Read tetala Ezekiyele 7 Bible Online

Ezekiyele 7 - tetala bible

Ezekiyele 7

¹Diui dia Latuyalaka diakayi le mi ati:

²We onʼa untu, Khumadiondjo Latuyalaka katela kete ya Isariyele ati: Elanyelu kambukuma lu beke nei dia kete.

³Dianyu ku elo! Dimi layunyuka kele, layunyulumbuya uku etsha anyu, layunyahe akambu anyu tshe wa wononyi.

⁴Ashu ami hawunyuhandja. Dimi halunyuka ketshi, layunyutshela uku etsha anyu, la akambu a wononyi weli lʼatei anyu. Ku nyu nyayeya nyati: Dimi keli Latuyalaka.

⁵Khumadiondjo Latuyalaka kata ati: Nyendi, kolo ladiku dia kolo kuyayi.

⁶Ku elo! Ku elo! Nyendi, ekumelu kambuya esadi dia ndjolo la nyu.

⁷Elanyelu kambuya le nyu, nyu asi kete. Etena kambukuka, lushi laya suki, lushi lʼohenyohenyo. Waelu wʼongenongeno kema ntu lʼekungu.

⁸Dimi lutsha nyutshulwela ududu ami, edja ndu lambushidiya kele kami. Dimi layunyulumbuya uku etsha anyu, layunyahe akambu anyu wa wononyi.

⁹Ashu ami hawunyuhandja; dimi halunyuka ketshi. Dimi layunyutshela uku etsha anyu, la akambu anyu a wononyi weli lʼatei anyu. Ku nyu nyayeya nyati: Dimi Latuyalaka kanyusuya.

¹⁰Nyendi, lushi la kolo lutsha nkuka. Elanyelu kanyu kambukuka, kolo kanyu kamboto elua, utaku anyu wambomonga alembo.

¹¹Akambu wa ngala wambuhama, wambuyala uku ohehela wa kolo. Nduku otoi lʼatei wʼului ayutshikala, kuyanga ongonyi awo; nduku layuyala la nemo lʼatei awo.

¹²Etena kambukuka, lushi laya suki. Usumbi tangenangenaki, usumbishi tanyangaki ne dia kele kambufulanela lʼatei wʼului awo tshe.

¹³Asundjishi hawukalula utsha lu diango diakawasundja, kuyanga vo weki la lumu. Enelo kene keko lu dikambu diʼului tshe wʼantu; to hukadimo. Nduku untu ayeya nshimbela lumu landi, ne dia kolo kandi.

¹⁴Vo wakadi amama, wakayalongosola, keli nduku untu akatshu utsha lu ta ne dia kele kami kambukuma le ului tshe.

¹⁵Lʼandja yombo, lʼetei elandu la ndjala ka kasha: one leli lʼusui, ayudiakema la yombo; la one leli lʼusumba, ayuvo la ndjala ka kasha la elandu.

¹⁶Naka amotshi lʼatei awo wayuhanda, vo wayuyala lʼekungu uku binga dia lʼekidi dialela dio tshe, untu lʼuntu ne dia kolo kandi.

¹⁷Anya awo wayuyala woduwodu, la adui awo wayolelo, wayuyala uku ashi.

¹⁸Vo wayolota akutu; woma wa mamba wayakumba; dundji diawo diayuyala sonyi ketu; la ete awo wayuyala ehombo etu.

¹⁹Vo wayukadja fesa yawo lʼesese, paunyi yawo yayuyala uku engo ka mindu. Fesa yawo la paunyi hayeya mbashimbela lu lushi la kele kami, dimi Latuyalaka. Vo haweyi nkutsha ehumba wa nyumu yawo la yo, kuyanga ndutsha akundju awo la yo, ne dia yo yambuyala utamba wa ntakanya lu dikambu diʼuhedia awo.

²⁰Vo wakose elengalenga kawo ka dimena, wakakiete engo ka ndjasema. Vo wakatshi dikishi diawo dia wononyi la diango diawo diatumuhetshaka lato, diako mbayumukiete engo ka mindu le wo.

²¹Dimi layukikimo lʼanya wʼasi wedja uku diango diawo, ndu le antu wa kolo uku engo ka dimbu, ku vo wayukilanya.

²²Dimi layukadimula elundji kami uma le wo. Vo wayulanya dihuli diami dia ngandji. Evi wayoto loko, wayudilanya,

²³wayudiete elanyelu. Ne dia kete yambulula too la dikila diʼandjakemi, la usumba weko too lʼakambu wa ngala,

²⁴diako mbayumela wedja wuleki kolo dia ndjahotola mvudu yawo. Dimi layukumia wulu awo wʼutaku. Ahuli awo wʼekila wayulanyema.

²⁵Lamʼayuya asui, vo wayuyanga ki, keli to huyala.

²⁶Asui wayahatana ladiku diʼasui, la lukumu la fono ladiku dia lukumu la fono. Vo wayuyanga enelo uma le umvutshi, keli elembe wayushisho uma lʼanya wʼelombodi, la alaku uma le dihansamendi.

²⁷Khumʼekanga ayutundo la delu, uwandji ayate asulu, la anya wʼasi wudja wayudidima la woma. Dimi lavatshela uku etsha awo. Layalumbuya uku atuwulumbuyaka akina. Ku vo wayeya vati: Dimi keli Latuyalaka.