dia tumi tʼantu, dia we nkate ekati aye ladiku diato.

¹⁶Ndi akamvutela ati: Onʼa untu, enda, dimi lutsha nanya ekundjelu ka ma lu Jerusalema. Vo wayolekaka ma paka yediko ya tshitshe, wuludi to la woma. Vo wayonokaka ashi lu tediko ta tshitshe, wasaka lukumba.

¹⁷Dimi layutsha dikambu ne dia vo mpumba ma la ashi, la dia vo mendana wasaka lukumba, ndu dia vo monda la uhedia awo.