Read tetala Ezekiyele 44 Bible Online

Ezekiyele 44 - tetala bible

Ezekiyele 44

¹Ndi akakalula la mi utsha la suku dia lʼandja wʼetemwelo diakeledi lu leke lʼehutwelu. Keli dio diaki khu.

²Latuyalaka akamvutela ati: Suku ne diayudihama, dio hadiudiho, nduku untu ayoto loko. Dio diayutshikala khu, ne dia Latuyalaka, Unyashungu wa Isariyele, akoto loko.

³Paka uwandji kayudjase laawo dia nde ma la ntundu ka Latuyalaka. Ndi ayotoka uma lu mbuka ka mbalasa ka la suku, ku ndi ayutumbaka lu mbuka kako.

⁴Ndi aketi la mi uma lu suku dia lu leke la ngelʼa kushi, akantole la ntundu ka etemwelo. Dimi lakedia ashu, menyi ku lutumbu la Latuyalaka lakaludi lu etemwelo ka Latuyalaka; ku dimi lakako ekhukhumadi la kete.

⁵Latuyalaka akamvutela ati: Onʼa untu, udji tukanyi lu dikambu ne, endi la ashu aye, uki lʼatui aye akambu tshe wayangami nkutela lu dikambu dia adjangu tshe la elembe tshe wʼetemwelo ka Latuyalaka. Udjaki tukanyi taye lu eotwelo kʼantu lu etemwelo, ndu lu atumbelu awo tshe uma lʼetemwelo.

⁶Uteli akanga wʼuhindudi, khumbu ka Isariyele, wati: Khumadiondjo Latuyalaka kata ati: Lu dikambu dia akambu anyu tshe wa wononyi, nyu khumbu ka Isariyele, ambukuka!

⁷Nyu nyakotshiya asi wedja wahatalongosola etema awo ndu wahatahema ehekeli lu etemwelo kami dia nkisanya lamʼakanyalambula ma, wata, la dikila. Nyu nyakalanya sheki yami la akambu anyu tshe wa wononyi.

⁸Nyu kuntsha ulimu la diango diami diʼekila. Keli nyu nyakakitsha asi wedja lu ahuli anyu, dia vo ntsha ulimu lu etemwelo kami.

⁹Khumadiondjo Latuyalaka kata ati: Lʼatei wʼasi wedja wudjashi lʼatei wʼasi Isariyele, usi wudja, lahatalongosola utema ndu lahatahema uhekeli, totoki lu etemwelo kami.

¹⁰Keli asi Lewi wakanganela etali uma le mi, dia ntemola dikishi diawo lamʼakanganela asi Isariyele, wayusuwa ne dia kolo kawo.

¹¹Vo wayuyala ekambi lu etemwelo kami, wayulamaka asuku, wayutshaka ulimu lu etemwelo. Vo wayudiaka nyama yʼelambu wa lutshumba ndu nyama yʼelambu ne dia wedja. Vo wayemalaka la ntundu kawo, dia mbatshela ulimu.

¹²Vo waka-kambelaka antu ulimu la ntundu ka dikishi diawo, wakayala utamba a ntakanya wa kolo la ntundu ka khumbu ka Isariyele, diako mbamumusimbula lunya lami utsha le wo. Vo wayusuwa ne dia kolo kawo, mbata Khumadiondjo Latuyalaka.

¹³Vo hawusukanaka le mi, dia ntsha ulimu ami wʼolombedi. Vo tawusukanaki la diango diami diʼekila, la diango diuleki ekila. Keli vo wayutshama sonyi ne dia akambu wa wononyi wakawatshaka.

¹⁴Dimi layuwasha okende wʼetemwelo, ku vo wayutshaka ulimu ato tshe la akambu tshe wayuhumbama ntshama loko.

¹⁵Keli elombedi wʼasi Lewi, tukanula ta Zadoka, wakatshaka ulimu lu etemwelo kami lamʼakanganela asi Isariyele uma le mi, mbayusukanaka le mi dia ntshelami ulimu; vo mbayemalaka la ntundu kami dia nambulami wata la dikila, mbata Khumadiondjo Latuyalaka.

¹⁶Vo mbayotoka lu etemwelo kami, vo mbayusukanaka lu mesa ami dia ntshelami ulimu; vo mbayuyalaka lʼulimu ami.

¹⁷Lamʼayuwotoka lu asuku wa lu seke dia lʼetei, kawolotaki eloto wa linene. Vo tawolotaki nduku oloto wa diosa diʼokoko lamʼayuwutshaka ulimu lu asuku wa lu seke dia lʼetei, ndu lʼatei.

¹⁸Kawaheki tufulefule ta linene lu ete, kawolotaki ehaku lu kindi yawo.[80] Tawolotaki eloto lu kindi, wuhu wukuki mbatumbia diangasa.

¹⁹Lamʼayuwutumbaka utsha lu seke dia lʼandja le antu, kawukululaki eloto awo watuwutshaka ulimu, kawuki-tshaki lu tundju tʼekila,[81] ku vo ndota eloto ekina, ne dia watukukidia antu la eloto awo.

²⁰Tawunyaki toholo lu ete, ndu tawuduyaki avu awo,[82] keli kawudiahulaki lahula.

²¹Olombedi tshe, tanokaki wanu lamʼayundotoka lu seke dia lʼetei.[83]

²²Elombedi tawutshukaki wadi aki udu kuyanga umuntu losekiwo. Keli kawutshukaki esekaseka wa dimuma wʼuma lu khumbu ka Isariyele, kana wadi aki olombedi wakavu.[84]

²³Kawetshaki wudja ami etshikitanelu ka engo kʼekila la engo kaha ekila; kawalimbi-tshiyaki dia ntshikitanya engo keli mindu la engo keli pudipudi.[85]

²⁴Vo wayuyala embadi lu akambu wa tamu, kawulumbuyaki uku elembe ami. Kawulamaki ndu elembe ami la adjangu ami lu nshi ya waki tshe yakamashikike; kawolemiaka nshi yami ya mumuya.

²⁵Olombedi tshe tasukanaki lasuki la udu, ne dia atukuyasanya.[86] Ndi mbeyaka ndjasanya lu dikambu dia shi kana nyangu, onʼandi la pami kana la umuntu, onangu kana kadiyendi laha la umi.

²⁶Lʼokongo wʼedielo kandi, kawuwaleli nshi esambeli.

²⁷Ku lushi layundoto lʼetemwelo, lu seke dia lʼatei dia ntsha ulimu lʼetemwelo, kalambuli ulambu wa kolo, mbata Khumadiondjo Latuyalaka.

²⁸Vo hawuyala nduku la etenyi kʼukito: dimi keli etenyi kawo kʼukito. Tanyuwashaki nduku sangu lu Isariyele: dimi keli sangu dia wo.[87]

²⁹Kawolekaki elambu wa shima, elambu wa kolo, ndu wʼefutelu kʼunungu; ndu diango tshe diayukidiama lu Isariyele, diayuyala diawo.

³⁰Elonga tshe wa diango dia dinela, la wehu tshe wa elambu wayuwulambula, wayuyala wʼelombedi. Kanyushaki elombedi elonga wa shima ya pudipudi, dia etshoko ndjala lu luudu lanyu.[88]

³¹Elombedi tawolekaki fudu kana nyama kakavu usena, kana kakandama le nyama ka ngala.[89]