Read tetala Danyele 10 Bible Online

Danyele 10 - tetala bible

Danyele 10

¹Lʼeleku ka satu ka diulelu dia Kuro khumʼekanga ka Peresiya, diui dimotshi diakayi le Danyele, letawo vati: Beleteshaza. Diui diako diaki mete; dio diaki dikambu dia ta dia wulu. Ndi akalangi diui diako ololo, akalimbitela enelo.

²Lu nshi sho dimi Danyele, lakaleli bingu shatu yʼetundu.

³Dimi konde yango ya nde yʼololo; unatshi kuyanga wanu komboto lʼunyo ami. Dimi kunshinula edja ndu lamʼakashili bingu shatu.

⁴Lu lushi lʼakumi ahendi lʼanei la ngondo ka ntundu, lamʼakamemadi lʼumamu wa ndjali ka wuki, ketawo vati: Tingirisi,

⁵dimi lakedia ashu, lakendi, ku lakenyi untu lakalotshi ahondo wa linene, la uya wa paunyi kʼuma lʼUfaza lu lukindi.[25]

⁶Dimba diandi diaki uku dive diʼekesekese; elundji kandi kaki uku dingadimu dia ndjadi; ashu andi waki uku nyumbi ya dja; anya andi la ekulu andi waki uku ohotela wa pudipudi; diui diandi diaki uku lufungusu la ului wʼantu.

⁷Dime, Danyele, kakenyi enelo kako. Antu waki kame la mi, kunkiena. Keli vo wakandama la woma wa mamba, wakalawo dia ntushama.

⁸Ku dimi lakatshikala dime. Dimi lakenyi enelo kene ka wuki, lakakomo tshe; elundji kami ka ngaingai kakadimo; dimi kundjala la wulu ntu.

⁹Dimi lakuki lundju lʼaui andi. Ku lamʼakamuki lundju la aui ako, dimi lakandama la nindi, lakako ekhukhumadi la kete.

¹⁰Ku dimi lakenyi lunya lʼuntu omotshi lamunanda. Ndi akamunyia, akambikia adui la tambi ladidima.

¹¹Ndi akamvutela ati: Danyele, we untu lalangema efula, ulungi aui wayangami nkutela. Emala too, ne dia dimi lambutumama le ye. Lamʼakandamvutela diu so, dimi lakemala ladidima.

¹²Ku ndi akamvutela atw Danyele, tukaki woma; umaka lushi la ntundu lakayasanguya dia nimbitela, la ndjakitshakitsha la ntundu ka Unyashungu aye, aui aye wakukema. Lu dikambu dia aui aye mbayamayi.

¹³Keli uwandji wa diulelu dia Peresiya akasemanela la mi nshi akumi ahendi la otoi. Ku Mikaele, uwandji omotshi uma lʼatei wʼewandji a waki, akayunkimanyia. Dimi lakutshiki leko lasuki la khumi ya dikanga ya Peresiya.

¹⁴Kakiane dimi lambuya dia ndjukulimbitshiya akambu wayuyala le wudja aye lu nshi yayayi, ne dia enelo kako keko lu dikambu dia nshi yukuyala.

¹⁵Lamʼakandamvutela aui aso, dimi lakakole elundji kami utsha la kete, lakayala lumi.

¹⁶Menyi ku one lufanyi la ana wʼantu ambuyunanda elomo ami, ku dimi lakafula unyo. Dimi lakatela one lakemadi la ntundu kami nti: Khumemi, enelo kene kambumbata asulu, wulu ami wambushila tshe.

¹⁷Khumemi, ukundi eyami nteketa la ye, dimi ukambi aye? Kakiane wulu ami wambushila, handjohenga ntu.

¹⁸Ku one lufanyi la untu akamunanda ntu, akankikitsha.

¹⁹Ku ndi akamvutela ati: We untu lalangema efula, ki kayali la ye, tukaki woma; ukikitali, uyali la dihunga. Lamʼakandateketa la mi, dimi lakakikitala; lakati nti: Khumemi, otekete, ne dia we ambunkikitsha.

²⁰Ndi akamumbula ati: We mbeyaka dikambu diuyemi le ye? Kakiane dimi lutsha nkalula la ntolo la uwandji wa Peresiya. Lamʼayumunela, uwandji wa Ngirika ayuya.

²¹Keli dimi nangaka nkulimbitshiya aui wufundami lu buku dia mete. Nduku latuyalaka kame la mi dia mbalosha, tshikima uwandji aye, Mikaele.[26]