Read tetala Ezekiyele 5 Bible Online

Ezekiyele 5 - tetala bible

Ezekiyele 5

¹We onʼa untu, ose yombo ya mpemo efula, yeli la diesa uku luhayu, unya divu la loledu. Lʼokongo diku ose kilo ka mbedika, ukahanya divu.

²Kutshumbi etenyi ka satu ka divu lʼatei wʼusumba lamʼayuyushidiya nshi yʼedingelu; kose etenyi ka satu kadio kudihimbuhi-mbuya la yombo lʼutshimba wʼusumba; kudianganya etenyi ka satu lu lopepe, ku dimi layosomola yombo dia ndjelana la dio.

³Kose weondji emotshi, kekeleki lu ehimbu wʼukutu aye.

⁴Kose weondji emotshi ntu, kuwekadja lu dja, ketshumbi. Uma loko kayutumba dja utsha le khumbu tshe ka Isariyele.

⁵Okone mbata Khumadiondjo Latuyalaka ati: Oso eli Jerusalema. Dimi lambukitsha lʼatei a wedja ndu kete yeli lʼutshimba awo tshe.

⁶Vo wakahedia elembe ami dia ntsha kolo uleki wedja ekina, waka-tuni adjangu ami uleki waulelu weli lʼutshimba awo. Vo wakatuni elembe ami, kundjela adjangu ami.

⁷Nyu nyakaleki wedja weli lʼutshimba anyu ntombokwelami. Nyu kundjela elembe ami kuyanga adjangu ami. Undi, nyu kundjela elembe wa wedja weli lʼutshimba anyu?

⁸Diako mbata Khumadiondjo Latuyalaka ati: Enda, ndu dimi dime layendana la nyu; layunyulumbuya lu ashu wa wedja.

⁹Dimi lutsha nyutshela akambu wahamatatshi nduku lushi, ndu wuhu wahamatshaki pundju ne dia akambu anyu wa wononyi.

¹⁰Lʼatei anyu, ambutshi wʼapami wayole emunyi wa anʼawo wʼapami,[14] la ana apami wayole emunyi a washewo. Dimi layunyulumbuya, layuhandjula atshikadi lu beke tshe dia la kete.

¹¹Okone Khumadiondjo Latuyalaka kata ati: Uku wemi la lumu! ne dia nyu nyakalanya etemwelo kami la diango dianyu tshe dia sonyi la dia wononyi, diako mbayumunyudiaka. Ashu ami hawunyuhandja; dimi halunyuka ketshi.

¹²Etenyi ka satu kanyu kayuvo la elandu, la ndjala ka kasha kayashila ushiki lʼatei anyu. Etenyi ka satu kanyu kayudiakema la yombo lʼutshimba anyu. Dimi layuhandjula etenyi ka satu kanyu lu beke tshe dia la kete. Ku dimi layosomola yombo dia ndjelana la wo.

¹³Uma lu akambu aso mbayushila kele kami. Dimi layukumba kele kami le wo, layusambama. Ku vo wayeya vati: Uma lu saki kami, dimi Latuyalaka, kakamateketa lamʼakamawauki kele ka wulu.

¹⁴Dimi layunyete engo kʼelanyelu ndu engo ka dionyo lʼatei a wedja tshe weli lʼutshimba anyu, lu ashu tshe a wane watetaka lasuki la nyu.

¹⁵Lamʼa-yumunyulumbuya lu kele kami, ududu ami, la luhangu lami la wulu, nyu nyayuyala engo ka wononyi, engo ka mpongwela soi, engo ka mbewula antu, ndu engo ka nkashimo le wedja tshe weli lʼutshimba anyu. Dimi Latuyalaka kateketa.

¹⁶Akambu ane wayuyala lamʼayumunyuka pitu yami ya kolo ya ndjala ka kasha ndu yʼelanyelu; layunyukayo dia nyudiaka, ndu layumunyela ndjala ka kasha dia nanya mbu yanyu ya nde.

¹⁷Dimi layunyutumela ndjala ka kasha la nyama ya ngala dia nyusuya. Vo wayunyohotola anʼanyu. Elandu wayenama lʼatei anyu, ndu dikila diayutshulwama lamʼayumunyutumela yombo dia ndo la nyu.[15] Dimi Latuyalaka, kateketa.