Read tetala Danyele 11 Bible Online

Danyele 11 - tetala bible

Danyele 11

¹Okone dimi laki lasuki la ndi, dia mbukimanyia la mbukikitsha, lʼeleku ka ntundu ka Dariyo, usi Mediya.

²Kakiane, dimi lutsha nkulimbitshiya mete ka dikambu ne. Ulungi, khumi ya dikanga shatu yayuyala ntu lu Peresiya. Ku khumʼekanga ka nei ayuyala la ukundji ndeka akina tshe. Lamʼayunduyala la wulu uma lu ekundji andi, ndi ayunyiya wedia tshe dia ndosha diulelu dia Ngirika.

³Ku khumʼekanga ka wulu ayunela, ayulela la wulu wa mamba. Ndi ayutshaka uku ayundulanga.

⁴Lamʼayunduyabiya, diulelu diandi diayuhandjo, diayukahanyema lu beke nei diʼandja. Diulelu hadiuyala le anʼanai, ndu hadiuyala wulu uku akidio. Dio diayuhandjo, diayukimwama le akina, keli aha le wo.

⁵Khumʼekanga ka la diku dia kushi ayuyala la wuli Otoi omotshi lʼatei wʼewandji andi, ayuleka wulu. Ku diulelu diʼuwandji ako diayuyala wulu efula.

⁶Lamʼayeta deku dimotshi, vo wayekesanela. Ona umuntu a khumʼekanga ka la diku dia kushi ayutsho le khumʼekanga ka la ngelʼa kushi, dia ntukana la ndi, diaha vo ndjaia la ta. Keli ndi huyala la wulu, ndu khumʼekanga hushikikala, ndi kana alimbi andi. Ona umuntu ako avukimwama kame la waku wayutsho la ndi, kame la on andi nau kame la one layuyala kangandi lu etena kako.

⁷Keli dimonga dimotshi diʼuma lʼediu a umuntu ako diayunela lu dihuli dia khumʼekanga. Ndi ayutsho dia ntolosha alimbi, ayutoto lʼusumba a wulu wa khumʼekanga ka la ngelʼa kushi. Ndi ayutolo la wo, ayalembia.

⁸Ndi ayutosa ditemolatemola diawo, dikishi diawo dia lolelola, ndu diango diawo diʼushinga wulu dia fesa la dia naunyi, ayuditola utsha lʼEdjibitu. Ndi ayutukumo deku dimotshi diaha ndo la khumʼekanga ka la ngelʼa kushi.

⁹Khumʼekanga ka la ngelʼa Lushi avutsho dia ntolosha diulelu dia khumʼekanga ka la diku dia kushi. Ku ndi ayukalula lu kete yandi.

¹⁰Anʼandi wʼapami wayutunga ta, wayusanganya ului a wuki wulimsi, wayunela, wayudiangana uku dikeledu, wayutshulotshulo. Vo wayutalokaka ta pulu ndu lʼusumba a wulu wa khumʼekanga ka la diku dia kushi.

¹¹Khumʼekanga ka la diku dia kushi ayudanganela la kele, ayutumba dia ntololo la khumʼekanga ka la ngelʼa kushi. Khumʼekanga ka la gelʼa kushi ayusanganya ului a wuki wʼalimbi, ku vo wayukimwama lʼanya wa khumʼekanga ka la diku dia kushi.

¹²Ului ako wʼalimbi wayutolama lu fumbi, ka utema a khumʼekanga ka la diku dia kushi ayuyambiya efula. Ndi nyudiaka antu nunu nunu, keli ndi holembia.

¹³Ku khumʼekanga ka la ngelʼa kushi ayusanganya ului a wuki wʼalimbi, wuleki wa ntundu efula. Lʼokongo wa deku dimotshi, ndi ayuya la ului a wuki wʼalimbi la ekundji efula.

¹⁴Lu etena keso, antu efula wayotombokwela khum ekanga ka lu leke la diku dia kushi. Apami wa ngala wʼuma lʼatei a wudja aye wayotomboko dia nshidiya aui wa enelo, keli vo watolembiama.

¹⁵Ku khumʼekanga ka la ngelʼa kushi ayuya, ayutshimia ngeli, ayolembia usumba wudingami la ngeli Alimbi wʼuma lu leke la diku dia kushi haweyi nshikikala, kuyanga ahuka a wulu wayusonola khumʼekanga, ne dia wulu awo wa nshikikala wayushila.

¹⁶Keli one layuya dia njdolosha, ayutshaka uku ayundulanga, nduku layushikikaʼa la ntundu kandi. Ndi ayemala lu kete ya lutumbu, la wulu wa nanya wayuyala lʼanya andi.

¹⁷Ndi ayukikitsha utema dia ndja lʼalimbi tshe wa lu diulelu diandi. Ndi ayudja la khumʼekanga ka la diku dia kushi sheki, ayuyishikike. Ndi ayuyuwusha onʼandi a umuntu wadi, la elungamelu ka ndi ndjulanya diulelu diandi, Keli elanyelu kako huyala, la dikambu diako hadiuyala waho le ndi.

¹⁸Lʼokongo wʼakambu aso, ndi ayediya elundji kandi utsha lʼasenga. Ndi ayalembia efula, keli uwandji omotshi ayukumia tengo yandi, ayukaluya tengo yako lʼote andi.

¹⁹Lʼokongo diku, ndi ayelela utsha lu esumba wʼudingami kumbu wa lu kete yandi. Keli ndi ayutakana, ayoko, hawutana ntu.

²⁰Ku untu layunela lu dihuli diandi, ayutuma ulungudi wʼelambu lʼatei a diulelu dia lutumbu. Ku lʼokongo a nshi motshi, ndi ayunyema, aha lu kele kuyanga lu ta.

²¹Untu laha la nemo, lahawulanga ndi ndjala Khumʼekanga, ayunela lu dihuli diandi. Ndi ayene lu nshi ya lutui tshitshi, ayukundja diulelu uma lu aui wʼoselo.

²²Elui wʼalimbi wayolembiama la ntundu kandi, wayohotshahotshama, ndu uwandji wa daka pupu.

²³Lumʼayushila antu amotshi mbidja la ndi sheki, ndi ayutsha akambu wa lukesu. Ndi ayuhama, ayuyala wuki uma lʼului wa tshitshe wʼantu.

²⁴Ndi ayukuma lu ahuli wuleki eteto wa lu wudja, lu nshi ya lutui tshitshi. Ndi ayutsha akambu waki washi kuyanga watshendi kuntshika. Ndi ayukahanya diango dia dimbu, dia lohotola, ndu ekundji. Ndi ayusanguya ndosha esumba wudingami kumbu. Keli dikambu diayuyala nshi motsni tshu.

²⁵Ndi ayuhiba la wulu andi tshe ndu la dihunga diandi tshe dia ntsho la ului a wuki wʼalimbi, dia ntolosha khumʼekanga ka la diku dia kushi. Khumʼekanga ka la diku dia kushi yuya la ului a wuki wʼalimbi weli la dihunga dia ndo la ndi. Keli ndi hushikikala, ne dia antu wayusanguya mbutshela kolo.

²⁶Waku watolakaka ma diandi dia khumʼekanga, wayutungela elanyelu. Alimbi andi wayuhandjo vwaa, wayuvo ului a wuki.

²⁷Khumʼekanga hyendi yayudja tukanyi tawo dia ntsha kolo, wayutaka aui wa kashi lu mesa wame. Keli dikambu so hadiuluwana, ne dia ekumelu kayuyala paka lu etena kakasanguyama.

²⁸Khumʼekanga ka la ngelʼa kushi ayukalula utsha lu kete yandi la ekundji efula. Ndi ayukikitsha utema dia nanya sheki yʼekila, ayutshaka uku ayundulanga, ayukalula utsha lu kete yandi.

²⁹Lu etena kakasanguyama, ndi ayukalula, ayukuma lu leke la diku dia kushi. Keli akambu hawuyala lu etena keso, uku akiwo ntundu.

³⁰Mashua wʼuma la Kitime wayuya dia ndjolosha, ku ndi ayunyanga efula, ayukalula. Ndi ayuka kele, ayuhimba nanya sheki yʼekila. Lamʼayundukalula, ndi ayukana la waku wayoseka sheki yʼekila.

³¹Alimbi wayuya uma lu diui diandi, wayusanya etemwelo la lungeli lato, wayotola ulambu wa lutshumba wa la lushi la lushi. Vo wayei engo ka wononyi, katutungaka elanyelu.[27]

³²Ndi ayukesa wane wayutuna sheki yʼekila la aui wʼoselo. Keli waku wateyaka Unyashungu awo, wayuyala la dihunga, wayushikikala.

³³Wane wuleki yimba lʼatei a wudja, wayulimbitshiya antu efula, kuyanga vo wayudiakema nshi motshi la yombo, ndu lu lumbi la dja, lu lohombo kana lu ehotwelo ka diango.

³⁴Lamʼayuwolembiama, vo wa-yukimanyiama etenyi, keli antu efula wayamamema lʼaui wʼoselo.

³⁵Keli amotshi lʼatei a akanga a yimba wayolembiama, dia vo mbediama, dia vo ndjala pudipudi: diaha ndjala la diwadi, edja ndu lʼetena kʼekumelu, ne dia etena kakasonwama keki la ntundu.

³⁶Khumʼekanga ayutshaka uku ayundulanga, ayuyambiya, ayuyatumbula ladiku dia ditemolatemola tshe.[28] Ndi ayuta aui wahakuki lu dikambu dia Unyashungu wa ditemolatemola.[29] Ndi ayongona edja ndu lamʼayushila ududu andi, ne dia akambu wakasanguyama wayutshama.

³⁷Ndi hudja ashu le ditemolatemola dia washi, kuyanga le sene katulangaka amantu, kana mbidja ashu le etemolatemola kekina, ne dia ndi ayuyambiya ladiku dia tshe.

³⁸Lu diulelu diandi, ndi ayolemia etemolatemola ka lu wembe wa ta lu dihuli diadio. Etemolatemola kako kaki washi kumbeya, ndi ayukilemia la paunyi, fesa, ave wʼushinga a wulu la diango diʼamena.

³⁹Ndi ayukitsha wane watukundjaka ekimanyelu limi le etemolatemola kʼasi wedja lu ngeli ya wulu ya ta. Ndi ayolemia wane wayuwetawo; ayuwadja embuledi wʼantu efula, ayuwasha kete difutu.

⁴⁰Lu etena kʼekumelu, khumʼekanga ka la diku dia kushi ayutshindana la khumʼekanga ka la ngelʼa kushi. Ku khumʼekanga ka la ngelʼa kushi ayukhunguso utsha le ndi uku punganendji, kame la pusupusu ya ta, ambahemi wa falasa la mashua efula. Ndi ayoto lu wudja uku likeledu, ayukukanea, ayulekana.

⁴¹Ndi ayoto lu kete ya lutumbu, wedja efula wayolembiama, keli Edome, Moaba la etenyi kuleki wuki kʼasi Amona, wayuhanda.

⁴²Ndi ayusimbula lunya landi utsha le wedja; kete ya Edjibitu hayuhanda.

⁴³Ndi ayuyala kanga waumbelu wa paunyi la fesa, la diango tshe diʼushinga a walu dia lu Edjibitu. Asi Libiya la asi Etiyopiya wayuyela.

⁴⁴Keli kumu yʼuma lʼehutwelu la yʼuma la ngelʼa kushi yayuwata asulu. Ndi ayutsho la kele ka wulu dia ntulanya la ntushila antu efula ushiki

⁴⁵Ndi ayuhika mvudu yʼapema ya diulelu diandi lʼasa ashi a waki la ukungu wa lutumbu wʼekila. Lʼokongo diku, ekumelu kandi ayenama; nduku layukimanyia.